1 Napuner tària'i kwaw hepytuhemaw rehe.

Hereko haw upaw etea'i.

Hetym àwàm heràro iko.

2 Upuka ma'e umàmàn heywyr wà.

Aze uze'eg zemueteahy herehe wà, napuner kwaw wanehe hezepykaw rehe.

3 O Tupàn, xo ne zo erepuner hepyro haw rehe azeharomoete.

Naheta kwaw amo henewer haw imekuzar àràm wà.

4 Erewàpytym a'e upuka ma'e wama'enukwaw paw wanuwi ne.

Nezewe mehe nukwaw katu kwaw ma'e wà.

Hereityk kar zo pe wanupe nehe.

5 Nezewe i'i teko wà. — Aze amo uzapo ikatu 'ym ma'e umyrypar wanupe temetarer ipyhyk pà wà nehe,

Iapo arer ima'uhez putar wà nehe, i'i wà.

6 Teko uze'eg zemueteahy herehe a'e ze'eg imume'u pà wà.

Uzenymon wà heruwa rehe wà no.

7 Apuraraw ma'erahy tetea'u teko ihe. Te naherehàpyhàgatu kwaw kury.

Heretekwer nuzawy kwaw ma'e i'àgaw a'e.

8 Herexak mehe hero awa ikatu ma'e wanupe ihe.

— Tupàn uzepyk putar nerehe nehe, ta'e nerezeruzar kwaw hehe ne xe, i'i ihewe wà.

9 A'e awa ikatu ma'e a'e wà, imuawate pyr a'e wà, nupytu'u kwaw herehe uze'eg ire nezewe wà.

— Azeharomoete ureze'eg, i'i wiwi tuweharupi wà.

10 Aze mo uzewyr xe wà,

Naexak kwaw ni pitài ma'e kwaw katu har ihe, wainuinuromo ihe.

11 Hereko haw upaw oho iko.

Napuner kwaw heremimutar iapo haw rehe.

Ma'e hàrogatu pyr hepy'a pe har oho ihewi paw rupi.

12 — 'Aromo ipytunahy, i'i mua'u hemyrypar ihewe wà.

— Tatainy uhem etea'i iko, i'i ihewe ipytunahy haw myteromo wà.

13 Heràpuz umàno ma'e kwer wapyta haw pe hin putar nehe.

Azeàpàrirog putar heker pà ipytunaw rehe nehe.

14 — Hetymaw wiko heru romo, a'e putar nehe.

Merua'yr wiko hehy romo wà, hereinyr romo wà.

15 Aze nezewe haw uzeapo nehe, ma'e àrogatu putar nehe.

Aipo amo upuner ikatu ma'e ihewe uzeapo ma'e ràm hexakaw rehe wà.

16 Aipo heremiàro wezyw putar ipupyaikaw pyrer umàno ma'e kwer wapyta haw pe har pe nehe.

Aipo upytu'u putar hepyr ywy iwy pe nehe.