1 Yrykawhu Exio ywy rehe har iwyr har upuraraw putar tuwe ma'erahy wà nehe.

Teko wenu meru tetea'u wànoànogaw a'e pe wà.

2 A'e ywy rehe har umur kar uze'eg herur har zanewe wà.

Wezyw oho yrykawhu Niru her ma'e rupi kanuhu ka'api'i popok iapo pyrer pupe wà.

Ze'eg herur har uzàn ma'e wà, pezewyr peywy rehe nehe.

Pezewyr peànàm ikàg ma'e upuner ma'e wanupe nehe.

Iaiha katu a'e peànàm wà. Heny katu wapir.

Amogwer teko ywy nànànar ukyze wanuwi wà.

Wiko ywy yrykawhu tetea'u heta haw rehe wà.

3 Pezeapyaka katu nehe, teko ywy nànànar wà,

ywy nànàn wiko ma'e paw wà:

Pexak pànuhu tuwihaw her hereko har nehe. Zauxiapekwer upir putar ywytyruhu rehe wà nehe.

Penu xi'àm ma'ea'yr i'ak kwer iapo pyrer ipy mehe nehe, zeàmàtyry'ymaw ihemaw imume'u pà nehe.

4 Ta'e Tupàn Tuweharupi Wiko Ma'e uze'eg nezewe ihewe a'e xe.

— Hereko haw pe ywak rehe hereko mehe ame'e putar ywy rehe ihe nehe.

Kwarahy uhyape katu àmàkyr 'ym mehe a'e.

Zuwiri uzexak kar arozràn po'o haw 'ar mehe a'e. Nezewegatete ama'ereko heànoànog 'ym pà ywak rehe ihe, i'i Tupàn.

5 Uwà iputyr u'ar putar amo 'ar mehe nehe.

Uwà ityàro etea'i putar nehe.

Ipo'o 'ym mehe we

Tupàn omonohok putar i'yw hàkà utakihepuku pupe a'e nehe.

Imonohok ire weityk putar hàkàgwer nehe.

6 Zauxiapekwer weityk putar zauxiapekwer umàno ma'e kwer wanetekwer a'e wà nehe.

Kwarahy mehe apitaw u'u putar wano'o kwer wà nehe.

Àmàkyr mehe miar hehaite ma'e u'u putar wanetekwer wà nehe.

7 A'e 'ar mehe teko wapy putar ma'ea'yr Tupàn Tuweharupi Wiko Ma'e henataromo a'e wà nehe.

A'e teko wiko ukyze 'ym ma'e romo wà, ikàg ma'e romo wà.

Iaiha katu wà. Heny katu wapir wà.

Teko ywy nànànar ukyze a'e teko wanuwi wà.

Wiko ywy yrykawhu tetea'u heta haw rehe wà.

Omono putar wemimono Tupàn pe Xiàw ywytyr rehe wà nehe.

Omono putar ma'e izupe imono pyr hàpuzuhu pupe wà nehe. Teko umuwete katu Tupàn Tuweharupi Wiko Ma'e Ikàg Wera'u Ma'e a'e tàpuzuhu pupe a'e wà.