15
Zuta ywy rehe har wanehe izepyk àwàm
1 Na'e Tupàn Tuweharupi Wiko Ma'e uze'eg ihewe kury.
— Aze mo Moizez wiko xe Xamuew rehe we ihewe uze'eg pà wà, napuhareko iwer mo 'aw teko ihe wà. Emono kar 'aw teko xe wi wà nehe. Tuwe ukàzym herenatar wi wà nehe. 2 — Ma'e pe oroho putar nehe, aze i'i newe nerehe upuranu pà wà nehe,
— Tupàn uze'eg nezewe a'e, ere wanupe nehe.
— Amume'u amo wamàno àwàm ihe.
Ma'eahy haw uzuka putar wà nehe, a'e wanupe.
Uzeapo putar nezewe nehe.
Amo umàno putar zeàmàtyry'ymawhu pe wà nehe, a'e wanupe.
Uzeapo putar nezewe nehe.
Ma'uhez hawhu uzuka putar amo wà nehe, a'e wanupe.
Uzeapo putar nezewe nehe.
Zauxiapekwer weraha putar amo wemipyhyk romo wà nehe, a'e wanupe.
Uzeapo putar nezewe nehe, ere wanupe nehe, i'i Tupàn ihewe.
3 — Ihe Tupàn Tuweharupi Wiko Ma'e amume'u a'e iaiw ma'e uzeapo àwàm ihe. Uzeapo putar nehe. Umàno putar zeàmàtyry'ymawhu pe wà nehe. Zawar umutyk putar wanetekwer wà nehe. Wiràmiri u'u putar wà nehe no. Miar u'u putar ikurer wà nehe no. 4 Amume'e kar putar teko ywy nànànar a'e wanetekwer wanehe ihe wà nehe. Ta'e Manaxe Ezeki ta'yr uzapo iaiw ma'e Zeruzarez pe Zuta ywy rehe har wanuwihawete romo wiko mehe a'e xe.
5 Uze'eg wi Tupàn.
— Mo pepuhareko putar wà nehe, Zeruzarez pe har wà.
Mo uzekaiw putar penehe wà nehe.
Mo upytu'u a'u putar upuranu re wà nehe.
— Pekatu aipo, aipo i'i putar amo peme wà nehe.
6 Hereityk pe.
Pewak pekupe hexak kar pà ihewe.
Na'e aupir hepo
pekamikamik pà.
Ta'e hekene'o penemiapo kwer ikatu 'ym ma'e imunàn ire ihe xe.
Ihe Tupàn Tuweharupi Wiko Ma'e aiko ko ma'e imume'u har romo ihe.
7 Teko omomor arozràn ywytu ikutyr wà, henuhenuhem pà iapirer wi wà.
Pe tawhu ko ywy nànànar pe wà, apomomor peàmàtyry'ymar wakutyr nezewegatete ihe no.
Apumumaw ihe, heremiaihu wà.
Azuka pena'yr wà.
Ta'e napezar kwaw penape ikatu 'ym ma'e pe xe.
8 Amueta tetea'u kar kuzà imen umàno ma'e kwer peinuinuromo har ihe wà.
Waneta haw nuzawy kwaw ywyxig yryhu iwyr heta haw.
Azuka pena'yr wakàg mehe wapuràg mehe ihe wà.
Apuraraw kar ma'erahy wahy wanupe no.
Na'arewahy amu'ar kar zemumikahy haw wanehe, ma'e wi kyzeahy haw wanehe no.
9 Amo kuzà heta 7 umemyr umàno ma'e wà. Iàkàzym wahy.
Ipytuhemaw zawaiw katu izupe.
'Ar uzeapo pytun romo izupe.
Uzemumikahy.
Wiko ma'e hàro 'ym pà kury.
Apuzuka kar putar peàmàtyry'ymar wanupe ihe nehe, aze heta we wikuwe ma'e wà nehe.
Ihe Tupàn Tuweharupi Wiko Ma'e aze'eg kwez ihe kury, i'i Tupàn.
