1 O Tupàn Tuweharupi Wiko Ma'e uruamutar katu tuwe ihe.

Ereiko hekàgaw romo ne.

2 Tupàn Tuweharupi Wiko Ma'e wiko hepyro har romo. Tupàn Tuweharupi Wiko Ma'e wiko hemukàg kar har romo no.

Tupàn hezar wiko itahu hemimaw romo.

Ni amo nupuner kwaw ikatu 'ym ma'e iapo haw rehe ihewe wà nehe, ta'e aiko hehe we ihe xe.

Hepyk u'yw wi purupykaw ài a'e.

Uzàmàtyry'ym heàmàtyry'ymar hepyro pà.

3 Aze'eg Tupàn pe hepytywà àwàm henoz pà izupe ihe.

A'e ae hepyro heàmàtyry'ymar wanuwi a'e.

Pemume'u Tupàn Tuweharupi Wiko Ma'e ikatu haw nehe.

4 Hemàno àwàm heàpixipixi iko kyhàhàm ài a'e.

Hemumaw pàwàm ur he'aromo ykotok uhua'u ma'e ài no.

5 Hemàno haw heàpixipixi ukyhàhàm pupe a'e.

Hetym àwàm uzapo miar zuka haw zàwenugar hepyhyk pà a'e no.

6 Hemàno àwàm wi hekyze katu mehe aze'eg Tupàn Tuweharupi Wiko Ma'e pe ihe.

— Hepytywà pe nehe, a'e izupe.

Weinu heze'eg wàpuz ywak rehe har pe hin mehe.

Wenu hepytywà àwàm henoz mehe a'e.

7 Na'e ywy uryryryryz tuwe uzemuaiw pà a'e.

Ywytyr ipy uryryryryz uwauwak pà a'e wà no,

Ta'e wikwahy Tupàn a'e xe.

8 Uhem tàtàxiner ipygwar wi a'e.

Tàtàpyzgwer uhem izuru wi, ta'e ma'e hapy har uhem izuru wi xe.

9 Uwàpytymawok ywak uwezyw pà a'e.

Ywàkun upy wy pe wereko wezyw mehe.

10 Uwewe amo kerumin Tupàn henaw rehe uzekaiw ma'e ikupe pe.

Na'arewahy oho ywytu rupi.

11 Uzepyk ipytunaw pupe.

Ywàkun ipihun ma'e 'y tetea'u hereko har izywyr upu'àm wà.

12 Tàtàpuzgwer a'e wà, àmàntàtà ita zàwenugar a'e no, uhem àmàn iweraw paw wi a'e wà, iweraw paw Tupàn henataromo har wi a'e wà.

Waxaw a'e ywàkun ipihun ma'e oho wà.

13 Na'e Tupàn Tuweharupi Wiko Ma'e wànoànog ywak rehe kury.

Teko wenu Tupàn Ywate Wera'u Har ize'eg wà kury.

14 Omomor u'yw.

Umuhàmuhàz wàmàtyry'ymar wà.

Àmàn iweraw paw heny katu ma'e pupe umuzàn kar a'e wà.

15 Ne Tupàn Tuweharupi Wiko Ma'e ne, neàmàtyry'ymar wanehe nezepyk mehe,

Nekwahy haw rupi wakutyr neànoànog mehe,

Ywy yryhu wy pe har uzeupir a'e.

Ita ywy wy pe har uzexak kar a'e no.

16 Tupàn ywak rehe har upyho opo ihewe. Hepyhyk a'e.

Yryhu wi hepyro.

17 Hepyro Tupàn heàmàtyry'ymar ikàg ma'e wanuwi,

Herehe iakatuwawahy 'ym ma'e wanuwi.

A'e paw ikàg wera'u ihewi wà. Nezewe rehe we hepyro wanuwi a'e.

18 Hereko haw ihewe zawaiw katu mehe, heàmàtyry'ym wà a'e wà.

Tupàn Tuweharupi Wiko Ma'e hepyk wanuwi a'e mehe.

19 Hemunyryk ikatu 'ymaw wi.

Hepyro ta'e heamutar katu a'e xe.

20 Tupàn Tuweharupi Wiko Ma'e umekuzar katu putar hereko haw a'e nehe, ta'e aiko imunar 'ym ma'e romo hemu'em 'ym ma'e romo ihe xe.

Uzapo ikatu ma'e ihewe, ta'e nazapo kwaw ikatu 'ym ma'e ihe xe.

21 Tuweharupi aruzar Tupàn Tuweharupi Wiko Ma'e ze'eg ihe.

Napytu'u pixik kwaw heruzar ire.

22 Azapo ma'e ize'eg rupi upaw rupi.

Nazuhaw pixik kwaw ize'eg kwehe arer.

23 Tupàn Tuweharupi Wiko Ma'e ukwaw ikatu 'ym ma'e heremiapo 'ymaw a'e.

Ukwaw muite ikatu 'ym ma'e wi hetyrykaw no.

24 A'e rupi umekuzar heremiapo kwer a'e, ta'e naiko kwaw imunar ma'e romo ihe xe.

Ukwaw ikatu 'ym ma'e iapo har romo hereko 'ymaw a'e.

