1 Azamutar katu Xiàw ihe. A'e rupi napytu'u kwaw heze'eg ire nehe.

Weityk putar wàmàtyry'ymar a'e wà nehe.

Waàmàtyry'ym awer heny katu putar kwarahy ài nehe. Xo a'e mehe zo apytu'u putar nehe.

Ipyro haw heny katu putar tatainy ywyra ipei'ài'àg pyrer iku'amumyk pyrer ukaz ma'e ài a'e nehe. Xo a'e mehe zo apytu'u putar nehe.

2 Zeruzarez. Teko ywy nànànar paw wexak putar neàmàtyry'ymar waneityk àwàm wà nehe.

Tuwihawete paw ipytuhegatu putar nepuràg eteahy haw hexak mehe wà nehe.

Erereko putar her ipyahu ma'e nehe.

Tupàn Tuweharupi Wiko Ma'e omono putar nerer ipyahu ma'e newe nehe.

3 Ereiko putar tuwihawete àkàg rehe har ipuràg eteahy ma'e ài nehe.

Ereiko putar Tupàn ima'e romo tuweharupi nehe.

4 — Heityk pyrer, ni'i wi pixik kwaw teko newe wà nehe.

— Imumaw pyrer, ni'i pixik kwaw neywy rehe wà nehe.

— Heremiamutar katu, i'i putar Tupàn newe nehe.

— Heremireko, i'i putar neywy rehe nehe,

ta'e nekatu Tupàn Tuweharupi Wiko Ma'e pe ne xe.

Neywy wiko putar hemireko romo nehe.

5 Awa wereko kuzà wemireko romo a'e.

Nezewegatete neapo arer nerereko putar wemireko romo a'e nehe no.

Kuzà umurywete kar umen ràm a'e.

Nezewegatete eremurywete kar putar nezar nehe no.

6 Zeruzarez ipàrirogaw apyr

Tupàn Tuweharupi Wiko Ma'e umupu'àm kar ume'egatu ma'e a'e wà.

Ni 'aromo ni pyhaw

nupytu'u kwaw uhapukaz re wà.

Pe ume'egatu ma'e pe wà, pemuma'enukwaw kar Tupàn wemimume'u kwer rehe.

Pepytu'u zo imuma'enukwaw kar ire nehe.

7 Pemupytu'u kar zo Tupàn nehe.

Xo Zeruzarez iapo wi re zo pepuner pepytu'u haw rehe nehe.

Iapo katu wi re teko ywy nànànar uze'egatu putar hehe wà nehe.

8 Tupàn Tuweharupi Wiko Ma'e upir uzywa awyze har ikàg ma'e a'e,

ko ma'e wemiapo ràm imume'uahy pà wemiaihu wanupe a'e.

— Na'u kar pixik kwaw arozràn peko pe har

peàmàtyry'ymar wanupe ihe nehe.

Pema'ereko tetea'u win iapo pà.

Na'u kar pixik kwaw a'e win

amo ywy rehe har wanupe nehe.

9 Pe ae pepo'o putar arozràn peko pe har nehe.

Pe'u putar typy'ak a'e arozràn iapo pyrer nehe.

Pe ae pepo'o putar uwà peko pe har nehe.

Pe'u putar itykwer win heràpuzuhu huwake katu pe nehe.

10 Zeruzarez pe har wà, pehem tawhu wi nehe.

Pemukatu peànàm uzewyr ma'e ràm wanape ràm nehe.

Pemuhygatu wanape ràm nehe. Penuhem ita paw heityk pà amo me nehe.

Peupir pàn ze'eg hereko har nehe.

Teko paw wexak putar a'e pàn wà nehe. Ukwaw putar a'e ma'e uzeapo romo haw wà nehe no.

11 Ywy nànàn

Tupàn Tuweharupi Wiko Ma'e umume'u ko ze'eg a'e.

— Peze'eg teko Zeruzarez pe har wanupe nehe.

— Pepyro har uhem iko a'e, peze wanupe nehe,

— Werur teko wemipyro kwer wanereko uzeupi wà no, peze wanupe nehe.

12 — Teko Tupàn pe imonokatu pyrer wà, i'i putar teko peme wà nehe.

— Teko Tupàn Tuweharupi Wiko Ma'e hemipyro kwer wà, i'i putar peme wà nehe no.

— Tupàn hemiamutar katu, i'i putar Zeruzarez pe wà nehe.

— Tawhu Tupàn hemityk 'ym, i'i putar izupe wà nehe no.