1 O tuwihawete, tuwe Tupàn Tuweharupi Wiko Ma'e uwazar neze'eg ma'erahy ipuraraw mehe har newe nehe,

Tuwe Tupàn Zako izar nepyro nehe.

2 Tuwe Tupàn umur kar nepytywà haw wàpuzuhu wi nehe.

Tuwe ur ywytyr Xiàw her ma'e wi nepytywà pà nehe.

3 Tuwe Tupàn ima'enukwaw neremimono kwer paw wanehe nehe.

Tuwe ma'ea'yr hapy haw rehe ukaz ma'e kwer paw ikatu izupe nehe.

4 O Tuwihawete, tuwe Tupàn umur neremimutar newe nehe.

Tuwe neremiapo putar haw paw uzeapo katu wà nehe.

5 A'e rupi uruhapukaz putar izeapo katu awer rehe nehe.

Urupir katu putar tuwe pàn nerer hereko har nehe, neremiapo kwer ikatu ma'e rehe urema'enukwaw katu pà nehe.

Urumume'u putar Tupàn urezar ikatu haw nehe.

O Tuwihawete, tuwe Tupàn umur neremimutar paw newe nehe.

6 Tupàn Tuweharupi Wiko Ma'e umur iàmàtyry'ymar waneitykaw tuwihawete wemixak kwer pe a'e. Akwaw imur awer ihe.

Uwazar ywak ikatu ma'e wi a'e.

Umur iàmàtyry'ymar waneitykaw izupe ukàgaw rupi.

7 Amo uzeruzar ywyramawa zeàmàtyry'ymawhu pe har wanehe wà.

Amo uzeruzar weimaw kawaru wanehe wà.

Zane zazeruzar Tupàn Tuweharupi Wiko Ma'e Zanezar rehe zane.

8 Uzepyapi putar u'ar pà wà nehe.

Zane zapu'àm wi putar zanekàg romo zane nehe.

9 O Tupàn Tuweharupi Wiko Ma'e, emur tuwihawete iàmàtyry'ymar waneityk àwàm izupe nehe.

Eze'eg urewe urepytywà àwàm newe henoz mehe nehe.