15
Moizez uzegar a'e
1 Na'e Moizez a'e, Izaew izuapyapyr a'e wà no, uzegar Tupàn Tuweharupi Wiko Ma'e pe ko zegar haw imuzàg pà a'e wà kury.
Azegar putar Tupàn Tuweharupi Wiko Ma'e pe nehe,
ta'e weityk tuwe wàmàtyry'ymar a'e wà xe.
Kawaru a'e wà, zauxiapekwer iku'az har a'e wà no, Tupàn weityk yryhu pupe a'e wà.
2 Tupàn Tuweharupi Wiko Ma'e wiko hepytywà har ikàg ma'e romo.
Wiko hepyro har romo. Hezar romo hekon.
Amume'u putar ikatu haw nehe. Heru izar romo hekon.
Amume'u putar ikàgaw hezegar pà nehe.
3 Puruityk ma'e romo hekon.
Tupàn Tuweharupi Wiko Ma'e her romo a'e.
4 Ywyramawa Parao ima'e a'e wà,
zauxiapekwer Parao hemiruze'eg a'e wà no,
Tupàn weityk yryhu pupe a'e wà.
Tuwihaw Parao rehe we har ikatu wera'u ma'e a'e wà,
uzeapypyk Yryhupiràg pupe a'e wà.
5 'Y ohoete ma'e upyk a'e wà.
Wezyw 'y pupe ita zàwe wà.
6 Nepo awyze har ikàg a'e, Tupàn Tuweharupi Wiko Ma'e.
Teko wexak nekàgaw wà.
Nepo awyze har, Tupàn, uhauhaw neàmàtyry'ymar wà.
7 Nekàgahy haw rupi ereityk neàmàtyry'ymar ne wà.
Nereikwahy haw nuzuawy kwaw tata,
Wapy neàmàtyry'ymar ka'akyr ài.
8 Nepytuhemaw neapygwar wi uhem ma'e kwer umupu'àm 'y yryhu pe har.
'Y upu'àm ma'e nuzuawy kwaw pàrirogaw tàtà ma'e.
'Y yryhu iwype har tàtàahy neàmàtyry'ymar wanupe.
9 Neàmàtyry'ymar uze'eg nezewe a'e wà.
Zaha putar wanaikweromo nehe.
Xipyhyk putar zane wà nehe.
Xipyhyk putar wama'e paw nehe.
Xipyhyk putar wyzài wama'e heremimutar nehe.
Apyhyk putar hetakihepuku nehe.
Ximumaw putar zane wà nehe, i'i uzeupeupe wà.
10 Nezewe rehe we erezupy ne.
A'e rupi yryhu upyk neàmàtyry'ymar a'e wà.
Wezyw ita ipuhuz katu ma'e xum her ma'e ài wà, yryhu uhua'u ma'e pupe wà.
11 Ma'enugar tupàn a'ua'u wiko ne ài a'e wà. Ma'enugar ikatu ne ài wà. Ma'enugar ikàg ne ài wà. Ma'enugar uzapo hexak pyr 'ym ne ài wà.
Ma'enugar uzapo purumupytuhegatu kar haw ne ài wà.
12 Erepyho nepo awyze har ne.
A'e rupi ywy omokon ureraikweromo ur ma'e wà.
13 Erezamutar katu neremiaihu ne wà.
A'e rupi ereruze'eg putar neremipyro kwer ne wà nehe.
Nekàgaw rupi ereraha putar a'e teko nereko haw ikatuahy ma'e pe ne wà nehe.
14 Teko amogwer ywy rehe har uryryryryz waiko ukyze pà wà.
Piri ywy rehe har ukyze katu wà.
15 Enom ywy rehe har wanuwihaw a'e wà nehe,
ukyze putar tuwe newi a'e wà nehe.
Moaw ywy rehe har upuner ma'e a'e wà nehe,
uryryryryz putar newi ukyze pà a'e wà nehe.
Kànàà ywy rehe har paw uryryryryz waiko wà.
16 Ma'e wi wakyze haw u'ar wanehe.
Wexak nepuner haw uhua'u ma'e wà.
