4
Pezewyr ihewe nehe, i'i Tupàn Izaew wanupe
1 Tupàn Tuweharupi Wiko Ma'e uze'eg wi kury.
— Teko Izaew izuapyapyr wà. Aze pezewyr nehe, pezewyr ihewe nehe. Naheakatuwawahy kwaw tupàn a'ua'u wanehe. Pezukazuka wamumamumaw pà pe wà nehe. Hereruzar pe nehe. 2 Xo nezewe haw iapo mehe peiko putar azeharomoete har romo ikatu ma'e romo imunar 'ym ma'e romo nehe, herer rehe ma'e imume'uahy mehe nehe. Teko ywy nànànar wenoz putar heze'egatu wà nehe. Umume'u putar hekatu haw wà nehe no.
3 Tupàn uze'eg awa Zuta izuapyapyr wanupe a'e, Zeruzarez tawhu pe har wanupe a'e no.
— Pewykawyka ywy ma'etym àwàm rehe imuàgà'ym 'ym awer nehe, iwykawyka haw pupe nehe. Pezutym zo ma'eà'yz xu myter pe nehe. 4 Teko Zuta ywy rehe har wà, Zeruzarez pe har wà no, peruzar peze'eg awer herehe we penemiapo katu kwer nehe. Aiko Tupàn Tuweharupi Wiko Ma'e romo. Pezemur katu tuwe ihewe pepy'a nànàn nehe. Aze nan kwaw nehe, hekwahy haw ukaz putar tata ài nehe. Pezapo ikatu 'ym ma'e tetea'u. A'e rupi hepuruzukaiw haw nuzawy kwaw tata nehe. Ni amo nupuner kwaw imuwew haw rehe wà nehe.
Tupàn werur putar iaiw paw kwarahy heixe haw awyze har kutyr har wi nehe
5 Pezupy xi'àm ma'e'ak kwer iapo pyrer ywy nànàn nehe.
Pehapukazahy peze'eg imume'u katu pà nehe.
Pemume'u ko ze'eg teko Zuta ywy rehe har wanupe nehe, Zeruzarez tawhu pe har wanupe nehe no.
— Pezàwehem tawhu pàrirogawtàtà ma'e pupe pezepyro pà nehe.
6 Pexak kar Xiàw piar purupe nehe.
Pezàn pezeàmim àwàm me nehe.
Pezàn na'arewahy nehe.
Tupàn werur putar iaiw paw kwarahy heixe haw awyze har kutyr har wi nehe.
Werur putar ma'e tetea'u imumaw paw a'e wi nehe no.
7 Teko waiwy imumaw har ur iko.
Nuzawy kwaw zàwàruhu iriàw uker haw wi uhem ma'e kwer.
Umumaw putar teko Zuta ywy rehe har wà nehe.
Weityk putar tawhu Zuta ywy rehe har wà nehe.
Ni amo nuiko kwaw a'e tawhu wapupe wà nehe.
8 A'e rupi, pemunehew ma'eryru pàn iànàm ma'e iapo pyrer nehe, pezemumikahy haw pexak kar putar nehe.
Pemume'uahy pezemumikahy haw pezai'o pà nehe.
Ta'e Tupàn ikwahy haw tata zàwenugar nuhem kwaw Zuta piar wi xe.
9 Uze'eg Tupàn Tuweharupi Wiko Ma'e kury.
— A'e 'ar mehe tuwihawete a'e wà nehe, amo tuwihaw a'e wà nehe no, wakàgaw uhem putar wanuwi nehe. Xaxeto uzemumikahy putar wà nehe. Heze'eg imume'u har ipytuhegatu putar wà nehe, i'i ihewe.
10 Na'e aze'eg izupe kury.
— O Tupàn Tuweharupi Wiko Ma'e, neremu'em tuwe teko Zeruzarez pe har wanupe. — Heta putar zeàmàtyry'ym 'ymaw nehe, ere mua'u wanupe. Heta takihepuku wa'az rehe uzekok ma'e.
11 Eremume'u putar ma'e teko Zeruzarez pe har wà nehe. Uhem imume'u haw i'ar iko. — Ywyxiguhu rehe amo ywytu hakuahy ma'e ur putar neremiaihu wanupe nehe. Nan kwaw ywytu ikàg 'ym ma'e arozràn iapirer wi henuhemar a'e. 12 Ywytu neremimur ràm iaiw putar nehe. Ko 'ar rehe ne ae eremume'u neremiaihu wanehe nezepyk àwàm iko no, a'e izupe.
Zuta waàmàtyry'ymar ur waiko wakutyr wà
13 Aze'eg Zuta ywy rehe har wanupe kury. — Peme'egatu nehe. Peàmàtyry'ymar ur waiko ywàkun ài wà. Wama'e ywyramawa nuzawy kwaw ywytuaiw wà. Waneimaw kawaru iàkwen wera'u wiràhu wanuwi wà. Zanezuka putar wà nehe. Zanemumaw putar wà nehe.
14 Zeruzarez, emukatu ikatu 'ymaw nepy'a pe har nehe. Nezewe nepyro putar nehe. Màràn kwarahy eremumaw ikatu 'ymaw rehe nema'enukwaw pà nehe.
