1 Tupàn Tuweharupi Wiko Ma'e uze'eg wemiaihu wanupe.

— Peiko katu haw rehe nehe.

Pezapo ikatu ma'e nehe.

Nan kwehe tete apupyro putar nehe, hekàgaw purupyro ma'e hexak kar pà nehe.

2 Ze'eg mytu'u haw 'ar rehe har heruzar har hurywete putar wà nehe.

Hurywete putar ikatu 'ym ma'e iapo 'ymar wà no.

3 Tuwe amo ywy rehe har Tupàn Tuweharupi Wiko Ma'e imuwete har

nuze'eg kwaw nezewe nehe. — Tupàn hemuhem kar putar wemiaihu wanuwi a'e nehe, tuwe ni'i kwaw nehe.

Tuwe awa wa'yr haw rehe upuner 'ym ma'e nuze'eg kwaw nezewe uzeupe nehe.

— Napuner kwaw hera'yr haw rehe ihe,

a'e rupi naiko kwaw Tupàn hemiaihu romo ihe, tuwe ni'i kwaw nehe.

4 Tupàn Tuweharupi Wiko Ma'e uze'eg nezewe a'e awa wanupe a'e.

— Peruzar heze'eg mytu'u haw 'ar rehe har nehe.

Pezapo hemurywete kar haw nehe.

Pezuhaw zo heze'egaw nehe.

5 Aze amo agwer awa uzapo nezewe haw nehe,

izupe heremimono ràm ikatu wera'u putar ta'yr wi izupe nehe, tazyr wi izupe nehe no.

Amuapyk kar putar her heràpuzuhu rehe nehe.

Wiko putar heremiaihu wainuromo har romo tuweharupi nehe.

Teko naheharaz pixik kwaw her wi a'e wà nehe.

6 Tupàn Tuweharupi Wiko Ma'e uze'eg nezewe amo ywy rehe har Tupàn Tuweharupi Wiko Ma'e imuwete har wanupe,

iamutar katu har wanupe, hemiapo putar haw tuweharupi iapo har wanupe.

— Aze peruzar ze'eg mytu'u haw 'ar rehe har nehe,

aze napezuhaw kwaw heze'egaw nehe,

Penurywete putar heràpuzuhu pupe nehe, ihewe teko waze'egaw pupe nehe.

Pepuner putar ma'ea'yr hapy haw rehe heruwa rupi nehe.

Pepuner ma'e imur haw rehe ihewe nehe, ma'ea'yr hapy haw rehe penemimono imur haw rehe ihewe nehe.

— Teko ywy nànànar Tupàn pe waze'egaw a'e,

i'i putar teko heràpuzuhu pe wà nehe.

8 Arur putar amo teko Izaew ywy rehe ihe wà nehe.

Amono'og putar a'e teko heremiaihu heremimuzewyr karer wainuinuromo ihe wà nehe.

Nezewe uze'eg zanezar Tupàn Tuweharupi Wiko Ma'e.

A'e ae weruzewyr wemiaihu Izaew ywy rehe wà.

Amo ae ywy rehe ipyhyk pyrer romo wanekon a'e wà.

9 Tupàn Tuweharupi Wiko Ma'e uze'eg nezewe.

— Pezur nehe, miar hehaite ma'e wà.

Pe'u hereimaw pezuwà nehe.

10 Heremiaihu wanehe uzekaiw ma'e nahehàpyhà kwaw wà.

Nuexak kwaw ma'e wà.

Paw rupi nuzawy kwaw zawar uze'eg 'ym ma'e wà. Wiko zawar heihemaw rehe upuner 'ym ma'e ài wà.

Tuweharupi u'ar uker pà wà.

A'e uzekaiw ma'e iranahy wà. Uker tuweharupi wà. Upuahu tetea'u wà no.

11 'Aw zawar zàwenugar umai'u tetea'u ma'e romo wanekon wà.

Tuweharupi uputar amo wemi'u ràm wà.

Hereimaw wamono'ogar nukwaw kwaw ma'e wà.

Pitàitàigatu oho wape rupi wà.

Xo uma'e rehe zo ima'enukwaw wà.

12 Uze'eg nezewe uzeupeupe wà.

— Xikar win nehe. Xikar kàwiahy nehe no.

Zaka'u tuwe nehe.

Pyhewe xiapo wi wi nezewe haw nehe no.

Tuwe pyhewe zaneka'u àwàm uhua'u wera'u kutàri zaneka'u awer wi a'e nehe: i'i wà,