33
Moizez omono uze'egatu Izaew ta'yr wazuapyapyr nànàgatu a'e kury
1 Umàno 'ym mehe we Moizez Tupàn hemiruze'eg omono ko ze'egatu teko Izaew wanehe. 2 Nezewe i'i a'e.
— Tupàn Tuweharupi Wiko Ma'e ur Xinaz ywytyr wi a'e.
Uzexak kar kwarahy ài Enom wa'aromo.
Pàrà ywytyr wi uhyape katu wemiaihu wanehe.
Heko haw pe har tetea'u ur hupi wà. Heta tata iawyze har rehe.
3 Tupàn Tuweharupi Wiko Ma'e uzamutar katu wemiaihu wà.
Uzekaiw katu wemiruze'eg wanehe.
Wapyk henataromo ize'eg rehe uzemu'e pà wà.
4 Moizez omono Tupàn ze'eg wanupe.
Ize'eg nuzawy kwaw temetarer tetea'u teko Izaew wanupe.
Naheta kwaw amo hekuzar wera'u ma'e wanupe.
5 Izaew ta'yr wazuapyapyr teko hexaexak pyrer uwihaw wanehe we wazemono'og mehe,
Tupàn Tuweharupi Wiko Ma'e wiko wanuwihawete romo.
6 Moizez uze'eg nezewe Humen izuapyapyr wanehe a'e.
Tuwe Humen wikuwe tuweharupi wà nehe.
Tuwe numàno pixik kwaw wà nehe.
Tuwe heta tetea'u tuweharupi wà nehe.
7 Umume'u ko ma'e Zuta izuapyapyr wanehe.
O Tupàn, einu Zuta newe waze'eg mehe ne wà nehe.
Emono'og a'e teko amogwer neremiaihu wanehe we ne wà nehe.
Ezàmàtyry'ym waàmàtyry'ymar ne wà nehe.
Epytywà waàmàtyry'ymar waneityk mehe ne wà nehe.
8 Umume'u ko ma'e Erewi izuapyapyr wanehe.
O Tupàn, eremono Tumi Uri rehe we
Neremiruze'eg neremixamixak kwer wanupe.
Ereagaw Maxa pe ne wà.
Ereze'egahy wanupe Merima 'yzygwar huwake ne wà no.
9 Uzemonokatu wera'u newe a'e wà.
Nuzemonokatu kwaw u wanupe wà,
Uwywyr wanupe wà, wa'yr wanupe wà.
Weruzar neze'eg wà.
Uzapo ma'e uze'egaw nerehe we wemiapo katu kwer rupi katete wà no.
10 Umu'e putar teko paw neze'eg rehe wà nehe.
Wapy putar yhyk zàwenugar nerenataromo wà nehe.
Uzuka putar ma'ea'yr ma'ea'yr hapy haw nerenataromo har rehe wà nehe no.
11 O Tupàn, emono neze'egatu Erewi izuapyapyr wanehe nehe.
Tuweharupi emukàg kar wiwi wera'u ne wà nehe.
Tuwe wanemiapo paw ikatu newe nehe.
Emumaw waàmàtyry'ymar ne wà nehe.
Tuwe nuzeupir wi pixik kwaw wà nehe.
12 Umume'u ko ma'e Mezàmi izuapyapyr wanehe.
Tupàn Tuweharupi Wiko Ma'e uzamutar katu Mezàmi izuapyapyr a'e wà.
Tuwe omonokatu 'ar nànàn wà nehe.
Tupàn uzekaiw putar wanehe tuweharupi nehe.
Wiko katu putar wà nehe, ta'e upyro putar ikatu 'ymaw wi a'e wà nehe xe.
13 Umume'u ko ma'e Zuze izuapyapyr wanehe.
Tuwe Tupàn Tuweharupi Wiko Ma'e omono uze'egatu Zuze waiwy rehe nehe.
Tuwe umugyr kar àmàn tetea'u hehe nehe.
Tuwe umur 'yzygwar ohoete ma'e tetea'u hehe nehe no.
14 Tuwe Tupàn omono ma'e'a kwer kwarahy hemimuapyw kwer wanupe nehe.
Tuwe omono uze'egatu arozràn ipo'o haw tetea'u rehe wanupe nehe no.
15 Tuwe ywytyr kwehe arer umuezuz temi'u tetea'u wà nehe.
16 Tuwe Tupàn omono uze'egatu a'e ywy rehe nehe, hehe har nànàn nehe no.
Tuwe umur ikatu ma'e paw a'e ywy rehe nehe.
Tuwe Tupàn ka'akyr ukaz ma'e pupe uzexak kar ma'e kwer
uzapo ikatu ma'e wanupe a'e nehe.
Tuwe a'e ze'egaiw paw u'ar Zuze izuapyapyr wanehe nehe.
Ta'e Zuze wiko wyky'yr wanuwi upuner wera'u ma'e romo a'e xe.
