1 Azamutar katu tuwe neràpuzuhu ihe,

O Tupàn Ikàg Wera'u Ma'e.

2 Hereko wer tuwe a'e pe ihe.

Amonokatu hereha Tupàn Tuweharupi Wiko Ma'e hàpuzuhu izywyr katu haw pe ihe.

Hahy haw rupi azegar herurywete haw rupi Tupàn Wikuwe Ma'e pe.

3 O Tupàn Ikàg Wera'u Ma'e, heruwihawete, hezar.

Ma'ea'yr hapy haw neràpuzuhu pe har huwake

Pitàwà uzapo waity wà.

Wiràmiri uzapo weko haw a'e pe wà.

Uzekaiw umemyr wanehe a'e pe wà.

4 Hurywete neràpuzuhu pe wiko ma'e wà.

Umuzàg zegar haw nekatu haw rehe tuweharupi wà.

5 Hurywete teko wà, aze eremur nekàgaw wanupe,

Aze iho wer pe Xiàw ywytyr kutyr har rehe nemuwete katu pà wà.

6 Ywyàpyznaw Tehaykwer her ma'e rupi waho mehe,

Tynehem ytyzuzàmaw pupe a'e ywyàpyznaw a'e.

Àmàn ipy upyk katu haw pupe no.

7 Waho mehe wakàgaw uhua'u wera'u oho iko.

Wexak putar Tupàn amogwer tupàn wazar Zeruzarez pe a'e wà nehe.

8 Ezeapyaka katu heze'eg rehe nehe, o Tupàn Tuweharupi Wiko Ma'e Ikàg Wera'u Ma'e.

Herenu pe nehe, o Zako Izar.

9 O Tupàn, emono neze'egatu nehe, urerehe uzekaiw ma'e rehe nehe,

Tuwihawete neremixak kwer rehe nehe.

10 Aze amumaw pitài 'ar neràpuzuhu pupe hereko pà ihe,

Ikatu wera'u ihewe 1.000 'ar amo me hereko pà imumaw paw wi ihewe.

Aze apyta Tupàn hezar hàpuzuhu hukenaw huwake ihe, ikatu wera'u ihewe ikatu 'ym ma'e wanàpuz me hereko haw wi a'e.

11 Tupàn Tuweharupi Wiko Ma'e wiko tatainy romo zanewe. Wiko Zanemimaw romo.

Uzamutar katu ikatu ma'e iapo har wà. Umuwete ikatu ma'e iapo har wà no.

Omono ikatu ma'e paw wanupe a'e.

12 O Tupàn Ikàg Wera'u Ma'e,

Hurywete tuwe nerehe uzeruzar ma'e wà.