Roma yaaba.
2.
Yeni ke fini yua jiagi a lieba buudi ke a mo yaa tieni li bona ke bi baa jaliga kelima fini n buu ki gɔ tiendi ti biidi. 
Ama ti bani ke u Tienu biidi jiama nua yaaba n jiindi i mɔni po. 
Ama fini yua jaligi a lieba, ke nan tie li bona a maali ke a bu ñaa ti buudi nni i? 
Bii a yini U Tienu bua cianla, o sugli yeni o pasɔngili kuli fanmi a? 
Kelima maa a kangbadima po n cedi ke U Tienu pali biidi yaa daali ke o jiagi ti biidi. 
Wan yua bigindi yua kuli yeni o tuona, 
ki caa liiga ki kpaani U Tienu kpiagili yeni yaa miali n kan gbeni. 
Ama bi japadanba yeni kanmaadi mɔni nba, a kangbada yeni bi mutuodanba, 
yaalidigu yeni li ŋmadili bu cua yaa nalinga n tieni bonbiilikuli po, cincinli Sufinba yeni yaaba n ki tie Sufinba. 
Ama li pamanli yeni ti ŋandi n yaa ye yaaba n tiendi yaala n ŋani, cincinli Sufinba yeni yaaba ki tie ba, 
kelima U Tienu ki pia bɔgili. 
Li yapo yaaba ke yikodi baa cuo ba yeni yaaba n yie ti yikodi kuli kpe le nni. 
Kelima yaaba n cindi ti yikodi kaa tie yaaba n mɔni U Tienu po, ama yaaba n suani yeni laa. 
Kelima yaaba n ki bani U Tienu yaa kpagi ti yikodi, bi tieni li po yeni kelima ban mɔno bu tua yikodi i. 
Li po, wangi yiko tuona yanjagili tie sieda, 
maalima wangi yaa daali ke U Tienu baa bu bi niba ki tɔgini Jesu Krisiti labaamanli po. 
A yaa yii sufa, a ye ti yikodi ki kpanmi yeni U Tienu, 
ki bani o buama yeni li bona yia ke yikodi bo cabi, 
A yaa tie a juama yeni li bonbonli nni ŋmagidi ka, 
ki yendi bi yanbondanba, ki tundi bi tɔba, daa maali ke a mi banma yeni i mɔni kaa. 
Li yaa tie ke a tundi bi niba, be n cedi ke a ki tundi a baa i? A tundiki ban daa su, a ki suu? 
Fini yua tundi ke ban daa conmi a ki conmi i? Fini yua yie a pada a ki su ti jandie nni i? 
A wangi a baa ke U Tienu teni fini o maama ke gɔ ji kuandi o i fe kelima a ki cɔli nni o maama. 
Kelima bi nundi U Tienu ki dugini a yaa po i nani lan diani yeni. 
Ti kɔndi ŋani li ya sua ke a cɔlini ti yikodi, li ya sua ke a yie, a kɔndi bu tua fanma i. 
Li yaa sua ke jelo cɔlini yikodi, o gua tie jeli yaa? 
Jeli yaa cɔli nni yikodi, o ki pia mabili nani fini yua bani o ki yie yeni? 
Li yapo sufa mɔno tie yua lebdi o pali, li ki tie o gbanandi po kaa. 
kelima ti kɔndi tie li pali nni, i diani po kaa. O nilo donda ki ŋaa o kani kaa, U Tienu kani.