1 Eripaz Temà ywy rehe har uze'eg putar a'e nehe kury.

2 Izo, awa ma'e kwaw katu har nuwazar kwaw amo ize'eg awer uze'egaw ipuhuz 'ym ma'e imume'u pà a'e.

Numynehem kwaw upy'a ywytu pupe.

3 Awa ma'e kwaw katu har numume'u kwaw ze'eg ikatu 'ym ma'e.

Nuzepyro kwaw zepykaw wi ze'eg ipiruahy ma'e imume'u pà.

4 Nepurumumaw wer Tupàn imuwete haw rehe.

Aze mo erepuner wamupytu'u kar haw rehe, ni amo nuze'eg iwer mo Tupàn pe wà.

5 Ereze'eg nezewe ta'e ikatu 'ym ma'e iapo har romo ereiko ne xe.

Neremu'em amo wanupe neze'eg mehe.

6 Namume'u kwaw neremiapo kwer ikatu 'ym ma'e nehe.

Ta'e neze'eg awer umume'u ikatu 'ym ma'e iapo har romo nereko haw a'e xe.

7 Aiko awa uzexak kar ma'e kwer izypy mehe arer romo ihe, ere iko nezeupe.

Aipo erezur ywy rehe ywytyruhu wanur 'ym mehe we.

8 Aipo erekwaw Tupàn hemiapo ràm imume'u pyr 'ym ne.

Aipo xo ne zo ereiko ma'e kwaw katu har romo.

9 Aipo erekwaw amo ma'e ureremigwaw 'ym.

Aipo erekwaw katu wera'u ma'e urewi.

10 Uruzemu'e ma'e rehe tua'uhez ma'e wapyr ure.

Uzexak kar neru izexak kar 'ym mehe we wà.

11 Tupàn ipurumurywete kar wer nerehe. Màràzàwe tuwe nereputar kwaw nemurywete kar àwàm.

Uruze'egatu uruiko newe her rehe.

12 Màràzàwe tuwe erezapo nepy'a hemimutar.

Màràzàwe tuwe ereme'e urerehe neakatuwawahy 'ym pà.

13 Màràzàwe tuwe ereàmàtyry'ym Tupàn. Màràzàwe tuwe erekwahy Tupàn pe.

Màràzàwe tuwe eremume'u hemiapo kwer ikatu 'ymaw.

14 Aipo amo upuner ikatuahy ma'e romo weko haw rehe wà.

Aipo amo upuner ikatu ma'e romo Tupàn henataromo weko haw rehe wà.

15 Tupàn nuzeruzar kwaw weko haw pe har wanehe.

Ni ywak na'ikatu kwaw henataromo,

16 Ma'e za'e putar teko wanupe nehe. Na'ikatu kwaw wà. Tupàn uhuhuk wanehe ume'e mehe a'e.

Teko ui'u ikatu 'ymaw pupe wà. Nuzawy kwaw 'y wanupe.

17 Ezeapyaka katu nehe, Izo. Amume'u putar ma'e newe nehe kury.

Amume'u putar heremixak kwer newe nehe kury.

18 Ma'e kwaw katu har upurumu'e ze'eg azeharomoete har rehe wà.

Uzemu'e a'e ma'e rehe u wapyr wà.

19 Wanu wiko amo ywy rehe wà.

Naheta kwaw amo ae ywy rehe arer a'e ywy rehe wiko ma'e wà.

20 Ikatu 'ym ma'e a'e, amo wanupe ma'erahy ipuraraw kar har a'e,

A'e ae umumaw u'ar paw ma'erahy ipuraraw kar pà uzeupe a'e no.

21 Uze'eg ma'e upurumukyzeahy kar ma'e umynehem wapyakwar wà.

— Ni amo nuzapo kwaw ikatu 'ym ma'e ihewe wà nehe, aze i'i wà nehe,

A'e 'ar mehe we imunar ma'e ipuruzukaiwahy ma'e uzàmàtyry'ym putar wà wà nehe.

22 Nuàro kwaw umàno haw wi uhem àwàm.

Ta'e amo umuhyk utakihe izuka pà xe.

23 Apitaw wàro waiko wà. U'u putar hetekwer wà nehe.

Ukwaw 'ar ipytunaw hereko har ihem etea'i àwàm a'e.

24 Ikyze haw wiko putar izar romo nehe. Ma'erahy ipuraraw paw uzeapo putar izar romo nehe no.

Nuzawy kwaw tuwihawete wàmàtyry'ymar wanur àwàm hàro har.

25 Iaiw ma'e upir opo Tupàn iàmàtyry'ym pà.

Uzàmàtyry'ym Tupàn upuner wera'u ma'e ukyze 'ym pà.

26 Nuweruzar kwaw Tupàn a'e.

Wereko u'yw wi uzemimaw ipuhuz ma'e opo pe.

Uzemomor Tupàn ikutyr.

27 Ume'e wiko wera'u ma'e ài.

Aiko wera'u amo wanuwi ihe, i'i upy'a pe.

28 A'e awa ikatu 'ym ma'e weityk tawhu tetea'u wà.

Upyhyk teko uzàn ma'e kwer wanàpuz gwer wà no. A'e tawhu wà, a'e tàpuz wà no,

Uzeapo putar ma'e heityk pyrer romo wà nehe.

29 Numumaw kwaw 'ar tetea'u hemetarer katu ma'e romo wiko pà nehe.

Ima'e paw ukàzym putar izuwi nehe.

Te i'àgaw ukàzym putar ywy wi nehe.

30 Awa ikatu 'ym ma'e nuhem kwaw ipytunaw wi nehe.

Nuzawy kwaw ywyra hàkàgwer ukaz ma'e kwer hereko har nehe.

Ywytu weraha a'e ywyra iputyr paw rupi izuwi.

31 Nukwaw katu kwaw ma'e. Uzeruzar temu'emaw rehe.

A'e rupi upyhyk putar temu'emaw wemiapo kwer hekuzaromo nehe.

32 Uxinig putar u'ar 'ym mehe we nehe.

Nuzawy kwaw ywyra hàkà uxinig ma'e kwer hezuz pixik 'ym ma'e ràm hereko har.

33 Amo uwà'yw a'e, weityk u'a kwer iakyr mehe we a'e.

Nuzawy kwaw agwer uwà'yw. Nuzawy kwaw uri 'yw uputyr heitykar.

34 Naheta kwaw izuapyapyr ikatu 'ym ma'e wanupe wà nehe.

Tata umumaw putar imunar ma'e wanàpuz nehe no.

35 Umume'u ikatu 'ym ma'e wemaipo ràm wà. Uzapo wemiawy wà no.

Xo amo wanupe wemu'em àwàm rehe zo ima'enukwaw wà, xo amo wanehe umunar àwàm rehe zo ima'enukwaw wà.