1 O Tupàn Tuweharupi Wiko Ma'e, amume'u putar nekatu haw hepy'a pupe azeharomoete nehe.

Amume'u putar ma'e ikatuahy ma'e neremiapo kwer paw ihe wà nehe no.

2 Herurywete putar nerehe ihe nehe. Hemurywete kar putar pe ne nehe.

Azegar putar nekatu haw rehe nehe, Tupàn Ywate Wera'u Har.

3 Nezur mehe heàmàtyry'ymar uzàn newi wà.

U'ar wà, umàno wà.

4 Ereiko pureruze'eg ma'e ikatu ma'e romo.

Ereapyk nerenaw rehe. Eremume'u katu teko wanemiapo kwer.

Hekatu haw eremume'u.

5 Eremume'u nerehe uzeruzar 'ym ma'e wanemiapo kwer. Eremumaw teko ikatu 'ym ma'e ne wà.

Teko na'ima'enukwaw pixik kwaw a'e teko wanehe wà nehe.

6 Ereityk tawhu zaneàmàtyry'ymar waneko haw ne wà.

Eremumaw tuwe ne wà.

Ni amo nuzapo wi kwaw wà nehe. Ni amo na'ima'enukwaw kwaw wanehe wà nehe.

7 Tupàn Tuweharupi Wiko Ma'e wiko putar tuwihawete romo tuweharupi nehe, upytu'u 'ym pà nehe.

Wapyk uwenaw rehe. Umume'u teko wanemiapo kwer.

8 Tupàn weruze'eg ywy rehe har ukatu haw rehe wà.

Umume'u teko wanemiapo kwer iawy 'ym pà a'e.

9 Tupàn Tuweharupi Wiko Ma'e wiko purumimaw romo teko wanupe a'e, aze amo upuraraw kar ma'erahy wanupe a'e wà.

Uzekaiw wanehe ma'erahy ipuraraw mehe wà.

10 O Tupàn Tuweharupi Wiko Ma'e. Nekwaw har uzeruzar nerehe wà.

— Hepytywà pe nehe, aze amo i'i newe, nereityk kwaw ne wà xe.

11 Pezegar Tupàn Tuweharupi Wiko Ma'e Zeruzarez pe har wanuwihawete ikatu haw rehe nehe.

Pemume'u hemiapo kwer teko ywy nànànar wanupe nehe.

12 Ta'e Tupàn ima'enukwaw ma'erahy ipuraraw har wanehe a'e xe.

Naheharaz kwaw wakuhem awer wanuwi a'e.

Uzepyk wanupe ma'erahy ipuraraw kar har wanehe no.

13 O Tupàn Tuweharupi Wiko Ma'e, hepuhareko pe nehe.

Herehe iakatuwawahy 'ym ma'e upuraraw kar ma'erahy ihewe wà.

Herexak pe ipuraraw kar mehe ne. Hepyro pe hemàno haw wi.

14 A'e rupi apu'àm iteko Zeruzarez tawhu pe har wanenataromo ihe.

A'e rupi amume'u nekatu haw wanupe.

Herurywete ta'e hepyro pe màno haw wi ne xe.

15 Teko nerehe uzeruzar 'ym ma'e uzapo ywykwar teko watym àwàm romo wà.

A'e ae u'ar ipupe wà. Uzapo miar zuka haw zàwenugar wà. A'e re miar zuka haw upyhyk uwapo arer wà.

16 Teko ukwaw Tupàn Tuweharupi Wiko Ma'e a'e wà, ta'e umume'u katu teko wanemiapo kwer a'e xe.

Ikatu 'ym ma'e u'ar wemiapo kwer miar zuka haw zàwenugar pupe a'e wà.

17 Ikatu 'ym ma'e a'e wà, Tupàn iputar 'ymar upaw rupi a'e wà no,

Oho putar umàno ma'e kwer wapyta haw pe wà nehe.

18 Teko heharaz hemetarer 'ym ma'e wanuwi wà. Amo 'ar mehe amo ima'enukwaw putar wanehe wà nehe.

Ma'erahy ipuraraw har nuàro kwaw upyro àwàm ko 'ar rehe wà. Amo 'ar mehe uhem putar wapyro àwàm wà nehe.

19 Epu'àm o Tupàn Tuweharupi Wiko Ma'e.

Emupytu'u kar teko neàmàtyry'ym ire ne wà nehe.

Emuapyk kar nerehe uzeruzar 'ym ma'e nerenataromo ne wà nehe. Emume'u wanemiapo kwer nehe. Ezepyk ikatu 'ym ma'e wanehe nehe.

20 O Tupàn Tuweharupi Wiko Ma'e, emukyze kar a'e teko ne wà nehe.

Teko romo zutyka'i wanekon wà. Na'ikàg kwaw ne ài wà. Ekwaw kar wakàg 'ymaw wanupe nehe.