1 Amuzàg putar amo zegar haw hemyrypar pe kury,

hemitygwer uwà tyw rehe kury.

Hemyrypar uzutym uwà

'yw ywy katu haw rehe.

2 Uhàwykàz ita henuhem pà.

Uzutym uwà 'yw ikatu wera'u ma'e.

Ko myter pe uzapo tàpuz ime'egatu haw iaiha ma'e no.

Uzapo kawawhu uwà imuy'e haw romo no.

Wàro uwà 'yw i'a katu haw.

Xo uwà hazahy ma'e zo hezuz zepe a'e pe.

3 Na'e hemyrypar uze'eg nezewe kury.

— Zeruzarez pe har wà. Zuta ywy rehe har wà.

Aipo ihe amuazahy kar uwà. Aze ru'u, aipo a'e ae hazahy.

4 Azapo ikatu ma'e paw izupe hepuner haw rupi ihe.

Màràzàwe tuwe i'a kwer hazahy.

Àro uwà hete katu ma'e. Màràzàwe tuwe i'a kwer nahete katu kwaw.

5 Amume'u putar heremitygwer uwà tyw pe heremiapo ràm ihe kury.

— Azo'ok putar pari a'e wi nehe.

Aityk putar pàrirogaw imunar ma'e wamunyryk kar haw nehe no.

Amuixe kar putar ma'ea'yr heko pe wà nehe.

Amumaw kar putar uwà rupaw nehe.

6 Kukwer romo uzeapo putar nehe.

Ni amo nomonohok kwaw hàkà ikatu 'ym ma'e wà nehe. Ni amo nuweruwaruwak kwaw ywy wà nehe.

Ka'a hezuz putar a'e pe xu rehe we nehe.

Aze'eg putar ywàkun pe nehe.

— Emugyr kar zo àmàn heko rehe nehe, a'e putar izupe nehe.

7 Tupàn Tuweharupi Wiko Ma'e Ikàg Wera'u Ma'e iko uwà tyw izar ài,

uwà Tupàn hemimutar a'e,

wiko Izaew romo teko Zuta ywy rehe har romo a'e.

Tupàn weruzar kar uze'eg wanupe.

Nuweruzar kwaw wà. Iaiw ma'e uzapo upuruzuka pà wà.

Wàro ikatu ma'e wanemiapo,

nuexak kwaw. Xo umàno etea'i ma'e wanehapukaz taw zo wenu a'e. — Urepytywà pe nehe, i'i wà.

8 Pezemumikahy nehe, tàpuz tetea'u ime'eg kar har wà.

Tupàn uzepyk putar penehe a'e nehe, ywy pehegwer tetea'u izar wà.

Nan kwehe tete naheta kwaw waneko haw amogwer wanupe nehe.

Xo pe zo peiko putar ko ywy rehe nehe.

9 Aenu Tupàn Tuweharupi Wiko Ma'e Ikàg Wera'u Ma'e ize'eg mehe.

— Aityk putar tàpuzuhu uhua'u ma'e ihe wà nehe. Aityk putar tàpuzuhu ipuràg eteahy ma'e ihe wà nehe no.

Ni amo nuiko kwaw wapupe wà nehe.

10 Uwà tyw mokoz inemo hereko har

omono putar ru'u xo 20 zutahyky'a por win zo a'e nehe.

100 kir ma'eà'yz

omono putar xo 10 kir arozràn nehe.

11 Pezemumikahy nehe, 'ar nànàn kàwiràn i'u har wà.

'Ar katu mehe uwà tykwer win i'u har wà. Pezypyrog izi'itahy. Xo pyhaw zo pepytu'u i'u re.

Peka'u azeharomoete.

12 Pepynykaw pe heta zegar haw wioràwiràn rehe we har.

Heta imupu pyr. Heta xi'àm.

Heta tetea'u win i'u pyràm no.

Napezekaiw kwaw Tupàn Tuweharupi Wiko Ma'e hemiapo ràm rehe.

Napezekaiw kwaw hemiapo ko 'ar rehe har rehe no.

13 Nahereruzar kwaw heremiaihu wà.

A'e rupi amo zauxiapekwer weraha putar heremiaihu waiwy wi wà nehe.

Teko a'e wà nehe, wanuwihaw a'e wà nehe no, umàno putar uma'uhez pà wiwez tà a'e wà nehe no.

14 Umàno ma'e kwer wapyta haw nuzawy kwaw zàwàruhu ima'uhez ma'e nehe.

Uzurupeka putar a'e teko wamokon pà wanuwihaw wamokon pà nehe.

A'e teko wiko upynyk pà uka'u pà wà.

Wiko iaiw ma'e iapo pà wà no.

15 Imaranugar putar upaw rupi wà nehe.

Wiko wera'u ma'e wiko putar ikàg 'ym ma'e romo wà nehe.

16 Tupàn Tuweharupi Wiko Ma'e Ikàg Wera'u Ma'e uzapo putar ikatu ma'e a'e nehe.

Nezewe mehe wexak kar putar uhua'u haw ikatuahy haw rehe we purupe nehe.

Tupàn uzapo xo ikatu ma'e zo a'e, ikatu 'ym ma'e iapo pixik 'ym pà teko wazàwe a'e.

