1 Uze'eg Tupàn Tuweharupi Wiko Ma'e.

— Ehapukaz wahy haw rupi nehe, nepytu'u 'ym pà nehe.

Ehapukazahy xi'àm tapi'ak i'ak kwer iapo pyrer izupy har ài nehe.

Heremiaihu wanupe Zako izuapyapyr wanupe emume'u

wanemiapo kwer ikatu 'ym ma'e nehe, wakatu 'ymaw imume'u pà nehe.

2 Azeharomoete hemuwete katu tuweharupi a'e wà.

— Urepurukwaw wer neremiapo putar haw rehe ure, i'i ihewe wà.

Uze'eg waiko teko ikatu ma'e iapo har ài wà,

heze'eg ihaw 'ymar ài wà.

— Emur neze'eg ikatu ma'e urewe nehe, i'i ihewe wà.

Ipurumuwete wer herehe tuweharupi wà, i'i Tupàn.

3 Teko upuranu Tupàn rehe wà.

— Màràzàwe tuwe urumumaw amo 'ar uremai'u 'ym pà urezekwaku pà nemuwete pà ure. Nereme'e kwaw ureremiapo rehe.

Màràzàwe tuwe urema'uhez neruwa rupi ure. Nerezekaiw kwaw urerehe ma'erahy ipuraraw mehe, i'i izupe wà.

Uwazar Tupàn Tuweharupi Wiko Ma'e teko waze'eg wanupe.

— Azeharomoete akwaw penemiapo.

Pemai'u 'ymaw 'ar rehe peme'eg ma'e, peme'eg kar ma'e no.

Pemunar peme uma'ereko ma'e wanemetarer rehe a'e 'ar rehe no.

4 Pemumaw pemai'u 'ymaw 'ar pezekwaku haw peze'eze'egahy pà pezeupeupe, pezeàmàtyry'ym pà no.

Te pezenupànupà no.

— Nezewe rehe we Tupàn wenu putar zaneze'eg a'e nehe,

aipo peze pezeupeupe.

5 Ma'e penemiapo pezekwaku haw pemai'u 'ymaw 'ar rehe har aputar ihe.

Aipo aputar pema'uhez haw.

Aipo aputar pezeamumew haw takwar iapar ma'e ài.

Aipo amunehew kar pàn iànàm ma'e ma'e hyru iapo pyr peme.

Aipo apumu'aw kar tàtàpyzgwer rehe.

Aipo nezewe haw uzeapo mai'u 'ymaw romo zekwaku haw romo peme.

Aipo pitài 'ar rehe pemai'u 'ymaw ikatu putar ihewe nehe.

6 Nan. Naputar kwaw agwer pezekwaku haw ihe.

Pemunehew kar e teko zemunehew paw pe pe wà. Aputar a'e wi wamuhem kar àwàm. Pepuraraw kar ma'erahy amo wanupe. Nuzawy kwaw ipuhuz katu ma'e heraha haw wanupe. Aputar a'e ipuhuz taw a'e teko wanuwi henuhem àwàm.

Pezapo kar ma'e tetea'u amo wanupe wama'e ipyhyk pà wanuwi. Aputar pewi wamuhem kar àwàm.

Pemupytu'u kar teko peme uma'ereko e ma'e romo wamuigo kar ire nehe.

Pemuhem kar paw rupi pe wà nehe.

7 Agwer pezekwaku haw ikatuahy ihewe: Pemuza'aza'ak penemi'u ima'uhez ma'e wanupe ikurer imono pà nehe.

Pemuixe kar ma'e hereko 'ymar penàpuz me pe wà nehe. Pemuixe kar hàpuz 'ym ma'e penàpuz me pe wà nehe no, wamuger kar pà wà nehe.

Pemono kamir ikamir 'ym ma'e wanupe nehe.

Pepytu'u pixik zo peànàm wapytywà re nehe.

8 A'e mehe nehe, hepurupyro haw heny katu putar kwarahy ài nehe.

Na'arewahy apumukatu putar upaw rupi nehe.

Pepyro har peneraha putar peho àwàm rupi nehe.

Tupàn Tuweharupi Wiko Ma'e wiko putar penehe we nehe, peiwyiwyr nehe, ikatu 'ym ma'e wanuwi pepyro pà nehe.

9 Ihewe penehapukaz mehe pepytywà àwàm henoz mehe nehe, apuenu putar nehe.

— Urepytywà pe nehe, peze putar ihewe nehe.

— Aiko aiko xe ihe, a'e putar peme nehe.

— Aze pepytu'u tuwe pemunar ire wà nehe,

aze pepytu'u ikatu 'ym ma'e amo wanupe imume'u re nehe, aze pepytu'u peze'eg urywahyahy re pe nehe,

10 Aze pemono temi'u ima'uhez ma'e wanupe nehe,

aze pepytywà ma'e hereko 'ymar nehe,

hepuruamutar katu haw heny katu putar nehe.

Peiko pytunaw rehe. A'e pytunaw nuzawy kwaw kwarahy heny haw zanemyter pe hin mehe har nehe.

11 Ihe Tupàn Tuweharupi Wiko Ma'e ihe, tuweharupi aexak kar putar peho àwàm peme nehe.

Te ywyxiguhu rehe amono putar penemi'u ràm peme nehe no.

Apumukatu putar nehe. Apumukàg kar putar nehe no.

Peiko putar ma'etymaw 'y tetea'u heta haw ài nehe.

Peiko putar ytyzuzàmaw ài nehe. 'Y nupytu'u kwaw izuwi uwyryk ire.

12 Zauxiapekwer weityk tawhu tetea'u kwehe mehe wà.

Pezapo wi putar a'e tawhu wawy pe har wa'aromo pe wà nehe, waneityk awer rehe pe wà nehe.

— Teko pàrirogaw hupir wi har a'e wà, i'i putar teko peme wà nehe.

— Tàpuz heityk pyrer iapo wi har a'e wà, i'i putar peme wà nehe no.

13 Uze'eg Tupàn Tuweharupi Wiko Ma'e nezewe a'e.

— Peruzar ze'eg mytu'u haw 'ar rehe har nehe.

Napeme'eg kwaw ma'e 'ar ihewe imonokatu pyrer rehe nehe. Napeme'eg kar kwaw ma'e a'e 'ar rehe nehe.

Tuwe mytu'u haw 'ar uzeapo mynykaw 'ar ài peme nehe.

Tuwe upyta 'ar Tupàn Tuweharupi Wiko Ma'e pe imonokatu pyr romo peme nehe.

Pemuawate a'e 'ar nehe. Pepytu'u pema'ereko 'ym pà nehe.

Peme'eg zo ma'e a'e 'ar rehe nehe.

Peze'eze'eg e zo a'e 'ar mehe nehe.

14 Aze peruzar heze'eg nehe, aiko putar pemurywete kar har romo ihe nehe.

Apupytywà putar ikatu 'ym ma'e paw heityk pà nehe.

Penurywete putar ywy peipy Zako pe heremimono kwer rehe nehe.

Ihe Tupàn Tuweharupi Wiko Ma'e aze'eg kwez ihe kury.