1 O Tupàn, emu'e tuwihawete nehe.

Nezewe mehe ukwaw putar pureruze'egaw nekatu haw rupi nehe.

Emono nekatu haw izupe nehe.

2 Nezewe mehe weruze'egatu putar neremiaihu a'e wà nehe, wanehe umunar 'ym pà wà nehe.

Wiko putar hemetarer 'ym ma'e wanuwihawete ikatuahy ma'e romo nehe.

3 Tuwe uhyk temi'u nehe, tuwe uhyk ma'e nehe no, teko ko ywy rehe har wanupe nehe,

Ta'e teko uzapo ikatu ma'e waiko wà xe.

4 Tuwe tuwihawete na'imunar kwaw wama'e rehe teko waneruze'eg mehe nehe.

Tuwe upytywà ma'e hereko 'ymar wà nehe no.

Tuwe weityk teko wanemetarer rehe imunar ma'e wà nehe no.

5 Tuwe tuwihawete wikuwe wiwi kwarahy heta we mehe nehe, zahy heta we mehe nehe no.

Tuwe nupytu'u kwaw teko wanuwihawete romo wiko re nehe.

6 Tuwe tuwihawete nuzawy kwaw àmàn ko rehe ukyr ma'e nehe.

Tuwe nuzawy kwaw àmàn yrykaw romo uzeapo ma'e kwer nehe. Umukatu ywy a'e.

7 Tuwe ipureruze'egatu haw hezuz ma'eputyr ài hekuwe mehe nehe.

Tuwe teko wiko katu tuweharupi wà nehe, zahy ihyape 'ym mehe nehe.

8 Ipureruze'egaw uzypyrog putar pitài yryhu pe nehe. Oho putar inugwer yryhu pe nehe.

Uzypyrog putar yrykawhu Ewparat her ma'e pe nehe. Oho putar ywy iahykaw pe nehe no.

9 Teko ywyxiguhu rehe har uzeamumew putar henataromo wà nehe.

Iàmàtyry'ymar wiko putar ikàg 'ym ma'e romo ipy huwake wà nehe no.

10 Tuwihawete Epàn ywy rehe har umur putar ma'e izupe wà nehe. Yrypypo'o rehe har nezewegatete wà no.

Tuwihawete Araw ywy rehe har wà nehe no, tuwihawete Exio rehe har wà nehe no, umur putar ma'e izupe wà nehe no.

11 Tuwihawete paw uzeamumew putar henataromo wà nehe.

Teko ywy nànànar weruzar putar ize'eg wà nehe no.

12 — Urepytywà pe nehe, aze hemetarer 'ym ma'e i'i izupe wà nehe, tuwihawete upytywà putar a'e wà nehe.

Aze nuhyk kwaw ma'e amo wanupe nehe, aze naheta kwaw wapytywà har nehe, tuwihawete upytywà putar a'e teko a'e wà nehe no.

13 Upuhareko ikàg 'ym ma'e wà. Upuhareko ma'e hereko 'ymar wà no.

Upyro amo wamàno haw wi wà, aze naheta kwaw wapytywà haw wanupe.

14 Upyro imunar ma'e wanuwi wà. Puruzuka ma'e wanuwi upyro wà no.

Tuwihawete uzamutar katu a'e teko a'e wà.

15 Tuwe tuwihawete wikuwe nehe.

Tuwe Araw ywy rehe har werur itazu or izupe wà nehe.

Tuwe teko uze'eg Tupàn pe tuweharupi wà nehe. — Epytywàgatu tuwihawete nehe, tuwe i'i izupe wà nehe.

Tuwe Tupàn uzapo ikatu ma'e izupe tuweharupi nehe.

16 Tuwe heta tetea'u arozràn ywy rehe nehe. Tuwe uhyk teko wanupe nehe.

Tuwe arozràn ipo'o pyrer upyk ywytyr wà nehe.

Tuwe ipo'o pyrer heta haw nuzawy kwaw ywytyr Irimano ywy rehe har ipo'o pyrer heta haw nehe.

Tuwe tawhu tynehem teko wapupe wà nehe.

Tuwe waneta haw nuzawy kwaw ka'api'i ywy katu rehe har heta haw wà nehe.

17 Tuwe teko naheharaz pixik kwaw tuwihawete her wi wà nehe.

Tuwe her ikwaw paw nukàzym kwaw kwarahy heta we mehe nehe.

Tuwe teko paw wenoz Tupàn ze'egatu izupe wà nehe.

Uzapo ikatu ma'e tuwihawete pe a'e. Tuwe uzapo ikatu ma'e teko wanupe nezewegatete nehe no.

18 Pemume'u Tupàn Tuweharupi Wiko Ma'e ikatu haw, Izaew wazar ikatu haw nehe,

Ta'e a'e ikatuahy ma'e iapo har romo hekon a'e xe.

19 Pemume'u her ikatu haw tuweharupi nehe.

Tuwe ikàgaw ipuràg eteahy haw umynehem ywy a'e nehe.

Azeharomoete. Azeharomoete.

20 Upaw Tawi Zexe ta'yr Tupàn pe ze'egaw xe kury.