Nezewe mehe teko paw ukwaw putar ikatuahy haw wà nehe.

17 Tawhu paw uzeapo putar ma'e ikaika pyrer romo wà nehe.

Àràpuhàràn hawitu ma'e wexak putar ka'api'i amo àràpuhàrànetea'yr wanehe we a'e pe wà nehe.

18 Tupàn uzepyk putar ikatu 'ym ma'e wi utyryk 'ym ma'e hemu'em ma'e wanehe nehe.

Werupuze ukatu 'ymaw heraha hereko uwyramawa ài wà.

19 Uze'eg nezewe wà. — Tuwe Tupàn uzapo wemiapo ràm na'arewahy nehe.

Nezewe mehe xikwaw putar hemiapo ràm nehe.

Tuwe Tupàn Izaew Wazar Ikatuahy Ma'e uzapo wemiapo putar haw nehe.

A'e rupi xikwaw putar nehe, i'i wà.

20 — Na'ikatu kwaw a'e, aze amo i'i ikatu ma'e rehe nehe, Tupàn uzepyk putar hehe nehe.

— Ikatu a'e, aze amo i'i ikatu 'ym ma'e rehe nehe, Tupàn uzepyk putar hehe nehe no.

Agwer teko uzapo tatainy ipytunahy haw romo wà,

uzapo ipytunahy haw tatainy romo wà no.

Uzapo iro ma'e hete katu ma'e romo wà,

uzapo hete katu ma'e iro ma'e romo wà no.

21 Amo teko uzemume'u ma'ekwaw katu har romo wà. Tupàn uzepyk putar wanehe nehe.

— Ma'e paw kwaw katu har romo aiko azeharomoete ihe, aze amo teko i'i uzeupe wà nehe, Tupàn uzepyk putar a'e ma'e imume'u arer wanehe nehe.

22 Tupàn uzepyk putar win i'u wera'u har wanehe nehe.

Uzepyk putar kàwiahy tetea'u i'u har wanehe nehe no.

23 Aze amo tuwihaw upyhyk temetarer wemu'em àwàm hekuzaromo nehe, Tupàn uzepyk putar hehe nehe.

Agwer tuwihaw umuhem kar ikatu 'ym ma'e iapo har zemunehew paw wi wà. Uzepyk ikatu 'ym ma'e iapo pixik 'ymar wanehe no.

24 Tata wapy ka'axinig.

Tata heny kwer umumaw ka'api'i.

Nezewegatete pekàzym putar upaw rupi nehe.

Peiko putar ywyra hapo ipuga ma'e kwer ài nehe.

Ywytu weraha ma'eputyr ywyra wi ywyku'i kwer ài a'e.

Naperuzar kwaw Tupàn Tuweharupi Wiko Ma'e Ikàg Wera'u Ma'e ize'eg.

Napezekaiw kwaw Izaew Wazar Ikatuahy Ma'e hemiapo karer rehe.

25 A'e rupi Tupàn Tuweharupi Wiko Ma'e wikwahy wemiaihu wanupe.

Upyho opo wanehe uzepyk pà.

Ywytyruhu uryryryryz wà.

Zauxiapekwer wezar umàno ma'e kwer wanetekwer nahu rupi heityk pyrer ài wà.

Nezewe rehe we Tupàn ikwahy haw nupytu'u kwaw.

Upyho opo iko wanehe uzepyk àwàm rehe rihi.

26 Tupàn Tuweharupi Wiko Ma'e upir pàn uwer hereko har.

Wenoz amo ywy muite har rehe har wamuwà wà.

Utymyze'eg a'e teko muite har wamur kar pà.

Uzàn wà na'arewahy wà.

27 Ni pitài zauxiapekwer a'e ywy rehe har na'ikene'o kwaw wà. Ni pitài zauxiapekwer a'e ywy rehe har nuzepyapi kwaw wà.

Nupytu'u kwaw wà. Nuker kwaw wà.

Uzemuàgà'ym amo wàmàtyry'ym pà wà.

Uzeku'apixi haw umumykahy uzehe wà.

Waxapat ihàm nuzemonohok kwaw.

28 Wanu'yw hakwa katu.

Uhyk waywyrapar ma'ezywà àwàm rehe.

Waneimaw kawaru wapyàpe tàtàahy ita ài wà.

Ywyramawa iapu'a ma'e nuzawy kwaw ywytu uzewara ma'e.

29 A'e zauxiapekwer okororo zàwàruhu iriàw her ma'e ài wà,

zàwàruhu ipuruzukaiw ma'e miar izuka har ài wà.

Upuze wemizuka kwer imonokatu àwàm me uzemuakyr pà wà.

Ni amo nupuner kwaw hemizuka kwer ipyro haw rehe izuwi wà nehe.

30 A'e 'ar ihem mehe

a'e teko wànoànog putar yryhu ài

Izaew wanehe ipuràmàtyry'ym wer pà wà nehe.

Aze amo ume'e ywy rehe wà nehe,

xo ipytunahy haw zo wexak putar wà nehe. Wexak putar zemumikahy haw wà nehe.

Wexak putar ywàkun ipihun ma'e tatainy ipykaw wà nehe.