1 Mokoz tupàn a'ua'u uzepepog wenaw wi ywy rehe u'ar pà a'e wà. Mew tupàn ua'u ipy her romo a'e. New inugwer her romo a'e.

Teko upir a'e tupàn a'ua'u wanagapaw kawaru wakupe pe wà.

Ipuhuz katu wà. Ikene'o kawaru wà.

2 Tupàn a'ua'u uzepepog u'ar pà wà.

Nupuner kwaw uzepyro haw rehe wà.

Teko a'e teko tupàn wamuwete har waàmàtyry'ymar a'e wà, weraha tupàn a'ua'u a'e wi wà.

3 Pezeapyaka katu nehe, teko Izaew wà.

Pezeapyaka katu nehe, Zako izuapyapyr umàno 'ym ma'e wà.

Pezexak kar awer 'ar henataromo apueraha ihe.

Tuweharupi azekaiw penehe.

4 Petua'uhez mehe aiko tuwe nezewegatete nehe. Naiko kwaw amo ae romo nehe.

Azekaiw putar penehe pe'aw xig mehe nehe.

Apuapo ihe. Apueraha no.

Apupytywà putar nehe. Apupyro putar nehe no.

5 Mo izàwe aiko ihe.

Mo wiko hezàwe a'e.

6 Amo teko omono'og itazu or tetea'u wà.

Omono'og itaxig parat tetea'u wà no.

Omono temetarer ma'eragapaw iapo har pe wà.

— Epyhyk ko or nehe. Epyhyk ko parat nehe.

Ezapo amo tupàn ua'u hagapaw nehe, i'i izupe wà.

A'e re uzeamumew upenàràg rehe a'e tupàn ua'u henataromo imuwete katu pà wà.

7 Na'e upir hagapaw ukupe pe heraha pà wà.

Umuapyk henaw rehe wà.

Tupàn a'u upyta a'e pe. Nupuner kwaw uzemumyz haw rehe.

— Urepytywà pe nehe, aze i'i teko izupe wà, nuenu kwaw waze'eg a'e.

Nupuner kwaw waneko haw zawaiw katu ma'e wi wapyro haw rehe.

8 Ikatu 'ym ma'e iapo har wà, pema'enukwaw ko ma'e rehe nehe.

Pema'enukwaw katu ma'e rehe nehe. Peiko ma'e kwaw katu har romo nehe.

9 Pema'enukwaw ma'e kwehe mehe uzeapo ma'e kwer rehe nehe.

Xo ihe zutyka'i aiko Tupàn romo ihe. Pekwaw hereko haw.

Naheta kwaw amo hezàwenugar.

10 Izypy mehe arer we amume'u uzeapo ma'e ràm ihe.

Kwehe mehe amume'u ma'e uzeapo ma'e ràm.

— Uzeapo putar ma'e heze'eg rupi katete nehe, a'e purupe.

Aze hepurapo wer ma'e rehe nehe, azapo putar a'e ma'e nehe, a'e purupe kwehe mehe.

11 Aenoz amo awa tekoko ihe. — Ezur kwarahy hemaw wi nehe, a'e tekoko izupe.

Ur iko na'arewahy ywy muite har wi wiràhu ài.

Uzapo putar ma'e heremiapo kar nehe.

Azapo putar ma'e heze'eg awer rupi katete nehe.

Azapo putar heremimume'u kwer nehe.

12 Teko Tupàn heruzar 'ymar wà, pezeapyaka katu xe nehe.

— Urepyro àwàm iàrew putar nehe, peze peiko.

13 Amuhem kar putar purupyro haw heremimume'u kwer

na'arewahy ihe nehe.

Nan kwehe tete aityk putar heàmàtyry'ymar ihe wà nehe.

Apyro putar Xiàw rehe wiko ma'e ihe wà nehe.

Amuza'aza'ak hekàg wera'u haw ipehegwer imono pà teko Izaew wanupe nehe,