1 Ze'eg ipuràg eteahy ma'e umynehem kar hepy'a,

Ko zegar haw tuwihawete pe imuapyk mehe pape rehe.

Heapeku nuzawy kwaw ze'eg imuapykar ikatu ma'e ikair haw a'e.

2 O Tuwihawete, ereiko ipuràg eteahy wera'u ma'e amo awa paw wanuwi ne.

Erekwaw neze'egatu haw teko wanuwa rupi no.

Tuweharupi Tupàn omono uze'egatu nerehe a'e.

3 Emono netakihepuku iapirer pupe neku'aw rehe nehe,

O tuwihawete ikàg ma'e, upuner ma'e, ipuràg eteahy ma'e,

4 Nekàgaw a'e, nepuràg eteahy haw a'e no, eremunehew kamir ài ne. Nezewe eho neàmàtyry'ymar wàmàtyry'ym pà nehe.

Epyro neze'eg azeharomoete har neàmàtyry'ymar wanuwi nehe. Epyro nekatu haw wanuwi nehe no.

Nekàgaw weityk putar zauxiapekwer tetea'u a'e wà nehe.

5 Haime neru'yw apyr.

Ukutuk neàmàtyry'ymar wazà'à.

Teko ywy nànànar u'ar nepy huwake wà.

6 Pureruze'egaw newe Tupàn hemimur kwer nupaw pixik kwaw nehe.

O Tuwihawete, ereruze'eg neremiaihu nekatu haw rupi ne wà,

7 Erezamutar katu ikatu haw ne. Naneakatuwawahy kwaw ikatu 'ymaw rehe.

A'e rupi Tupàn nezar nerexak tuwihawete romo nemuigo kar pà a'e.

Nemurywete kar tuwe tuweharupi.

Nerurywete wera'u amogwer tuwihawete wanuwi upaw rupi ne.

8 Nekamir hyàkwenahy a'e, ta'e heta kàpuhàg hekuzar wera'u ma'e hehe a'e xe.

Heta kàpuhàg miha her ma'e aroe her ma'e hehe a'e.

Xi'àm ipy har wà, wioràwiràn imupu har wà no, upy uxi'àm newe wà, uwioràwiràn umupu newe wà no, hàpuzuhu ita marupi her ma'e pupe imupuràg pyrer pupe wà.

9 Heta kuzà neràpuzuhu pe wà. Heta tuwihawete wanazyr a'e kuzà wainuinuromo wà.

Neremireko wapyk nerenaw awyze har rehe a'e.

Neremireko umunehew uzemupuràg eteahy kar haw or ikatu ma'e iapo pyrer a'e.

10 O tuwihawete hemireko ràm, ezeapyaka katu heze'eg pureruze'egaw rehe nehe.

— Nereharaz neremiaihu wanuwi nehe, neànàm wanuwi nehe.

11 Nepuràg eteahy ne. A'e rupi tuwihawete neputar a'e nehe.

Wiko nezar romo a'e. Eruzar ize'eg nehe.

12 O tuwihawete hemireko ràm, teko Xir tawhu pe har werur putar ma'e imur e pyràm newe wà nehe.

Teko hemetarer katu ma'e tetea'u ipurumurywete kar wer putar nerehe wà nehe, a'e newe.

13 Tuwihawete hemireko ràm wiko tàpuzuhu pupe a'e. Ipuràg eteahy hemireko ràm.

Upyahaw or inemo romo iapo pyrer hopoz iapo pà wà.

14 Umunehew kar topoz ipuràg eteahy ma'e izupe wà.

Kuzàwaza wà, hemireko ràm imyrypar wà, oho hupi wà, tuwihawete pe heraha mehe wà.

Weraha hemireko ràm imyrypar izupe wà no.

15 Uhem tuwihawete hàpuzuhu pe urywete romo wà.

Ikatuahy wanupe a'e.

16 O tuwihawete, eremuzàg putar nera'yr tetea'u ne wà nehe.

Wiko putar tuwihawete romo wà nehe, neipy wazàwe wà nehe.

Ne, o tuwihawete, eremuigo kar putar nera'yr

Ywy nànànar wanuwihaw romo ne wà nehe.

17 Ko hezegar haw umuma'enukwaw kar nekatu haw teko wanupe tuweharupi nehe.

Teko paw umume'u putar nekàgaw tuweharupi wà nehe.