1 O Tupàn Tuweharupi Wiko Ma'e, ezàmàtyry'ym heàmàtyry'ymar ne wà nehe.

Eityk herehe ipureityk wer ma'e ne wà nehe.

2 Epyhyk u'yw wi nemimaw nehe. Epyhyk nekamir tàtà ma'e nehe no.

Ezur hepytywà pà nehe.

3 Epyhyk nepurukutukaw ipuku ma'e nehe. Epyhyk itazy puruzuka haw nehe no.

Ezàmàtyry'ym herehe ipuruzuka wer ma'e ne wà nehe.

Hepyro har romo nereko haw emume'u ihewe nehe.

4 Tuwe amo weityk

Herehe ipuruzuka wer ma'e a'e wà nehe.

Tuwe wiko ikàg 'ym ma'e wazàwe wà nehe.

Tuwe hezuka àwàm imume'u har uzàn oho umaranugar romo wà nehe.

5 Tuwe nuzawy kwaw ka'akyr ywytu hemiraha wà nehe,

Tupàn Tuweharupi Wiko Ma'e heko haw pe har wakutyr tur mehe wà nehe.

6 Tuwe wanape ràm uzeapo hexak katu pyr 'ym nehe.

Tuwe ihym wapy iwype nehe, Tupàn Tuweharupi Wiko Ma'e heko haw pe har wanaikweromo iho mehe nehe.

7 Uzapo e miar zuka haw zàwenugar a'e wà, herehe ipuruzuka mehe a'e wà xe.

Uzapo ywykwaruhu ohoete ma'e hepyhyk àwàm romo wà.

8 Nezewe rehe we, wamàno haw uhem putar wanupe hàro 'ym mehe nehe.

Wanemiapo kwer miar zuka haw zàwenugar upyhyk putar a'e teko a'e wà nehe.

U'ar putar ywykwar pupe wà nehe. Uzezuka kar putar ipupe wà nehe.

9 A'e mehe herurywete putar ihe nehe,

Tupàn hemiapo kwer rehe ihe nehe.

Hemurywete kar putar nehe, ta'e hepyro màno haw wi a'e xe.

10 Hepy'a paw pupe aze'eg putar newe ihe nehe.

— O Tupàn Tuweharupi Wiko Ma'e, naheta kwaw nezàwenugar a'e wà.

Aze ikàg ma'e uzàmàtyry'ym ikàg 'ym ma'e oho wà, erepytywà ikàg 'ym ma'e ne wà.

Erepyro hemetarer 'ym ma'e ne wà. Erezekaiw ma'e hereko 'ymar wanehe.

Erepyro a'e teko imunar ma'e wapo wi ne wà.

11 Awa ikatu 'ym ma'e hemu'em tuwihaw wanenataromo heremiapo kwer imume'u mehe wà.

Umume'u mua'u ikatu 'ym ma'e heremiapo kwer wà. Nazapo kwaw a'e ikatu 'ym ma'e ihe.

12 Uzapo ikatu 'ym ma'e ihewe heremiapo kwer ikatu ma'e hekuzaromo wà.

A'e rupi hezemumikahy haw umynehem hepy'a a'e.

13 Wama'eahy mehe amunehew kamir umàno ma'e kwer tymaw rehe har ihe.

Apytu'u hemai'u re ihe, ta'e azemumikahy wama'eahy haw rehe ihe xe.

Azeamumew Tupàn henataromo, izupe heze'eg pà wamukatu àwàm henoz tà.

14 Wanehe Tupàn pe heze'eg awer nuzawy kwaw hemyrypar rehe heze'eg awer. Nuzawy kwaw herywyr rehe heze'eg awer.

Ata hezeamumew pà umàno ma'e kwer itymaw rehe har ài ihe.

Nazawy kwaw uhy imàno awer rehe uzai'o ma'e ihe.

15 Na'e ma'erahy apuraraw ihe. A'e teko hurywete hema'erahy rehe wà.

Upyta heywyr herehe upukapuka pà wà.

Teko heremigwaw 'ym ukwaukwar herehe wà.

Hemuahyahy kar wà no.

16 Nuzawy kwaw uzemumyz 'ym ma'e rehe upuka ma'e wà. Upuka nezewe herehe uze'eg urywahyahy pà wà.

Ume'eahy herehe wà, na'iakatuwawahy kwaw herehe wà.

17 O hezar, màràn 'ar eremumaw putar wanehe neme'e e pà nehe.

Hepyro wanuwi nehe, heàmàtyry'ym mehe nehe.

Hepyro a'e zàwàruhu iriàw zàwenugar wanuwi nehe.

18 A'e mehe amume'u putar nekatu haw teko tetea'u wanenataromo ihe nehe.

Teko tetea'u wamyter pe aze'eg putar nekatuahy haw rehe nehe.

19 Emurywete kar zo heàmàtyry'ymar hemu'em ma'e

Heretykaw rehe ne wà nehe.

Amo teko na'iakatuwawahy e kwaw herehe wà.

Emupuka kar zo herehe ne wà nehe.

Emupytu'u hemuaiw pawer rehe wapuka re ne wà nehe.

20 Nuze'eg kwaw uzemuryparypar ma'e ài wà.

Hemu'em tetea'u katu haw

Iputar har wanehe wà.

21 — Uzapo ikatu 'ym ma'e a'e, i'i mua'u tuwihaw wanenataromo herehe uhapukaz tà wà.

— Uruexak ikatu 'ym ma'e neremiapo kwer ure, i'i mua'u wà.

22 Ne o Tupàn Tuweharupi Wiko Ma'e erexak wanemu'em mehe ne wà.

A'e rupi epytu'u zo wakatu 'ymaw imume'u re nehe.

Eiko zo muite ihewi nehe.

23 Eme'e, hezar, hekatu haw imume'u pà nehe.

Epu'àm, hezar, heremiapo kwer ikatu haw rehe neze'eg pà nehe.

24 O Tupàn Tuweharupi Wiko Ma'e, nekatuahy ne.

A'e rupi emume'u ikatu 'ym ma'e iapo 'ymar romo hereko haw nehe.

O hezar, emurywete kar zo heàmàtyry'ymar

Herehe ne wà nehe.

25 Emuze'eg kar zo nezewe ne wà nehe.

— Ximumaw zane. Nezewe haw xiputar zane, i'i wer wà.

Tuwe ni'i kwaw nezewe wà nehe.

26 Eityk ma'erahy heremipuraraw rehe hurywete ma'e ne wà nehe. Tuwe maranugar haw upyk a'e teko wà nehe.

— Zaiko wera'u izuwi zane, i'i amo wà.

Tuwe wamaranugar haw upyk a'e teko wà nehe.

Tuwe iaiw paw upyk wà nehe no.

27 Amo teko uputar hekatu haw imume'u àwàm wà nehe.

Tuwe a'e teko uhapukaz urywete haw rehe wà nehe.

Tuwe uze'eg nezewe tuweharupi wà nehe.

— Tupàn Tuweharupi Wiko Ma'e uhua'u a'e.

Hurywete a'e no, ta'e oho katu hemiruze'eg heko haw a'e no xe, tuwe i'i wà nehe.

28 Na'e amume'u putar nekatuahy haw ihe nehe.

Aze'eg putar nekatu haw rehe nehe, 'ar nàn nehe.