48
Moaw heitykaw
1 Tupàn Tuweharupi Wiko Ma'e upuner wera'u ma'e Izaew wazar umume'u ko ma'e Moaw rehe har rehe.
— Pepuhareko teko Nemo tawhu pe har pe wà nehe.
Ta'e zauxiapekwer umumaw a'e tawhu a'e wà xe.
Upyhyk Kiriataim wà no.
Weityk hàpuzuhu tàtà ma'e imumew pà wà.
Umuigo kar teko a'e pe har ikàg 'ym ma'e romo wà no.
2 Moaw ikàgaw ipuràgaw upaw.
Ezemon tawhu pe waàmàtyry'ymar umume'u wemiapo ràm waiko wà.
— Ximumaw Moaw izuapyapyr zane wà nehe, i'i uzeupeupe wà.
Zauxiapekwer tetea'u wata putar oho Mazimen tawhu kutyr wà nehe.
Xo ze'eg 'ymaw zo heta putar a'e pe nehe.
3 Teko Oronaim pe har uhapukaz wà.
— Umumew paw rupi wà.
Umumaw paw rupi wà.
4 Moaw ywy uzeapo heityk pyrer romo.
Kwarearer uzai'o waiko wà.
5 Pezeapyaka wazozokaw rehe
Iruwi tawhu piar rupi nehe.
Peinu ma'eahy haw wi wanehapukaz haw
Oronaim tawhu piar rupi nehe no.
6 Xinu teko nezewe wanehapukaz mehe wà.
— Na'arewahy nehe.
Pezàn pezepyro pà màno haw wi nehe.
Pezàn zumen hehaite ma'e ywyxiguhu rehe har ài nehe, i'i wà.
7 Moaw izuapyapyr wà, pezeruzar pekàgaw rehe penemetarer rehe.
Ko 'ar rehe peàmàtyry'ymar wiko putar pezar romo a'e wà nehe.
Weraha putar tupàn pezar Kemoz her ma'e a'e wà nehe, peywy wi a'e wà nehe.
Weraha putar penuwihawete ta'yr wà nehe no, xaxeto penehe we har a'e wà nehe no.
8 Ni pitài tawhu nuzepyro kwaw uzemumaw pàwàm wi nehe.
Umumaw putar ywyàpyznaw rehe har wà nehe. Umumaw putar ywyapypepaw rehe har wà nehe no.
Ihe Tupàn Tuweharupi Wiko Ma'e aiko ko ma'e imume'u har romo.
9 Pemuàgà'ym amo ita Moaw wanetekwer watym àwàm rehe har nehe.
Ta'e na'arewahy amo umumaw putar waiwy wà nehe xe.
Umuaiw putar tawhu waneko haw wà nehe no.
Ni amo nuiko kwaw a'e pe wà nehe.
10 Aze amo nuzapokatu kwaw Tupàn pe uma'ereko haw wà nehe, Tupàn omono putar uze'egaiw a'e teko wanehe nehe.
Aze amo omonokatu utakihepuku wà nehe, aze nuzuka kwaw teko ipupe wà nehe, Tupàn omono putar uze'egaiw a'e teko wanehe nehe no.
Tawhu Moaw ywy rehe har wamumaw paw
11 Tupàn Tuweharupi Wiko Ma'e uze'eg a'e kury.
— Teko Moaw ywy rehe har wiko uzàmàtyry'ym 'ym pà tuweharupi wà. Ni amo zauxiapekwer nueraha kwaw waiwy wi ipyhyk pyrer romo wà. Moaw nuzawy kwaw win imonokatu pyrer. Teko numumyz kwaw a'e win wà. Nuzakook pixik kwaw hyru wi amo hyru ràm pe wà. Hete katu haw nuhem kwaw izuwi. Tuweharupi ikatu i'u mehe.
12 Uhem amo 'ar iko kury. A'e 'ar mehe amono kar putar teko Moaw wanupe ihe nehe. Uzakook putar win ài wà nehe. Ukauka putar hyru win heityk pà ywy rehe wà nehe. 13 Na'e Moaw izuapyapyr upytu'u putar utupàn Kemoz rehe uzeruzar ire wà nehe. Nuzawy kwaw Izaew wà nehe. Izaew upytu'u utupàn Metew rehe uzeruzar ire wà no.
14 Awa Moaw rehe har wà. — Uruiko zauxiapekwer ipuruzukaiwahy ma'e romo ure, peze pezehe.
— Uruiko zauxiapekwer ukyze 'ym ma'e romo ure, peze pezehe. Màràzàwe tuwe peze'eg nezewe.