17 Ipuràg eteahy haw nuzawy kwaw tapi'aka'yr awa ipuràg eteahy haw.
I'ak nuzawy kwaw tapi'ak awa hehaite ma'e i'ak.
Manaxe izuapyapyr heta tetea'u ma'e wiko i'ak romo wà.
Eparai izuapyapyr heta tetea'u ma'e wiko i'ak romo wà no.
Zuze uzàmàtyry'ym wàmàtyry'ymar u'ak pupe wà.
Oho wanaikweromo ywy nànàn wà.
18 Umume'u ko ma'e Zemurom izuapyapyr wanehe, Ixakar izuapyapyr wanehe no.
Tuwe Zemurom wiko hemetarer katu ma'e romo
amo ywy rehe har wanupe ma'e ime'eg pà wà nehe.
Tuwe Ixakar hemetarer katu uiwy pupe wà nehe.
19 Wenoz teko wamuwà ywytyr uiwy rehe har pe wà.
A'e teko uzuka putar ma'ea'yr Tupàn pe ikatu ma'e a'e pe wà nehe,
henataromo wà nehe.
Upyhyk putar ikatu ma'e tetea'u yryhu wi wà nehe.
Upyhyk putar ikatu ma'e tetea'u ywyxig yryhu izywyr har wi wà nehe no.
20 Umume'u ko ma'e Kaz wanehe.
Ikatuahy Tupàn a'e, ta'e umuhua'u Kaz ywy a'e xe.
Teko Kaz izuapyapyr wàro ma'e zàwàruhu iriàw ài wà.
Ozo'ok wàmàtyry'ymar izywa. Ozo'ok iàkàg wà no.
21 Upyhyk ywy imume'u pyrer ipehegwer uhua'u wera'u ma'e wà.
Omono pehegweruhu tuwihaw pe imono pyr zàwenugar izupe wà.
Weruzar Tupàn Tuweharupi Wiko Ma'e ze'eg wà.
Weruzar hemiapo kar wà,
teko wanuwihaw wazemono'og mehe wà.
22 Moizez umume'u ko ma'e Nà izuapyapyr wanehe.
Nà nuzawy kwaw zàwàruhua'yr iriàw.
Opoopor iko Màxà ywy rehe.
23 Moizez umume'u ko ma'e Napitari izuapyapyr wanehe.
Tupàn omono uze'egatu tetea'u Napitari wanehe.
Waiwy uzypyrog Karirez yryhu rehe.
Oho kwarahy ihemaw awyze har kutyr har pe.
24 Moizez umume'u ko ma'e Azer izuapyapyr wanehe.
Tupàn omono wera'u uze'egatu tetea'u Azer wanehe amogwer wanuwi a'e.
Tuwe Tupàn uzamutar katu wera'u
Azer amogwer Izaew ta'yr wazuapyapyr wainuinuromo wà nehe.
Tuwe heta tetea'u uri 'yw waiwy rehe nehe.
25 Tuwe ukenawhu itaper iapo pyrer umigatu tawhu waiwy rehe har nehe.
Tuwe a'e tawhu pe wiko zeàmàtyry'ym 'ymaw rehe tuweharupi wà nehe.
26 Teko Izaew izuapyapyr wà, naheta kwaw amo Tupàn Zanezar zàwenugar a'e wà.
Ikàg a'e. Tuwihawete zàwe hekon. Wahaw ywak.
Wapyk ywàkun rehe. Ur zanepyro pà no.
27 Tupàn Tuweharupi Wiko Ma'e wiko zanerehe uzekaiw ma'e romo.
Uzekaiw zanerehe tuweharupi uzywa pupe.
Zanerenatar wi Tupàn umuhem kar zaneàmàtyry'ymar wà.
— Pemumaw pe wà nehe, i'i zanewe.
28 Teko Izaew wiko katu tuweharupi wà.
Wiko zeàmàtyry'ym 'ymaw rehe ywy ikatu ma'e rehe wà.
A'e ywy umur arozràn tetea'u wanupe.
Umur win tetea'u wanupe no.
Zuwiri tetea'u u'ar ywy rehe.
29 Teko Izaew izuapyapyr wà. Penurywete tuwe peiko.
Naheta kwaw amo teko pezàwenugar wà.
Peiko teko Tupàn Tuweharupi Wiko Ma'e hemipyro kwer romo.
Wiko u'yw wi pezemimaw romo a'e.
Wiko petakihe puku romo no. Pezeàmim puruzuka haw wi.
Weityk peàmàtyry'ymar penenataromo wà no.
Izaew, peàmàtyry'ymar wapyk putar upenàràg rehe penenataromo wà nehe.
— Urepuhareko pe nehe, i'i putar peme wà nehe.
Pepyhyk putar waiwy nehe. Peiko putar waiwy izar romo nehe.