12
Zeremi upuranu Tupàn rehe
1 — O Tupàn Tuweharupi Wiko Ma'e, aze mo apuranu nerehe a'e ma'e rehe, eremume'u katu mo ihewe. Apuranu putar nerehe purehe nezepykaw imume'u kar pà newe ihe nehe kury. Màràzàwe tuwe ikatu 'ym ma'e uzeapo hemetarer katu ma'e romo wà. Màràzàwe tuwe imunar ma'e waneko haw ikatu wanupe. 2 Erezutym ma'eà'yz ài ne wà. Wanapo ohoete. Hezuz katu wà. I'a katu wà no. Uze'egatu mua'u waiko nerehe wà. Nuzekaiw kwaw nerehe azeharomoete wà. 3 Ne Tupàn Tuweharupi Wiko Ma'e hekwaw pe no. Erexak heremiapo. Uruamutar katu ihe. Erekwaw hereko haw. O Tupàn Tuweharupi Wiko Ma'e, emutyk 'aw teko àràpuhàràn hawitu ma'e wazuka haw pe oho ma'e ài ne wà nehe. Emonokatu wazuka àwàm 'ar pe nehe. 4 Màràn 'ar ureywy upyta typaw haw romo nehe. Màràn zahy ka'api'i umumaw putar uxinig pà urereimaw wanuwi nehe. Ma'ea'yr a'e wà, wiràmiri a'e wà no, umàno oho waiko wà. Ta'e ko ywy rehe har uzapo ikatu 'ym ma'e waiko wà xe. — Tupàn nuexak kwaw wanemiapo a'e, i'i uzeupeupe wà, a'e Tupàn pe.
5 Uwazar Tupàn heze'eg ihewe.
— Nekene'o awa wanupi nezàn ire. Aipo erepuner putar kawaru wanupi nezàn àwàm rehe nehe. Nerezepyro kwaw ywy zeàmàtyry'ym 'ymaw heta haw pe, aipo erepuner nereko haw rehe ka'a Zotàw yrykaw iwyr har rehe nehe. 6 Te nerywyr wà, neànàm wà, wiko neàmàtyry'ymar romo wà. Uze'eg zemueteahy nerehe nekupe kutyr wà. Ezeruzar zo wanehe nehe. Aze ur nemyrypar ài newe uze'eg pà wà nehe, nezewe rehe we ezeruzar zo wanehe nehe, i'i ihewe.
Tupàn uzemumikahy wemiaihu wanehe
7 Uze'eg Tupàn Tuweharupi Wiko Ma'e kury.
— Aityk heremiaihu ihe wà.
Apuir teko heremixamixak kwer wanuwi no.
Amono teko heremimutar katu
waàmàtyry'ymar wapo pe ihe wà.
8 Teko heremixamixak kwer
wiko heàmàtyry'ymar romo zàwàruhu iriàw ka'a pe har ài wà.
Uhapukaz hekutyr wà.
A'e rupi iro ihewe wà.
9 Teko heremixamixak kwer nuzawy kwaw wiràmiri wà.
Wiràhu tetea'u umàmàn izywyr hehe ipuruzuka wer pà wà.
Pezur nehe, miar wà.
Pezur mynykaw pe nehe.
10 Tuwihaw amo ywy rehe har tetea'u umumaw ma'ywa tyw heremitygwer wà.
Upyropyrog heko pe wà no.
Uzapo heywy ipuràg eteahy ma'e ywyxiguhu romo wà no.
11 Umuaiw ywy wà.
Teko weityk a'e ywy herenataromo wà.
Uzeapo ywyxiguhu romo.
Ni amo nuzekaiw kwaw hehe wà.
12 Ywytyr ywyxiguhu rehe har nànàn uzexak kar awa wà.
Uzuka wata ma'e wama'e rehe imunar pà wà.
Amono kar zeàmàtyry'ymawhu ywy rehe imumaw kar pà paw rupi ihe.
Ni amo nupuner kwaw zeàmàtyry'ym 'ymaw rehe weko haw rehe wà.
13 Heremiaihu uzutym arozràn wà. Xo xu zo omono'og wà.
Uma'ereko tetea'u wà. Nezewe rehe we nupyhyk kwaw ma'e wà.
Hekwahy haw nuzawy kwaw tata.
A'e rupi naheta kwaw arozràn ipo'o pyr wanupe, i'i Tupàn.
Izaew wanuwake wiko ma'e wà
14 Uze'eg wi Tupàn Tuweharupi Wiko Ma'e.
— Aze'eg putar Izaew wanuwake wiko ma'e ikatu 'ym ma'e wanehe ihe nehe kury. Umuaiw ywy heremiaihu wanupe heremimono kwer wà. Araha putar a'e teko muite waiwy wi ka'a ipo'o pyrer ài ihe wà nehe. Amuhem kar putar Zuta ywy rehe har a'e teko wainur wi ihe wà nehe. 15 Muite waneraha re apuhareko putar ihe wà nehe. Arur wi putar ywy rehe har pitàitàigatu waiwy rehe ihe wà nehe. 16 Aze hemuwete katu heremiaihu wazàwe wà nehe, ikatuahy putar ihewe wà nehe. — Amume'uahy heremiapo ràm Tupàn Tuweharupi Wiko Ma'e Tupàn Wikuwe Ma'e her rehe ihe, aze i'i nezewe wà nehe, ikatuahy putar ihewe wà nehe. Kwehe mehe a'e teko umu'e heremiaihu Ma'aw her rehe wemiapo ràm imume'u haw rehe wà. Aze hemuwete katu wà nehe, uzeapo putar heremiaihu wainuinuromo har romo wà nehe. Waneko haw ikatu putar wanupe nehe. 17 Azo'ok putar te wanapo nehe. Amumaw wyzài teko ihe wà nehe, aze na'ipureruzar wer kwaw herehe wà nehe. Ihe Tupàn Tuweharupi Wiko Ma'e aze'eg nezewe ihe.