2 O Tupàn Tuweharupi Wiko Ma'e.

Tuweharupi aze'eg newe urepytywà àwàm henoz pà newe.

Aipo nereinu kwaw heze'eg.

Màràn mehe urepytywà putar nehe. — Puruzuka haw, a'e newe tuweharupi.

Màràzàwe na'urepyro kwaw pe nehe.

3 Màràzàwe tuwe erexak kar ikatu 'ym ma'e tetea'u ihewe.

Màràzàwe tuwe nerezekaiw kwaw ikatu 'ym ma'e iapo haw rehe.

Ma'emumaw paw umàmàn wà heywyr. Puruzuka haw umàmàn wà heywyr no.

Taw nànàn teko uzeàmàtyry'ym wà. Heta zeàmàtyry'ymaw ywy nànàn.

4 A'e rupi ni amo teko nuweruzar kwaw neze'eg wà.

Ikatu haw nuweityk pixik kwaw ikatu 'ymaw.

Ikatu 'ym ma'e ikàg wera'u ikatu ma'e wanuwi wà.

Umuaiw ikatu haw wà.

5 Tupàn Tuweharupi Wiko Ma'e uze'eg wemiaihu wanupe.

— Peme'e teko ywy peiwyr huwake har wanehe nehe. Pepytuhegatu pezemukuhem wanexak mehe nehe no.

Ta'e napezeruzar kwaw heremiapo ràm

ko 'ar rehe har rehe nehe xe.

Aze mo amo umume'u peme wà, nezewe rehe we napezeruzar iwer mo waze'eg rehe.

6 Amuryryw kar Mawiron pe har wanereko ihe wà kury.

Teko puruzuka ma'e romo wanekon wà. Upuraraw kar ma'erahy amo teko wanupe wà.

Wyzài 'ar mehe iporomono wer zauxiapekwer wanehe ywy nànàn wà,

amo teko waiwy ipyro pà uzeupe wà.

7 Teko ywy nànànar ukyze katu wanuwi wà. Ukyze katu wera'u wanuwi wà.

Weruzar kar uze'eg teko paw wanupe wà. Uzapo kar ma'e amo wanupe uze'eg rupi katete wà.

8 Waneimaw kawaru uzàn wera'u zàwàruhu ereopar her ma'e wanuwi wà.

Hehaite wera'u awarahu ywyxiguhu pe har wanuwi wà.

Zauxiapekwer kawaru ku'az har ur waiko weimaw waku'az wà.

Uzàn wà waiko muite wi wà.

Na'arewahy wiràhu u'ar wemiar rehe.

Na'arewahy zauxiapekwer ur wiràhu ài wà.

9 Zauxiapekwer ur waiko wà.

Ipuruzuka wer wàmàtyry'ymar wanehe na'arewahy wà.

Wanur mehe umuhàmuhàz kyze haw oho waiko wà.

Heta tetea'u wanemipyhyk kwer wà.

Waneta haw nuzawy kwaw ywyxiguhu yryhu izywyr har waneta haw wà.

10 Zauxiapekwer Mawiron pe har uze'eg urywahyahy tuwihawete wanehe wà.

Uze'eg zemueteahy amogwer tuwihaw wanehe wà no.

Upuka tàpuzuhutàtà rehe wà.

Uzapo uzeupir àwàm tawhu pàrirogaw rehe har wà. Wixe tawhu pupe ipyro pà wà.

11 A'e re oho wi uzenataromo amo tawhu pe wà no. Nuzawy kwaw ywytu kwe rupi ukwaw ma'e wà.

Numuwete katu kwaw amo tupàn wà. Xo ukàgaw zo umuwete katu wà.

12 O Tupàn Tuweharupi Wiko Ma'e. Tuweharupi ereikuwe ne.

O hezar ikatuahy ma'e. Neremàno pixik kwaw nehe.

Ereiko urepyro har romo. O Tupàn Tuweharupi Wiko Ma'e.

Erexarexak Mawiron pe har ne wà.

Eremono nekàgaw wanupe. A'e rupi upuner urerehe uzepykaw rehe wà nehe.

13 Màràzàwe tuwe nerezuka kwaw a'e teko ne wà. Hemu'em teko wanupe wazuka pà wà. Iaiw ma'e romo wanekon wà.

Nereha ikatuahy. Màràzàwe tuwe ereme'e agwer iaiw ma'e rehe.

Aze erexak teko ikatu 'ym ma'e iapo mehe wà, erekwahy wanehe ne.

A'e rupi apuranu nerehe kury. Mawiron pe har uzuka amo teko uzewi ikatu wera'u ma'e wà.

Màràzàwe tuwe nereze'eg kwaw wazuka mehe ne.

14 Màràzàwe tuwe erereko teko pira zàwe ne wà.

Nuzawy kwaw ma'ea'yr uzehe uzekaiw 'ym ma'e wà.

15 Mawiron pe har upyhyk amo teko wà.

Wapyhykaw nuzawy kwaw ipira pyhykaw wanupe.

Upurupyhyk upina pupe ukyhapari pupe wà.

Wenuhem 'y wi katu pe wà.

Hurywete Mawiron a'e pe wà. — Ikatuahy aipo pa, i'i uzeupeupe wà.

16 Wakyhapari nuzawy kwaw tupàn a'ua'u wanupe wà. Uzuka ma'ea'yr wanenataromo wà.

Omono imono pyr upina pe wà no.

Ta'e a'e ma'e umuigo kar pira pyhykar hemetarer katu ma'e romo a'e wà xe.

A'e rupi heta tetea'u wanemi'u ràm wanupe.

17 Aipo Mawiron pe har nupytu'u pixik kwaw amo teko wàmàtyry'ym ire wà nehe.

Aipo uzuka wiwi putar teko wà nehe, wapuhareko 'ym pà wà nehe.