2 — Peme'egatu nehe, tua'uhez kwer wà.

Pezeapyaka katu nehe, Zuta ywy rehe har wà.

Uzeapo putar amo iaiwahy ma'e nehe.

Nuzeapo pixik kwaw agwer iaiw paw ko 'ar 'ym mehe we. Nuzeapo pixik kwaw zaneipy wa'ar rehe no.

3 Pemume'u uzeapo ma'e kwer pena'yr wanupe nehe.

Pemume'u uzeapo ma'e kwer pena'yr wanupe nehe, peze pena'yr wanupe nehe.

Nezewegatete wana'yr umume'u putar wa'yr wanupe a'e wà nehe no.

4 Ur tukur tetea'u xe wà. Waneta haw nuzawy kwaw ywàkun tetea'u wà.

U'u ma'e itym pyrer ma'etymaw nànàn wà.

Tukur izypy mehe ur ma'e kwer nu'u kwaw hezuz ma'e paw rupi wà.

Na'e ur amo tukur ywàkun zàwenugar wà. U'u ikurer wà.

5 Peme'egatu nehe, uka'u ma'e wà.

Peme'egatu pezai'o pà nehe.

Peiko win iputar har romo.

Tukur umumaw uwà paw wà.

Naheta kwaw win ipyahu ma'e penemi'u ràm romo nehe kury.

6 Ur tukur wà.

Nuzawy kwaw zauxiapekwer ikàg ma'e tetea'u wà.

Wixe heywy rehe wà.

Wanàz nuzawy kwaw zàwàruhu iriàw wanàz wà.

Haime katu zàwàruhu iriàw kuzà hàz ài wà.

7 Umumaw uwà tyw zaneko pe har wà.

Umumaw ma'e'yw pi her ma'e zaneko pe har wà no.

O'ok ywyra ape kwer ywyra wi wà.

Upyta xo hàkà xig ma'e zo.

8 Pezai'o kuzàwaza opoz pihun ma'e imunehew par ài nehe,

umen ràm imàno awer rehe uzai'o ma'e ài nehe.

9 Xaxeto Tupàn pe uma'ereko ma'e wà,

uzai'o waiko Tupàn Tuweharupi Wiko Ma'e hàpuzuhu pupe wà.

Ta'e teko nuerur kwaw temi'u a'e pe wà kury xe.

Ta'e nuerur kwaw win a'e pe wà kury xe.

10 Tukur umuaiw ko paw wà.

Umuaiw ywy paw wà no.

Teko ywy rehe har paw uzai'o waiko wà.

Ta'e umuaiw tukur arozràn a'e wà xe.

Ta'e uwà 'yw uxinig a'e wà xe. Ta'e uri 'yw uxinig a'e wà no xe.

11 Pezemumikahy nehe, ko pe uma'ereko ma'e wà.

Pezai'o nehe, uwà tyw wanehe uzekaiw ma'e wà,

ta'e naheta kwaw arozràn xirik her ma'e a'e kury xe.

Ta'e naheta kwaw arozràn xewar her ma'e a'e no xe.

Tukur umumaw temi'u ipo'o pyràm upaw rupi katete wà.

12 Uxinig uwà 'yw wà. Uxinig pi 'yw wà no.

Uxinig homà 'yw wà no. Uxinig inàzàràn 'yw wà no. Uxinig maxà 'yw wà no.

Ma'e'yw paw uxinig wà. Teko uzemumikahy wà.

13 Xaxeto wà, Tupàn henataromo ma'ea'yr zuka har wà,

pemunehew pàn ma'eryru iapo pyr pezemumikahy haw hexak kar pà nehe. Pezai'o nehe.

Tupàn hezar hemiruze'eg wà, pezur tàpuzuhu izywyr katu haw pe nehe.

Pemumaw pytun paw pezai'o pà nehe.

Ta'e naheta kwaw temi'u imur pyrer zanezar hàpuz me xe. Naheta kwaw uwà imur pyrer zanezar hàpuz me no.

14 Pemono'og teko Tupàn Hàpuzuhu pe pe wà nehe.

— Ximumaw amo 'ar zanemai'u 'ym pà nehe, zanekwaku pà nehe, peze wanupe nehe.

Pemono'og teko Zuta ywy rehe har paw wanuwihaw pe wà nehe,

Tupàn Tuweharupi Wiko Ma'e Zanezar hàpuzuhu pe pe wà nehe.

Peze'eg Tupàn pe nehe, pepytywà àwàm henoz pà nehe.

15 Kwa. Tupàn Tuweharupi Wiko Ma'e i'ar uhem wà iko.

A'e 'ar mehe Tupàn Ikàg Wera'u Ma'e werur putar ma'emumaw haw nehe.

Teko ukyze katu putar a'e 'ar mehe nehe.

16 Nazapuner kwaw zaneko wapyro haw rehe.

Tukur umumaw zanema'etymaw paw wà. Xixak wamumaw paw ma'e iapo 'ym pà zane.

Tupàn Zanezar hàpuzuhu pe naheta kwaw turywete haw, naheta kwaw mynykaw no.

17 Ko uxinig ma'e rehe nahezuz kwaw ma'eà'yz.

Teko nopo'o kwaw arozràn wà.

Tàpuz arozràn imonokatu haw u'ar uzekazeka pà wà.

18 Tapi'ak uze'eg waiko wà. Ta'e ima'uhez wà xe.

Tapi'ak awa wata kwerupi wà, ko rupi wà, he'o pà wà.

Ta'e naheta kwaw ka'api'i wanemi'u ràm romo xe.

Àràpuhàràn awa hawitu ma'e umàno waiko wà no.

19 Ahapukaz newe, Tupàn Tuweharupi Wiko Ma'e.

Ywyra uxinig paw wà. Ka'api'i uxinig paw wà no.

Nuzawy kwaw tata hemiapy kwer wà.

20 Te miar wenoz upytywà àwàm newe wà no.

Ta'e typaw yrykaw a'e xe.

Ywy nànàn ixinig awer umumaw ka'api'i.