10 Aze'eg ihe kury.
— Zawaiw katu hereko haw ihewe kury. Màràzàwe tuwe hehy hemuzexak kar a'e. Azàmàtyry'ym ko ywy rehe har paw rupi ihe wà. Namono kwaw temetarer amo pe imuzewyr àwàm iputar pà ihe. — Emur temetarer ihewe nehe, na'e kwaw amo wanupe. Nezewe rehe we teko paw umur uze'egaiw herehe wà. 11 O Tupàn Tuweharupi Wiko Ma'e. Ama'ereko katu newe. Aenoz ikatu ma'e neàmàtyry'ymar wanupe neremimono ràm ihe, waneko haw zawaiw katu mehe ma'erahy ipuraraw mehe ihe. Aze naiko kwaw agwer ma'e iapo har, tuwe waze'egaiw u'ar herehe nehe. 12 Ni amo nupuner kwaw itaper ika haw rehe wà. Nupuner kwaw ita per kwarahy heixe haw awyze har kutyr har ika haw rehe azeharomoete a'e wà, ta'e imukatu har omono itazu morog inuinuromo wà xe. Tàtàahy tuwe a'e, a'e Tupàn pe.
13 Uze'eg Tupàn ihewe.
— Zeremi, azapo kar putar ma'e peàmàtyry'ymar wanupe nehe. Weraha putar heremiaihu wama'e ikatu ma'e paw rupi wà nehe. Weraha putar wanemetarer paw rupi wà nehe no. Nezewe azepyk putar wanehe wanemiapo kwer ikatu 'ym ma'e ko ywy rehe iapo pyrer paw hekuzaromo ihe nehe. 14 Amuigo kar putar waàmàtyry'ymar wanupe uma'ereko e ma'e romo ihe wà nehe, amo ywy rehe ihe wà nehe. Nukwaw kwaw a'e ywy wà nehe. Azapo putar agwer ma'e wanupe ihe nehe, ta'e hekwahy haw nuzawy kwaw tata uwew 'ym ma'e ràm a'e xe, i'i Tupàn ihewe.
15 Na'e awazar ize'eg izupe kury.
— O Tupàn Tuweharupi Wiko Ma'e. Ne erekwaw ma'e paw rupi ne. Nema'enukwaw herehe nehe. Hepytywà pe nehe. Ezepyk herehe ipuruzuka wer ma'e wanehe nehe, herekuzaromo nehe. Aze nerezepyk kwaw wanehe na'arewahy nehe, hezuka putar wà nehe. Nema'enukwaw ko ma'e rehe nehe. Uze'eg zemueteahy herehe wà, ta'e amume'u neze'eg wanupe ihe xe. 16 Ereze'eg ihewe. Neze'eg mehe azekaiw neze'eg paw rehe nànàn ihe. O Tupàn Tuweharupi Wiko Ma'e Upuner Wera'u Ma'e, aiko neremiruze'eg romo ihe. A'e rupi neze'eg umynehem hepy'a turywete haw pupe a'e. 17 Naiko e kwaw hepuka pà. Naiko e kwaw teko wainuinuromo. Eremur ma'ereko haw ipuhuz katu ma'e ihewe. A'e rupi naheta kwaw hemyrypar ihewe wà. Azemumikahy hekwahy pà. 18 Màràzàwe tuwe apuraraw wiwi ma'erahy teko ihe. Màràzàwe tuwe hekutuk awer hahy ihewe upytu'u 'ym pà. Màràzàwe tuwe nuke'e kwaw. Aipo napuner kwaw nerehe hezeruzar haw rehe. Aipo ereiko yrykaw kwarahy mehe typaw ma'e ài, a'e izupe.
19 Tupàn Tuweharupi Wiko Ma'e uwazar heze'eg ihewe. — Aze erezewyr nehe, urumuawyze putar ihe nehe. Ereiko wi putar heremiruze'eg romo nehe. Aze eremume'u ikatu ma'e nehe, aze neremume'u kwaw ze'eg ikatu 'ym ma'e nehe, ereiko wi putar heze'eg imume'u har romo nehe. Teko uzewyr putar newe wà nehe. Nezewe rehe we ezewyr zo wanupe nehe. 20 Urumuigo kar putar pàrirogawtàtà itazu morog iapo pyrer zàwenugar nehe, 'aw teko wanupe nehe. Neàmàtyry'ym putar wà nehe. Nezewe rehe we nanereityk kwaw wà nehe. Ta'e aiko putar nerehe we nerehe hezekaiw pà ihe nehe xe, nepyro pà ihe nehe xe. 21 Urupyro putar teko iaiw ma'e wapo wi ihe nehe, teko puruzuka ma'e wapuner haw wi ihe nehe.