15 Nà izuapyapyr umur kar uze'eg herur har wà. Eparai izuapyapyr ywytyr rehe wiko ma'e umur kar uze'eg herur har wà no. Uzeapo ma'e kwer iro ma'e umume'u zanewe wà. Zauxiapekwer tetea'u wixe kwez waiwy rehe wà kury. 16 — Peho teko ywy nànànar wanupe Zeruzarez tawhu pe har wanupe nehe, ko ze'eg imume'u pà wanupe nehe. — Zaneàmàtyry'ymar ur waiko ywy muite har wi wà. Uzàmàtyry'ym putar tawhu Zuta ywy rehe har wà nehe, uhapukaz pà wà nehe. 17 Umàmàn putar Zeruzarez izywyr wà nehe. Nuzawy kwaw awa ma'etymaw rehe uzekaiw ma'e wà. Ta'e zapytu'u Tupàn heruzar ire zane xe.
18 — Zuta, ne ae eremur kar a'e iaiw haw nezeupe ne. Ta'e ereiko ikatu 'ym ma'e romo ne xe. Erezapo iaiw ma'e. Neremiapo kwer werur ko ma'erahy newe. Ukutuk nepy'a. Ihe Tupàn Tuweharupi Wiko Ma'e aiko ko ma'e imume'u har romo ihe, i'i Tupàn.
Zeremi uzemumikahy teko wanehe
19 Hahy ihewe.
Napuner kwaw agwer ma'erahy ipuraraw haw rehe. Uhua'u.
A, hepy'a.
Hepy'a unununukahy iko.
Napuner kwaw heze'eg 'ymaw rehe.
Ta'e ainu xi'àm ma'e'ak kwer iapo pyrer ihe xe. Aenu zauxiapekwer zeàmàtyry'ymawhu pe oho ma'e wanehapukaz mehe ihe wà.
20 Iaiw haw tetea'u ur.
Umumaw ywy paw rupi wà.
Na'arewahy umumaw zanereko haw tàpuzràn wà.
Umu'i pàn tàpuz pupe imuzaikaw pyrer wà.
21 Màràn zahy amumaw putar pàn zaneàmàtyry'ymar her hereko har hexak pà nehe.
Màràn 'ar amumaw putar xi'àm ma'e'ak kwer iapo pyrer ipy haw henu pà zeàmàtyry'ymawhu pe nehe.
22 Uze'eg Tupàn kury.
— Heremiaihu he'o wà.
Nahekwaw kwaw wà.
Nuzawy kwaw kwarer iranaiwahy ma'e wà.
Nukwaw kwaw ma'e wà.
Ukwaw katu ikatu 'ym ma'e iapo haw wà.
Nukwaw kwaw ikatu ma'e iapo haw wà, i'i Tupàn.
Teko wamumaw pàwàm
23 Na'e ame'e kury.
Naheta kwaw ma'e iapo katu haw ywy rehe. Naheta kwaw wikuwe ma'e wà no.
Naheta kwaw tatainy ywak rehe.
24 Ame'e ywytyruhu wanehe.
Uryryryryz waiko wà.
Ywytyr uzeapawypawyw kwe rupi wà, ko rupi wà.
25 Aexak teko waneta 'ymaw ihe.
Te wiràmiri uwewe oho wà.
26 Ywy ikatu ma'e uzeapo ywyxiguhu romo. Aexak izeapo awer.
Tupàn weityk tawhu wà.
Ta'e wikwahy wera'u a'e xe. Aexak waneityk awer.
27 — Ywy paw uzeapo putar ywyxiguhu romo nehe, i'i Tupàn.
Nezewe rehe we numumaw kwaw paw rupi nehe.
28 Ywy uzai'o putar nehe.
Ywak ipihun putar nehe no.
Ta'e Tupàn uze'eg a'e xe.
Numume'u kwaw amo ae wemiapo ràm nehe.
Umume'u a'e ma'e.
Nuzewyr kwaw izuwi nehe.
29 Kawaru wànoànogaw henu mehe wà nehe,
u'yw pupe puruzywà haw henu mehe wà nehe,
paw rupi uhem putar uzàn pà wà nehe.
Amo uzàwehem putar oho ka'a pe wà nehe.
Amo uzeupir putar itahu rehe wà nehe.
Tawhu paw upyta putar teko heta 'ym pà wà nehe.
Ni amo nuiko kwaw wapupe wà nehe.
30 Zeruzarez, Tupàn umume'u nerehe uzepykaw a'e.
Màràzàwe tuwe eremunehew kamir ipiràg ma'e.
Màràzàwe tuwe eremunehew ita hekuzar katu ma'e. Màràzàwe tuwe eremupinim nereha.
Nereko wer ipuràg eteahy ma'e romo.
Nezewe rehe we nepuhe oho ma'e kwer upuir newi wà.
Ipuruzuka wer nerehe wà kury.
31 Aenu amo heiheihem mehe ihe.
Nuzawy kwaw kuzà imemyr zexak kar ma'e.
Heiheihem kuzà umemyr ipy imuzexak kar har ài.
Zeruzarez a'e heiheihem ma'e romo hekon a'e.
Zawaiw katu ipytuhemaw izupe kury.
Upyho opo uze'eg pà.
— Àmàno putar kury.
Ur waiko hezuka pà wà kury, i'i uzeupe.