Tawhu zanereko haw ikàg a'e.

Tupàn uzekaiw katu tawhu rehe pàrirogaw aiha pupe a'e.

2 Pewàpytymawok tawhu hukenaw nehe.

Tuwe Tupàn rehe uzeruzar tuwe ma'e wixe wà nehe.

Tuwe teko ikatu ma'e iapo har wixe wà nehe.

3 Ne Tupàn Tuweharupi Wiko Ma'e ne, eremur zeàmàtyry'ym 'ymaw urewe. Aze amo teko uzeruzar nerehe nehe, aze a'e re nanereityk kwaw nehe, eremuigo kar putar a'e teko zeàmàtyry'ym 'ymaw rehe nehe.

Uhyk putar ima'e izupe nehe.

Uhyk putar hemi'u izupe nehe no.

4 Ezeruzar Tupàn Tuweharupi Wiko Ma'e rehe tuweharupi nehe

ta'e wiko putar zanemimaw romo tuweharupi a'e nehe xe.

5 Tupàn umuigo kar wiko wera'u ma'e hemetarer 'ym ma'e romo wà.

Upyro tawhu waneko haw ikàgaw izuwi no.

Weityk tawhu. Umumaw waneko haw ikaika pà no.

6 Ko 'ar rehe hemetarer 'ym ma'e a'e wà, ma'e hereko 'ymar a'e wà no, upyrog tàpuz heityk pyrer wanehe a'e wà kury.

7 Aze teko uzapo ikatu ma'e wà, waneko haw nuzawy kwaw pe ikatu ma'e rupi waho haw.

Ne Tupàn Ikatuahy Ma'e ne, eremuhygatu wanape ràm wanupe ne.

8 O Tupàn Tuweharupi Wiko Ma'e, neze'eg nuzawy kwaw urerape urewe. Uruata hupi.

Nerehe uruzeruzar.

Urepurukwaw wer nerehe. Urepurukwaw wer tuwe nerehe ure.

Urema'enukwaw wer nerehe.

9 Aputar herehe we nereko haw pyhaw azeharomoete ihe.

Azeagaw tuwe neremiapo putar haw ikwaw pà azeharomoete.

Eremume'u putar teko ywy rehe har wanemiapo kwer nehe.

A'e 'ar mehe uzemu'e putar nekatu haw rehe wà nehe.

Ukwaw putar wà nehe.

10 Aze erepuhareko teko ikatu 'ym ma'e ne wà nehe,

A'e mehe mo nuzemu'e iwer mo ikatu ma'e iapo haw rehe wà.

Ko ywy rehe teko ikatu wà.

Nezewe rehe we uzapo wiwi ikatu 'ym ma'e oho waiko wà.

Nuzekaiw kwaw Tupàn Tuweharupi Wiko Ma'e uhua'u haw rehe wà.

11 O Tupàn Tuweharupi Wiko Ma'e, ereupir nepo teko wanehe nezepyk pà.

Nezewe rehe we neàmàtyry'ymar nuzekaiw kwaw nerehe wà.

Erezamutar katu neremiaihu ne wà. Amogwer teko wexak putar wamutar katu haw wà nehe.

Hexak mehe imaranugar putar wà nehe.

Tuwe nekwahy haw wapy a'e teko tata ài wà nehe.

12 O Tupàn Tuweharupi Wiko Ma'e, eremuhyk ma'e teko wanupe.

Ureremiapo kwer paw erezapo kar urewe ne.

13 O Tupàn Tuweharupi Wiko Ma'e urezar,

amo teko ywy rehe har wazar a'e wà wiko urezar romo a'e wà. Tupàn a'ua'u uzeapo urezar romo wà no.

Ko ma'e urumume'u putar newe kury. Xo ne zo ereiko urezar romo ne.

14 A'e teko umàno wà. Nuzewyr kwaw wikuwe wi pà wà nehe.

Nuzawy kwaw ma'e 'àgaw wà. Nukweraw wi pixik kwaw wà nehe ta'e erezepyk wanehe ne xe.

Eremumaw ne wà.

Ni amo na'ima'enukwaw kwaw wanehe ko 'ar rehe wà.

15 Ne Tupàn Tuweharupi Wiko Ma'e, uremueta tetea'u wera'u pe ne.

Eremuhua'u wera'u ureywy no.

A'e rupi teko ukwaw nekàgaw wà kury.

16 Erezepyk neremiaihu wanehe, o Tupàn Tuweharupi Wiko Ma'e.

Ma'erahy ipuraraw mehe uruze'eg newe.

17 Kuzà uwauwak wahy haw rehe

heiheihem pà umemyrzexak kar mehe.

Nezewegatete urupuraraw nezepykaw ure no, o Tupàn Tuweharupi Wiko Ma'e.

18 Kuzà imemyrahy ma'e ài uruiko urewarewak pà ure.

Nuzexak kar kwaw urememyr. Nuruexak kar kwaw kwarera'i.

Ni pitài haw nuruityk kwaw ureàmàtyry'ymar wà.

Nurumueta wera'u kwaw teko ureywy rehe wà.

19 Teko ureinuromo har umàno ma'e kwer uzewyr putar wikuwe wi pà wà nehe.

Wanetekwer ukweraw wi putar wà nehe.

Umàno ma'e kwer wapyta haw pe har

ume'e putar urywete haw rupi uzegar pà wà nehe.

Eremur kar zuwiri ywy rehe,

nezewegatete umàno ma'e kwer uhem putar ywy wi wikuwe wi pà wà nehe.

20 Heremiaihu wà, peho peneko haw pe penàpuz iwàpytym pà nehe.

Pemumaw amo zahy pezeàmim pà nehe.

Tupàn wikwahy teko wanemiapo kwer rehe a'e. A'e rupi uzepyk iko wanehe. Xo ipytu'u paw ire pehem wi nehe.

21 Tupàn Tuweharupi Wiko Ma'e ur putar weko haw ywak rehe har wi a'e nehe,

ywy rehe har wanehe uzepyk pà wanemiapo kwer ikatu 'ym ma'e hekuzaromo nehe.

Ta'e Ywy numim kwaw izuka pyrer wà nehe xe.

Teko ukwaw putar puruzuka awer paw wà nehe.