1 Ko 'ar rehe awa ihewi ipyahu wera'u ma'e upuka herehe wà.

Wanu na'ikatu kwaw wà.

Namono kwaw a'e teko ni hereimaw zawar wainuromo ihe wà, zawar àràpuhàràn wamono'ogar wainuromo ihe wà.

2 Wazywa ikàgaw na'ikatu kwaw ihewe.

Awa iagaiwahy ma'e romo wanekon wà.

3 Na'ikàg kwaw ta'e umumaw 'ar tetea'u umai'u 'ym pà wà, ma'e hereko 'ym pà wà.

Pyhaw ywyxiguhu rehe muite teko wanuwi, uxi'u ma'e hapo uxinig ma'e i'u pà wà.

4 Upyhyk ka'akyr wà, ywyra pekwer wà no,

U'u ma'e hapo ikatu 'ym ma'e wà.

5 Teko omono kar a'e awa umyter wi wà.

Uhapukaz wanupe wamuhem kar pà imunar ma'e zàwenugar ài wà.

6 Upyta yrykaw typawer pe wà.

Wiko itakwaruhu pupe wà, ita inuromo wà.

7 Uze'eg miar ài ka'akyr inuromo wà.

Uzemono'og xu iwy pe wà.

8 Teko ikatu 'ym ma'e wà. Teko her 'ym ma'e wà.

Teko omono kar uiwy wi wà.

9 Ko 'ar rehe a'e teko ur herehe uze'eg urywahyahy pà wà.

Upuka herehe wà. 10 Ihuhuk wer herehe ume'e mehe wà.

Te uzenymon heruwa rehe wà.

11 Tupàn wenuhem hekàgaw ihewi. Ikàg 'ym ma'e romo heapo.

A'e rupi a'e teko wikwahy ihewe wà, ikatu 'ym ma'e iapo pà ihewe wà.

12 A'e teko iaiw ma'e heàmàtyry'ym wà.

Hemuzàn kar wà, uzeagaw hemumaw pà wà.

13 Nahemuhem kar kwaw uzewi wà. Uzeagaw hemumaw pà wà.

Ni amo numupytu'u kar kwaw wazeagaw ire wà.

14 Wixe pàrirogawtàtà ikwar rupi wà.

Tàpuz heityk pyrer myter pe uzemomor pà hekutyr wà.

15 Akyzeahy tuwe ihe.

Ywytuhu weraha ka'akyr uxinig ma'e muite a'e. Nezewegatete weraha hekàgaw muite ihewi wà no.

Ywàkun ukàzym na'arewahy. Nezewegatete heremetarer upaw ihewi no.

16 Naherekuwe wer kwaw ihe kury.

Ikatu ma'e hàro 'ymaw uzeapo hezar romo no.

17 Pyhaw hekagwer hahy tetea'u ihewe.

Herahy haw nupaw kwaw ihewi.

18 Tupàn hepyhykahy he'az rehe.

Wenuhem hekamir ihewi hepyhyk mehe.

19 Hereityk to'om pupe.

Nazawy kwaw ywy imuku'i pyrer. Aiko tanimuk ài.

20 O Tupàn, aze'eg newe hepytywà àwàm henoz pà newe. Nerewazar kwaw heze'eg ihewe ne.

Aze'eg newe. Nerezekaiw kwaw herehe.

21 Erepuraraw kar e ma'erahy ihewe.

Paw rupi nekàgaw pupe heàmàtyry'ym pe ne.

22 Hereraha kar pe ywytu pe.

Ywytuaiw pupe hemomor pe ko rupi, kwe rupi no.

23 Hereraha pe iko umàno ma'e kwer wapyta haw pe ne. Akwaw neremiapo.

Wikuwe ma'e paw uzeàwàxi putar a'e pe amo 'ar mehe wà nehe.

24 Awa imumaw pyrer romo aiko ihe. Màràzàwe tuwe heàmàtyry'ym pe ne.

Napuner kwaw ma'e iapo haw rehe. Xo hepuhareko àwàm henoz taw rehe zo apuner.

25 Aipo nazai'o kwaw amo teko wanehe we ma'erahy ipuraraw mehe ihe.

Aipo napuhareko kwaw hemetarer 'ym ma'e ihe wà.

26 Àro herurywete àwàm. Ur iaiw haw ihewe.

Àro tatainy. Ur ipytunahy haw ihewe.

27 Hepy'a nahurywete kwaw. Nupytu'u kwaw.

Amumaw 'ar tetea'u ma'erahy ipuraraw pà.

28 Aiko hezemumikahy pà. Hereko haw nuzawy kwaw 'ar kwarahy hereko 'ymar.

Apu'àm teko paw wanenataromo hepytywà àwàm henoz pà.

29 Heze'egaw nuzawy kwaw hekuhemaw hezemumikahy haw hexak kar haw.

Nuzawy kwaw awarahu ize'egaw. Nuzawy kwaw wiranu ize'egaw no.

30 Hepir ipihun kury.

Heretekwer ukaz taku haw rehe.

31 Kwehe mehe tuweharupi ainu wioràwiràn imupu mehe, ainu xi'àm ipy mehe no.

Ko 'ar rehe xo teko zo ainu wazai'o mehe ihe wà kury, wazozok mehe ihe wà no.