1 Wama'eahy re Tupàn Tuweharupi Wiko Ma'e uze'eg Moizez pe Ereazar xaxeto Àràw ta'yr pe no.

2 — Pepapar awa Izaew 20 kwarahy henataromo hereko har paw wà nehe. Pepapar awa uzeànàm ma'e wainuromo har paw rupi pe wà nehe, aze upuner zauxiapekwer romo weko haw rehe wà nehe, i'i wanupe.

3-4 Moizez a'e, Ereazar a'e no, weruzar ize'eg wà. Omono'og awa zauxiapekwer romo wiko haw upuner ma'e paw rupi wà. Uzemono'og Moaw ywy rehe ywytyr heta 'ymaw rehe wà, Zotàw yrykawhu izywyr wà, Zeriko tawhu henataromo wà. Amume'u putar Izaew Ezit ywy wi uhem ma'e kwer waner xe ihe wà nehe:

5 Humen izuapyapyr uzeànàm ma'e wanu waner wà (Humen wiko Zako ta'yr ipy romo): Enok, Paru, 6 Ezerom, Karomi. 7 Awa a'e teko wainuromo har wapapar mehe heta 43.730 wà. 8 Paru umuzàg amo wà: Eriaw, 9 ta'yr wà no: Nemuew, Nàtà, Àmiràw. (A'e 'ym mehe teko wexaexak Nàtà Àmiràw rehe we wà. Uzàmàtyry'ym Moizez wà. Uzàmàtyry'ym Àràw wà no. Uzemono'og Kora hemiruze'eg wanehe we Tupàn Tuweharupi Wiko Ma'e iàmàtyry'ym mehe wà. 10 Ywy uzepupeka wamokon pà a'e. Umàno Kora rehe we hemiruze'eg wanehe we wà. Tata uzuka 250 awa wà. Teko wexak a'e ma'e izeapo mehe wà. — Aze xiàmàtyry'ym Tupàn nehe, zanezuka putar nehe, i'i uzeupeupe wà. 11 Tupàn nuzuka kwaw Kora ta'yr wà.)

12 Ximeàw izuapyapyr uzeànàm ma'e wanu waner wà: Nemuew, Zamim, Zakim, 13 Zera, Xau. 14 Awa a'e teko wainuromo har wapapar mehe heta 22.200 wà.

15 Kaz izuapyapyr uzeànàm ma'e wanu waner wà: Zepon, Agui Xuni, 16 Ozini, Eri, 17 Aroz Areri. 18 Awa a'e teko wainuromo har wapapar mehe heta 40.000 wà.

19-21 Zuta izuapyapyr uzeànàm ma'e wanu waner wà: Xera, Perez, Zera, Ezerom, Amu. Mokoz Zuta ta'yr umàno Kànàà ywy rehe wà. (Er, Onà waner wà.) 22 Awa a'e teko wainuromo har wapapar mehe heta 76.500 wà.

23 Ixakar izuapyapyr uzeànàm ma'e wanu waner wà: Tora, Puwa, 24 Zazu, Xinirom. 25 Awa a'e teko wainuromo har wapapar mehe heta 64.300 wà.

26 Zemurom izuapyapyr uzeànàm ma'e wanu waner wà: Xerez, Erom, Zareew. 27 Awa a'e teko wainuromo har wapapar mehe heta 60.500 wà.

28 Manaxe a'e, Eparai a'e no, wiko Zuze ta'yr romo wà.

29 Manaxe izuapyapyr uzeànàm ma'e wanu waner wà: Makir Manaxe ta'yr wiko Zireaz tu romo. Zireaz umuzàg 'aw uzeànàm ma'e wà: 30 Zezer, Erek, 31 Aziriew, Xikez, 32 Xemi, Eper. 33 Zeropeaz Eper ta'yr nata'yr kwaw. Xo tazyr zo heta izupe wà. Na'aw tazyr waner xe wà: Makira, Noa, Ogira, Miwka, Xiza. 34 Awa a'e teko wainuromo har wapapar mehe heta 52.700 wà.

35 Eparai izuapyapyr uzeànàm ma'e wanu waner wà: Xutera, Meker, Tàà. 36 Erà izuapyapyr wiko Xutera izuapyapyr romo azeharomoete wà. 37 Awa a'e teko wainuromo har wapapar mehe heta 32.500 wà. Amume'u Zuze izuapyapyr uzeànàm ma'e wanu waner kwez xe ihe wà.

