Zauxiapekwer weityk Ar tawhu imumaw pà wà.

Xo pitài 'ar mehe pyhaw zo umumaw ikaika haw wà.

Umumaw Kir tawhu wà no.

Xo pitài 'ar mehe pyhaw zo umumaw wà.

2 Nimon tawhu pe har uzai'o putar

ywy uzar pe imonokatu pyrer ywytyr rehe har pe wà nehe.

Moaw izuapyapyr uzai'o a'e wà no ta'e zauxiapekwer weityk New tawhu wà xe, weityk Menew tawhu wà no.

Upin u'aw uzemumikahy haw hexak kar pà wà. Upin wamutaw wà no.

3 Wata oho waiko nahu rupi pàn iànàm ma'e ma'eryru iapo pyr ukamir romo wà, uzemumikahy haw hexak kar pà wà.

Uhapukaz tuwe uzai'o pà nahu rupi wà, wàpuz 'aromo har imuàtà pyrer rehe wà no.

4 Ezemon tawhu pe har wà, Ereaw tawhu pe har wà no, uhapukaz wahy romo wà.

Te Zaza tawhu pe har wenu wanehapukaz mehe wà.

Zauxiapekwer Moaw izuapyapyr uzypyrog ukyze pà wà.

Uryryryryz ukyze pà wà.

5 Azai'o Moaw wanehe ihe.

Teko uzàwehem oho Zoar tawhu pe wà, Ekirat-Xerizi tawhu pe wà no.

Amo uzeupir Iruwi tawhu pe uzai'o pà wà.

Amo uzàwehem oho Oronai tawhu pe wahy haw rehe uhapukaz pà wà.

6 Yrykaw Niri her ma'e typaw a'e kury.

Ka'api'i waneimaw wanemi'u uxinig a'e no.

Ka'a uxinig no.

Naheta kwaw ikyr katu ma'e wà kury.

7 Teko Moaw izuapyapyr uzàwehem oho yrykaw Xawkez her ma'e hahaw pà wà.

Weraha uma'e paw uzeupi wà.

8 Uzenu teko wanehapukaz mehe Moaw ywy nànàn wà, ta'e upuraraw ma'erahy tetea'u wà xe.

Egaraim tawhu pe har wazai'o haw wànoànog. Meereri tawhu pe har wazai'o haw wànoànog no.

9 Yrykawhu Nimon tawhu huwake har tynehem tuwykwer pupe a'e.

Tupàn uzapo putar amo iaiw wera'u ma'e Nimon pe har wanupe nehe kury.

Omono kar putar zàwàruhu iriàw tetea'u a'e pe wà nehe.

U'u putar zàwàruhu Moaw ywy rehe har wikuwe ma'e a'e wà nehe.