15 Amo zauxiapekwer umumaw putar Moaw wà nehe. Umumaw putar tawhu Moaw ywy rehe har wà nehe no.
Uzuka putar kwàkwàmo ikatu wera'u ma'e wà nehe.
Ihe tuwihawete ihe, aiko ko ma'e imume'u har romo ihe.
Tupàn Tuweharupi Wiko Ma'e Ikàg Wera'u Ma'e herer romo ihe.
16 Iaiw haw ko ywy rehe u'ar ma'e ràm uhem iko a'e.
Imumaw pàwàm uzeapo putar na'arewahy nehe kury.
17 Pe Moaw wanuwake wiko ma'e,
pepuhareko pe wà nehe.
Wakàgaw ikwaw par wà, pepuhareko pe wà nehe.
— Wapuner katu haw upaw kwez kury.
Wapuràg eteahy haw wakàgaw ukàzym, peze nehe.
18 Pe Nimon pe wiko ma'e wà.
Pewezyw tuwihaw henaw wi nehe.
Peapyk ywy rehe ywyku'i rehe nehe.
Moaw imumaw pàràm wiko xe.
Umumaw putar wanàpuzuhu imuàtà pyrer nehe.
19 Aroer pe wiko ma'e wà, Pepyta pe iwyr teko wanàro pà nehe.
Pepuranu wanehe nehe.
— Ma'e uzeapo aipo kury, peze wanupe nehe.
20 Uwazar putar peze'eg peme wà nehe.
— Moaw ywy u'ar a'e.
Pezai'o hehe nehe. Ta'e zauxiapekwer umumaw a'e wà xe.
Peze'eg peho teko Aronon pe har yrykawhu izywyr har wanupe nehe.
— Umumaw Moaw ywy wà, peze wanupe nehe.
21 Umumaw tawhu ywyapypepaw rehe har wà: Orom, Zaza, Mepaat, 22 Nimon, Nemo, Mete-Zirimatai, 23 Kiriataim, Mete-Gamu, Mete-Meàw, 24 Keriot, Mozira. Umumaw tawhu Moaw ywy rehe har paw wà, muite har wà, pe pe har wà no. 25 Ukamik Moaw ipuner haw wà. Umumaw wakàgaw wà. Ihe Tupàn Tuweharupi Wiko Ma'e amume'u ko ze'eg kwez ihe kury.
Tupàn umumaw Moaw wakàgaw a'e
26 Uze'eg wi Tupàn Tuweharupi Wiko Ma'e kury.
— Pemuka'u kar Moaw pe wà nehe. Ta'e nahereruzar kwaw a'e wà xe. Moaw uwauwak putar uhuuhuk awer rehe wà nehe. Amogwer upuka putar wanehe wà nehe. 27 Moaw, erepuka teko Izaew wanehe. Aipo nema'enukwaw nepuka awer rehe. Ererekoahy Izaew ne wà. Nuzawy kwaw imunar ma'e tetea'u wainuinuromo imunehew pyrer newe wà.
28 Pe Moaw ywy rehe wiko ma'e wà, pehem tawhu peneko haw wi nehe. Peiko peho ita myter pe nehe. Peiko pykahu ài nehe. Uzapo waity ywytyr iàpy'àmahy haw izywyr wà. Peiko wazàwe nehe. 29 Moaw izuapyapyr wiko wiko wera'u ma'e romo wà. Urenu waneko haw. — Zanekàg wera'u amo wanuwi zane. Zanekatu wera'u amo wanuwi no. Zanepuràg eteahy wera'u amo wanuwi. Azeharomoete naheta kwaw amo teko zanezàwenugar wà, i'i wà. Amo umume'u waze'eg urewe wà. 30 Ihe Tupàn Tuweharupi Wiko Ma'e akwaw waneko wera'u haw ihe. — Ikatuahy, i'i ikatu 'ym ma'e pe wà, upaw ma'e ràm pe wà. 31 A'e rupi azai'o putar teko Moaw nànàn ihe nehe. Azai'o putar teko Kir-Erez pe har wanehe nehe no. 32 Azai'o putar teko Zazer pe har wanehe nehe. Azai'o wera'u putar teko Ximima pe har wanehe nehe. Tawhu Ximima, ereiko uwà tyw ài ne. Neràkà oho Yryhu Umàno Ma'e Kwer her ma'e i'aromo. Oho Zazer tawhu pe. Ko 'ar rehe neàmàtyry'ymar umumaw arozràn penemitygwer wà kury, uwà penemitygwer wà no. 33 Turywete haw a'e, turyw eteahy haw a'e no, ukàzym ywy ikatu ma'e wi Moaw wi a'e wà. Nuzapo kwaw win wà kury. Naheta kwaw iapo har wà. Naheta kwaw urywete haw rehe uhapukaz ma'e wà.