25 Ne Tupàn Tuweharupi Wiko Ma'e neretyryk kwaw ikatu ma'e nerehe uzeruzar ma'e wanuwi ne.

Nekatuahy ikatuahy ma'e wanupe no.

26 Ereiko ikatuahy ma'e romo ikatu 'ymaw wi utyryk ma'e wanupe.

Ereiko ikatu 'ym ma'e wàmàtyry'ymar romo.

27 Erepyro ma'e hereko 'ymar ne wà.

Emuigo kar amogwer wanuwi wiko wera'u ma'e ma'e hereko 'ymar romo ne wà.

28 Ne, Tupàn Tuweharupi Wiko Ma'e, erekwaw kar ma'e ihewe ne.

Ne, hezar, eremumaw ipytunaw rehe hereko haw ne.

29 Eremur nekàgaw ihewe heàmàtyry'ymar waàmàtyry'ym kar pà ihewe.

Eremur nepuner haw ihewe wakàgaw heityk kar pà ihewe no.

30 A'e Tupàn heremimume'u kwer a'e, uzapo ma'e paw ikatuahy ma'e romo a'e.

Uzapo tuwe ma'e wemimume'u kwer a'e no.

Nuzawy kwaw u'yw wi purumimaw a'e,

Ikàgaw hekar har wanupe a'e.

31 Tupàn Tuweharupi Wiko Ma'e wiko zanezar romo a'e. Naheta kwaw amo.

Xo Tupàn zo wiko zanepyro har romo.

32 A'e ae hemukàg kar har romo hekon a'e.

Hemunyryk kar ikatu 'ymaw wi wyzài ywy rehe heho mehe.

33 Hemuata katu kar hemu'ar kar 'ym pà a'e.

Hemonokatu ywytyr rehe no.

34 Hemu'e zeàmàtyry'ymawhu rehe a'e.

Nezewe mehe apuner heywyrapar ikàg wera'u ma'e pupe u'yw imomor haw rehe.

35 Ne, hezar, ereiko u'yw wi hepykaw ài ne.

Hepytywà pe ne, a'e rupi hekàg ihe kury.

Nekàgaw hemuigo kar wikuwe ma'e romo.

36 Nahepyhyk kar kwaw pe heàmàtyry'ymar wanupe.

Ni pitài haw na'ar kwaw ihe.

37 Aha heàmàtyry'ymar wanaikweromo wapyhyk pà heràro 'ym mehe ihe wà.

Xo wamumaw ire zo apytu'u.

38 Azuhazuhaw ihe wà. Nupuner kwaw upu'àm wi haw rehe wà.

Heremityk kwer romo wiko hepy iwy pe wà.

39 Eremur nekàgaw ihewe waàmàtyry'ym mehe ne.

Eremur waneitykaw ihewe no.

40 Eremuzàn kar wamono ihewi ne wà.

Amumaw herehe iakatuwawahy 'ym ma'e ihe wà.

41 Uhapukaz wà. — Urepytywà pe nehe, i'i wà.

Ni amo nupuner kwaw wapyro haw rehe wà.

Uze'eg Tupàn Tuweharupi Wiko Ma'e pe wà. Nuwazar kwaw waze'eg wanupe.

42 Azuhazuhaw ihe wà.

Uzeapo ywy imuku'i pyrer romo wà. Ywytu weraha a'e ywy imuku'i pyrer.

Apyrog wanehe. Nuzawy kwaw to'om pe rupi heta ma'e ihewe wà.

43 Aze teko ipytu'u wer heremiruze'eg romo wiko re wà nehe, neremupytu'u kar kwaw ne wà.

Hemuigo kar pe teko ywy nànànar wanuwihawete romo nehe.

Teko amo 'ar mehe heremigwaw 'ym a'e wà, wiko ihewe uma'ereko ma'e romo ko 'ar rehe a'e wà kury.

44 Teko amo ae ywy rehe har uzeamumew herenataromo wà.

Aze aze'eg wanupe, weruzar heze'eg wà.

45 Uhem wakàgaw wanuwi.

Uryryryryz wàpuz tàtà ma'e wi uhem pà wà.

46 Tuwe Tupàn Tuweharupi Wiko Ma'e wikuwe awyzeharomo a'e nehe.

Pemume'u hepyro har ikatu haw nehe.

Tupàn wiko hepyro har romo a'e. Pemume'u uhua'u haw nehe.

47 Umur heàmàtyry'ymar waneitykaw ihewe a'e.

Weruzar kar heze'eg teko paw wanupe no.

48 Hemunyryk kar heàmàtyry'ymar wanuwi.

Ne, hezar, eityk kar heàmàtyry'ymar ihewe ne wà nehe.

Hemunyryk kar pe awa puruzuka ma'e wanuwi nehe no.

49 A'e rupi, Tupàn Tuweharupi Wiko Ma'e, amume'u putar nekàgaw teko ywy nànànar wanupe nehe.

Amuzàg putar zegar haw nekatu haw imume'u haw newe nehe no.

50 Ne, Tupàn, eremur iàmàtyry'ymar waneitykaw uhua'u ma'e tuwihawete neremiruze'eg pe ne.

Erexak kar nepuruamutar katu haw neremixak kwer pe no,

Tawi pe, izuapyapyr wanupe no, tuweharupi nehe.