16
ፆሳ ሃንቆይ ኩሚዳ ፁዓታ
1 ሄሳፌ ጉዬ፥ ፆሳ ኬꬃፌ ላፑን ኪታንቾታኮ፥ «ቢዲ ፆሳ ሃንቁዋ ላፑን ፁዓታፔ ሳዓን ጉሲቴ» ያጊዲ፥ ኦዲያ ዎልቃማ ቃላ ሲዓስ።
2 ኮይሮ ኪታንቾይ ቢዲ፥ ባ ፁዓን ዴዔይሳ ሳዓን ጉሲን፥ ዶዓ ማላይ ዴዔይሳታ ቦላኔ ኢያ ሚሲሊያ ጎይኒዳይሳታ ቦላ ኢታኔ ዛሚያ ማዱንꬂ ኬዪስ። ኬሳ 9፡10
3 ናምዓንꬆ ኪታንቾይ ባ ፁዓን ዴዔይሳ ኣባን ጉሲን፥ ኣባይ ሃይቂዳ ኣሳ ሱꬂ ዳኒስ። ቃሲ ኣባን ዴዒያ ሜꬌቴꬃ ኡባይ ሃይቂስ።
4 ሄꬓንꬆ ኪታንቾይ ባ ፁዓን ዴዔይሳ ሻፋታኒኔ ፑልቶ ሃꬃታን ጉሲን፥ ሃꬃቲ ሱꬂ ጊዲዶሶና። ኬሳ 7፡17 5 ሄሳፌ ጉዬ፥ ሃꬃ ቦላ ማቲ ዴዒያ ኪታንቾይ ሃይሳዳ ያጊሺን ሲዓስ።
«ሃዒካ ቤኒካ ዴዒያ ጌሻው፥ ኬሳ 3፡14
ሃይሳዳ ኔ ፒርዲዳ ጊሾ ኔኒ ፂሎ።
6 ኤንቲ ጌሻታ ሱꬃኔ ናቤታ ሱꬃ ጉሲዳ ጊሾ
ኤንቲ ሱꬁ ኡያና ሜላ ኦꬃዳሳ።
ኤንቲ ባንታው ቤሲያባ ኤኪዶሶና»
ያጊስ። 7 ያርሾ ቤሳፌ፥
«ጎዳው፥ ኡባፌ ዎልቃማ ፆሳው፥
ኔ ፒርዳይ ቱማኔ ፂሎ»
ያጊያ ቃላ ሲዓስ።
8 ኦይዳንꬆ ኪታንቾይ ባ ፁዓን ዴዔይሳ ኣዋ ቦላ ጉሲን፥ ኣዋይ ባ ሴላን ኣሳ ፁጋና ሜላ ኣዋስ ዎልቂ ኢሜቲስ። 9 ኣሳይ ዎልቃማ ሴላን ፁጌቲዲ፥ ሄ ቦሻታ ቦላ ማቲ ዴዒያ ፆሳ ሱንꬃ ባዲዶሶና፤ ባንታ ናጋራፔ ሲሚዲ ፆሳ ቦንቺቦኮና።
10 ኢቻሻንꬆ ኪታንቾይ ባ ፁዓን ዴዔይሳ ዶዓ ኣራታ ቦላ ጉሲን፥ ሄ ዶዓ ካዎቴꬃይ ꬉሚስ። ኣሳይ ኡንዓ ጊሾ ባንታ ኢንፃርሳ ሳፆሶና። ኬሳ 10፡21 11 ቃሲ ኣሳይ ኡንዓ ጊሾኔ ማዱንꬃ ጊሾ ሳሎ ፆሳ ባዲዶሶና፤ ባንታ ኦꬂዳ ናጋራፔ ሲሚቦኮና።
12 ኡሱፑንꬃ ኪታንቾይ ባ ፁዓን ዴዔይሳ ጊታ ኤፊራፂሴ ሻፋን ጉሲን፥ ዶሎሃ ባጋፌ ያና ካዎታስ ኦጌይ ጊጋና ሜላ ሃꬃይ ሜሊስ። ኢሳ 11፡15 13 ሄሳፌ ጉዬ፥ ሾꬌ ዳኒያ ሄꬑ ቱና ኣያናቲ ዳዊያ ዶናፔ፥ ዶዓ ዶናፔኔ ዎርዶ ናቢያ ዶናፔ ኬዪሺን ቤዓስ። 14 ኤንቲ ማላታታ ኦꬂያ ቱና ኣያናታ። ሄ ሄꬑ ቱና ኣያናቲ ኡባፌ ዎልቃማ ፆሳ ጊታ ጋላሳን ሃናናው ዴዒያ ኦላስ ሺሻናው ኣላሜ ካዎታ ኡባኮ ባና።
15 «ሄኮ፥ ታ ካይሶዳ ያና! ኣሳ ሲንꬃን ካሎቶናዳኔ ዬላቶናዳ ባርኪዲ፥ ባ ማዑዋ ናጊያ ኡራይ ኣንጄቲዳይሳ!» ያጊስ። ማቶ 24፡43
16 ሄ ቱና ኣያናቲ ካዎታ ኢብራይስፄ ዶናን ኣርማጌዶኔ ጊያ ቤሳን ሺሺዶሶና። 2ካዎ 23፡29፤ ዛካ 12፡11
17 ላፑንꬃ ኪታንቾይ ባ ፁዓን ዴዔይሳ ጫርኮ ቦላ ጉሲን፥ ፆሳ ኬꬃን ዴዒያ ኣራታፔ፥ «ፖሌቲስ» ያጊያ ዎልቃማ ቃላይ ዪስ። 18 ሄሳፌ ዎልዓንꬂ ዎልዓሚስ፤ ዳዳይ ꬉቂስ፥ ቢታይ ቃፂስ። ኣሲ ሳዓን ሜꬌቶሳፔ ቢቲ ሄሳ ሜላ ቃፆ ቃፂቤና። ሄሲ ኡባፌ ኣꬊዳ ቃፆ። ዮ.ቆ 8፡5፤ 11፡13 19 ጊታ ካታማይ ሄꬑ ኬዪዲ ሻኬቲስ፤ ቢታ ኡባን ዴዒያ ካታማቲ ꬋዪዶሶና። ፆሳይ ጊታ ካታማ ባቢሎኔ ቆፒዲ፥ ባ ኢታ ሃንቆ ዎይኔ ኡሻይ ኩሚዳ ፁዓ ኢው ኢሚስ። ኢሳ 51፡17 20 ሃꬃን ቴቄቲዳ ቢታቲ ꬋዪዶሶና፤ ዴሬቲካ ቤንቲቦኮና። ዮ.ቆ 6፡14 21 ኣሳ ቦላ ኦይታማኔ ኢቻሹ ኪሎ ጊራሜ ሜላ ዴፂያ ዎልቃማ ሻቺ ሳሎፔ ቡኪስ። ቦሻይ ዳሮ ኢታ ጊዲያ ጊሾ ኣሳይ ሻቻ ቦሻ ጊሾ ፆሳ ባዲዶሶና። ኬሳ 9፡23