1 O Tupàn Tuweharupi Wiko Ma'e, ezepyk zo herehe nekwahy mehe nehe.

Ihewe nekwahy mehe, ezepyk zo herehe nehe.

2 Neru'yw purumuahy kar ma'e hekutuk a'e wà.

Herehe nezepykaw nepo pe har ipuhuz katu ihewe.

3 Erekwahy ihewe ne, a'e rupi hema'eahy ihe.

Heretekwer nànàn hema'eahy

Heremiapo kwer ikatu 'ym ma'e rehe.

4 Azeapypyk iteko hekatu 'ymaw 'y zàwenugar pupe.

Heremiapo kwer ipuhuz katu wera'u ihewe.

5 Hekutuk awer hezun inem pà a'e wà,

Ta'e azapo ma'e ma'e kwaw par 'ym ài ihe xe.

6 Umàno etea'i ma'e ài aiko. Azeamumew ihe.

Zi'itahy te kwarahy heixe mehe azai'o hepytu'u 'ym pà no.

7 Hema'eahy tuwe ihe.

Herakuahy haw nuzawy kwaw tata ihewe.

8 Nazawy kwaw umàno etea'i ma'e ihe. Azemumikahy no.

Hepy'a uzemumikahy.

Hekuhekuhem herahy haw wi no.

9 O hezar, erekwaw heremimutar ne,

Ta'e erenu herekuhemaw paw ne xe.

10 Hepy'a unununuk na'arewahy a'e. Nahekàg kwaw ihe.

Hereha nahuhàg kwaw ihe no.

11 Hemyrypar nuhem kwaw heruwake a'e wà,

Ta'e hepereperew ihe xe.

Te heànàm utyryk ihewi wà.

12 Herehe ipuruzuka wer ma'e uzapo hepyhyk àwàm wà, hepyhyk pà wà.

Herehe ipurukutuk wer ma'e umume'u heaiw àwàm ihewe wà.

Nupytu'u kwaw ikatu 'ym ma'e ihewe iapo àwàm rehe uma'enukwaw pà wà.

13 A'e rupi azemuigo kar mua'u ma'erenu 'ymar romo wanupe ihe. Nainu mua'u kwaw waze'eg.

Uze'eg 'ym ma'e romo azeapo mua'u wanupe. A'e rupi naze'eg kwaw wanupe ihe.

14 Aiko ze'eg iwazar 'ymar ài ihe,

Ma'e henu 'ymar ài ihe.

15 Nezewe rehe we azeruzar nerehe, o Tupàn Tuweharupi Wiko Ma'e.

Ne, Tupàn hezar, ereze'eg putar ihewe nehe.

16 Emurywete kar zo heàmàtyry'ymar heaiw paw rehe ne wà nehe.

Tuwe he'ar haw na'ikatu kwaw wanupe nehe.

17 Ta'e a'ar etea'i ihe xe.

Ma'erahy heremipuraraw nupaw pixik kwaw a'e.

18 Amume'u heremiapo kwer ikatu 'ym ma'e newe ihe,

Ta'e heremiapo kwer hemuzemumikahy kar a'e xe.

19 Heàmàtyry'ymar ikàg a'e wà. Huhàg a'e wà no.

Heta tetea'u teko herehe iakatuwawahy 'ym e ma'e a'e wà.

20 Amo teko uzapo ikatu 'ym ma'e ihewe ikatu ma'e hekuzaromo a'e wà.

Wiko heàmàtyry'ymar romo a'e wà, ta'e ikatu ma'e iapo haw rehe azeagaw ihe xe.

21 O Tupàn Tuweharupi Wiko Ma'e epuir zo ihewi nehe.

Etyryk zo ihewi nehe, hezar.

22 Hepytywà pe kutàri, o hezar, hepyro har.