34 Teko Ezemon tawhu pe har wà, Ereaw pe har wà no, uhapukaz wà. Te Zaxa pe har upuner wanehapukaz haw henu haw rehe wà. Zoar pe har wenu wà. Oronaim pe har wà, Ekirat pyahu pe har wà no, upuner henu haw rehe wà. Te Niri yrykaw typaw no. 35 Teko Moaw izuapyapyr wapy wemimono ywytyr apyr utupàn wanenataromo wà. Uzuka ma'ea'yr wanupe wà. Amupytu'u kar putar wazuka re ihe wà nehe. Ihe Tupàn Tuweharupi Wiko Ma'e aiko ko ma'e imume'u har romo ihe.
36 A'e rupi hepy'a uzai'o Moaw rehe, teko Kir-Erez pe har wanehe no. Aiko xi'àm purutymaw pe ipy har ài. Ta'e wama'e paw upaw a'e wà xe. 37 Upin u'aw uzemumikahy haw hexak kar pà wà. Omonohok wamutaw wà no. Paw rupi uzekixi opo rehe wà. Umunehew ma'eryru pàn iànàm ma'e iapo pyrer ukamir romo wà. 38 Xo zai'o haw zo heta tàpuz nànàn, katu pe tàpuz huwake no. Ta'e azuhaw Moaw ywy'a iputar 'ym zàwenugar ài ihe xe. 39 Amumaw Moaw ihe wà. Pehapukaz nehe. Iaiw haw u'ar Moaw rehe. Ywy uzeapo heityk pyrer romo. Ywy huwake har paw uze'eg uryweteahy hehe wà. Ihe Tupàn Tuweharupi Wiko Ma'e aze'eg kwez kury.
Moaw nupuner kwaw uzewàhemaw rehe zepykaw wi wà
40 Ihe Tupàn Tuweharupi Wiko Ma'e amume'uahy ko ma'e uzeapo ma'e ràm ihe.
— Teko amo ywy rehe har uzàmàtyry'ym Moaw wà a'e wà nehe. Wiràhu u'ar wemiar rehe upepozaz pà a'e. Nezewegatete a'e teko u'ar putar Moaw rehe wà nehe no. 41 Upyhyk putar tawhu paw wà nehe, tàpuzuhu imuàtà pyrer paw wà nehe no. Kuzà umemyrahy ma'e ukyze a'e. Nezewegatete zauxiapekwer Moaw ukyze putar a'e wà nehe no. 42 Umumaw putar Moaw a'e wà nehe. Nuzewyr kwaw wà nehe. Nuiko wi kwaw teko imono'og pyr romo wà nehe. Ta'e heàmàtyry'ym a'e wà xe. 43 Kyze haw wàro Moaw wà. Ywykwar watym àwàm wàro wà no. Puruzuka haw wàro wà no. Ihe Tupàn Tuweharupi Wiko Ma'e aiko ko ma'e imume'u har romo ihe. 44 Ukyze haw rehe uzàn ma'e u'ar putar ywykwar purutymaw pupe wà nehe. Ywykwar wi uhem ma'e kwer uzepyhyk kar putar oho puruzuka haw pupe wà nehe. Ta'e amume'u Moaw imumaw pàwàm 'ar kwez ihe xe. 45 Amogwer uzàn ukene'o pà wà. Uzeagaw zepe uzepyro pà Ezemon tawhu pupe wà nehe. Xeom wiko Ezemon pe har wanuwihawete romo amo 'ar mehe. A'e teko nuzepyro kwaw Ezemon pupe wà. Ta'e ukaz iko kury xe. Tata wapy ywyzaw. Wapy ywytyruhu apyr Moaw ywy rehe har no. Moaw uzamutar zepe puràmàtyry'ymaw wà. 46 Uzemumikahy teko Moaw izuapyapyr wà. Zauxiapekwer amo ywy rehe har uzuka teko Kemoz imuwete har wà. Weraha wana'yr ipyhyk pyrer romo wà. Weraha wanazyr wà no. 47 Nezewe rehe we amuigo wi kar putar teko ikàg ma'e romo izypy mehe arer zàwenugar ài nehe. Na'aw Tupàn ze'eg Moaw rehe imume'u pyrer xe a'e.