Upytu'u uzemumyz 'ym pà ita ài wà.
Te neremiaihu ukwaw waneko haw rupi wà.
Neremipyro kwer wahaw waiwy wà.
17 Ereraha putar neremiaihu a'e pe ne wà nehe.
Eremuigo kar putar neremiruze'eg ywytyr nema'e rehe ne wà nehe,
Ta'e erexak a'e ywytyr nereko haw romo ne xe.
Ne ae erezapo a'e neràpuzuhu.
18 Tupàn Tuweharupi Wiko Ma'e wiko putar tuwihawete romo tuweharupi nehe, awyzeharupi nehe,
i'i a'e zegar haw Tupàn Tuweharupi Wiko Ma'e pe iapo pyrer.
Mirià uzegar a'e
19 Izaew izuapyapyr wahaw yryhu ywy ikàg ma'e rehe wata pà wà. Kawaru Parao ima'e a'e wà, ywyramawa Parao ima'e a'e wà no, zauxiapekwer kawaru kupe pe har a'e wà no, iho wer zepe wanaikweromo yryhu rupi a'e wà. Tupàn Tuweharupi Wiko Ma'e weruzewyr 'y wa'aromo a'e. 'Y upyk a'e wà.
20 Na'e amo kuzà Tupàn ze'eg imume'u har Mirià her ma'e a'e, Àràw heinyr a'e, upyhyk amo maraka opo pe a'e kury. Amogwer kuzà upyhyk maraka'i a'e wà no, upynyk pà izàwegatete a'e wà no. 21 Nezewe uzegar Mirià.
Zazegar Tupàn Tuweharupi Wiko Ma'e pe nehe.
Ta'e wiko ywate a'e 'y.
Weityk kawaru a'e wà.
Weityk ikupe pe har a'e wà no.
Yryhu pupe waneityk pà a'e wà.
'Y iro ma'e
22 Na'e Moizez weraha Izaew izuapyapyr Yryhupiràg wi a'e wà kury. Wata oho ywyxiguhu Xur her ma'e rehe wà. Umumaw na'iruz 'ar ywyxiguhu rehe wata pà wà. Nuexak kwaw 'y wà. 23 Mara pe uhem mehe nupuner kwaw 'y a'e pe har i'u haw rehe wà, ta'e iroahy a'e xe. A'e rupi Mara i'i teko izupe wà. — Iro, i'i her zaneze'eg rupi. 24 A'e rupi teko uze'egahy Moizez pe wà. — Ma'enugar 'y pupe urui'u putar nehe, i'i izupe wà.
25 Uze'eg Moizez Tupàn Tuweharupi Wiko Ma'e pe uwahy haw rupi kury. Tupàn Tuweharupi Wiko Ma'e wexak kar amo ywyra hàkàgwer Moizez pe. Weityk Moizez ywyra hàkàgwer 'y pupe. Hete katu 'y kury. A'e pe Tupàn Tuweharupi Wiko Ma'e omono amo uze'eg wanupe. Umume'u wemimutar wanupe. Wagaw Tupàn Izaew izuapyapyr a'e pe wà. 26 Uze'eg nezewe wanupe. — Ihe Tupàn Tuweharupi Wiko Ma'e pezar romo aiko ihe. Apuraraw kar ma'eahy haw iaiw ma'e Ezit ywy rehe har wanupe ihe. Aze pezeapyaka katu heze'eg rehe nehe, aze pezapo heremimutar nehe, aze penu heremimume'u ràm nehe, napuraraw kar kwaw agwer ma'eahy haw peme ihe nehe. Ta'e pezar romo aiko ihe xe. Ta'e pemukatu har romo aiko ihe xe, i'i Tupàn teko wanupe.
27 Na'e uhem Erim pe a'e wà kury. Heta 12 ytyzuzàmaw a'e pe wà. Heta 70 ma'e'yw inaza 'yw zàwenugar a'e pe wà no. Uzapo upytu'u haw uker haw a'e pe 'y huwake wà.