1 Tuwe teko umume'u xo nekatu haw zo wà nehe, o Tupàn Tuweharupi Wiko Ma'e.

Tuwe numume'u kwaw urekatu haw wà nehe,

Ta'e erepuruamutar katu ne xe, ta'e neretyryk kwaw puruwi ne xe.

2 Màràzàwe tuwe amogwer ywy rehe har upuranu zanerehe nezewe wà.

— Ma'e pe hekon pezar Tupàn a'e, i'i wà.

3 — Tupàn Zanezar wiko ywak rehe a'e.

Uzapo wemimutar paw a'e,

Uru'e wanupe.

4 Teko amogwer ywy rehe har umupyràn parat a'e wà, or a'e wà no, uzar tupàn a'ua'u wanagapaw waapo pà wà.

Awa uzapo a'e tupàn a'ua'u wà.

5 Heta wazuru wanupe. Nuze'eg kwaw wà.

Heta waneha wanupe. Nuexak kwaw ma'e wà.

6 Heta wapyakwar wanupe. Nuenu kwaw ma'e wà.

Heta waxi wanupe. Nuwetun kwaw ma'e wà.

7 Heta wapo wanupe. Nupuner kwaw ma'e ipyhykaw rehe wà.

Heta wapy wanupe. Nuwata kwaw wà.

Ni amo ze'eg nuhem kwaw wazuru wi.

8 Tuwe a'e tupàn a'ua'u iapo arer

Wiko wemiapo kwer wazàwe wà nehe.

Tuwe wanehe uzeruzar ma'e wiko wazàwe wà nehe.

9 O Izaew izuapyapyr wà, pezeruzar Tupàn Tuweharupi Wiko Ma'e rehe nehe.

Pepytywà a'e. Pepyro a'e no.

10 Xaxeto Tupàn henataromo har wà, pezeruzar Tupàn Tuweharupi Wiko Ma'e rehe nehe.

Pepytywà a'e. Pepyro a'e no.

11 Pezeruzar Tupàn Tuweharupi Wiko Ma'e rehe nehe, izuwi ukyze ma'e paw wà.

Pepytywà a'e. Nuzawy kwaw u'yw wi pemimaw a'e no.

12 Tupàn Tuweharupi Wiko Ma'e ima'enukwaw zanerehe. Umur putar uze'egatu zanerehe nehe.

Umur putar uze'egatu teko Izaew wanehe nehe no.

Umur putar uze'egatu xaxeto Tupàn henataromo har nànàn nehe no.

13 Omono putar uze'egatu teko wanehe nehe, aze wiko izuwi ukyze ma'e romo wà nehe.

Teko ikàg ma'e hemetarer katu ma'e wà. Teko hemetarer 'ym ma'e wà no. Omono putar uze'egatu a'e teko nànàn nehe.

14 Tuwe Tupàn Tuweharupi Wiko Ma'e umuzàg kar pena'yr tetea'u peme wà nehe.

Tuwe umueta tetea'u kar nezuapyapyr wà nehe no.

15 Tuwe Tupàn Tuweharupi Wiko Ma'e omono uze'egatu penehe nehe.

Ywak iapo arer romo ywy iapo arer romo hekon a'e.

16 Xo Tupàn Tuweharupi Wiko Ma'e zo wiko ywak izar romo a'e.

Ywy omono teko wanupe.

17 Umàno ma'e kwer numume'u kwaw Tupàn Tuweharupi Wiko Ma'e ikatu haw a'e wà,

Ta'e wezyw uze'eg 'ym ma'e wapyta haw pe a'e wà xe.

18 Zane wikuwe ma'e ximume'u Tupàn Tuweharupi Wiko Ma'e hemiapo kwer ikatu haw zane, ko 'ar rehe, tuweharupi nehe no.

Pemume'u Tupàn Tuweharupi Wiko Ma'e ikatu haw nehe.

Azeharomoete.