38 Mezàmi izuapyapyr uzeànàm ma'e wanu waner wà: Mera, Azimew, Airàw, 39 Xupa, Upà. 40 Arize izuapyapyr wà, Nààmà izuapyapyr wà no, wiko Mera izuapyapyr romo azeharomoete wà. 41 Awa a'e teko wainuromo har wapapar mehe heta 45.600 wà.

42 Nà izuapyapyr uzeànàm ma'e tu her: Xuàw. 43 Awa a'e teko wainuromo har wapapar mehe heta 64.400 wà.

44 Azer izuapyapyr uzeànàm ma'e wanu waner wà: Imina, Iziwi, Meri. 45 Emer izuapyapyr wà, Mawkiew izuapyapyr wà no, wiko Meri izuapyapyr romo azeharomoete wà. 46 Azer tazyr a'e, Xera her romo a'e. 47 Awa a'e teko wainuromo har wapapar mehe heta 53.400 wà.

48 Napitari izuapyapyr uzeànàm ma'e wanu waner wà: Zazeew, Kuni, 49 Zezer, Xirez. 50 Awa a'e teko wainuromo har wapapar mehe heta 45.400 wà.

51 Awa Izaew paw wainuromo har wapapar mehe heta 61.730 wà.

52 Tupàn Tuweharupi Wiko Ma'e uze'eg Moizez pe.

53 Emuza'aza'ak ywy nehe, ipegegwer wamono pà Zako ta'yr wazuapyapyr wanupe nehe. Aze heta tetea'u wà, emono ywy pehegwer uhua'u ma'e wanupe nehe. 54-56 Emuza'aza'ak ywy ita'i ma'e ipapar haw hereko har momor haw pupe nehe. Ywy pehegwer uhu wera'u ma'e emono Zako ta'yr izuapyapyr heta tetea'u ma'e wanupe nehe. Ywy pehegwer pixik wera'i ma'e emono Zako ta'yr izuapyapyr heta wewer ma'e wanupe nehe.

57 Erewi izuapyapyr uzeànàm ma'e wanu waner wà: Zeroxon, Koat, Merari. 58 Amo Àràw izuapyapyr uzeànàm ma'e wanu waner wà: Irimini, Emerom, Mari, Muzi, Kora. Koat umuzàg Ànàràw. 59 Àriràw wereko Zokemez Erewi tazyr wemireko romo. Zokemez uzexak kar Ezit ywy rehe. Zokemez omono mokoz ta'yr Ànàràw pe wà: Àràw, Moizez waner romo wà. Umur pitài tazyr izupe no: Mirià her romo a'e. 60 Àràw umuzàg 4 wa'yr wà: Nanaw, Amiu, Ereazar, Itamar. 61 Nanaw a'e, Amiu a'e no, umàno tata iapo katu pyrer 'ym Tupàn Tuweharupi Wiko Ma'e pe imono mehe a'e wà. 62 Upapar awa Erewi izuapyapyr pitài zahy henataromo hereko har wà. Heta 23.000 wà. Nupapar kwaw amogwer Izaew izuapyapyr wainuinuromo wà. Ta'e Izaew waiwy imuza'aza'ak mehe nupyhyk kwaw ywy pehegwer wà xe.

63 Moizez a'e, xaxeto Ereazar a'e no, upapar Izaew wà, ywytyr heta 'ymaw Moaw ywy rehe har rehe wà, Zotàw yrykawhu izywyr Zeriko henataromo wà. 64 A'e 'ym mehe Xinaz ywyxiguhu rehe wiko mehe Moizez a'e, Àràw a'e no, upapar Izaew a'e wà. Wapapar haw pitài haw romo a'e. Upapar Izaew ywytyr heta 'ymaw Moaw ywy rehe har rehe wà, Zotàw yrykawhu izywyr Zeriko henataromo wà. Wapapar haw mokoz haw romo a'e. Naheta kwaw teko pitài haw ipapar pyrer mokoz haw ipapar pyrer wainuinuromo wà. 65 — Paw rupi umàno putar ywyxiguhu rehe wà nehe, i'i Tupàn Tuweharupi Wiko Ma'e ipapar pyrer izypy mehe arer wanupe. Umàno azeharomoete wà. Karew Zepone ta'yr a'e, Zuzue Nun ta'yr a'e no, xo a'e zo numàno kwaw wà.