1 O Tupàn Tuweharupi Wiko Ma'e, nema'enukwaw Tawi rehe nehe.

Nema'enukwaw hemipuraraw kwer nànàn nehe no.

2 Nema'enukwaw hemimume'u kwer rehe nehe.

Nema'enukwaw ko newe hemimume'uahy kwer rehe nehe.

Tuweharupi Wiko Ma'e Zako izar ikàg ma'e romo ereiko.

3 — Naha kwaw heràpuz me nehe. Napytu'u kwaw nehe.

4 Na'aw kwaw nehe. Naker kwaw nehe.

5 Tupàn Tuweharupi Wiko Ma'e hen àwàm hexak 'ym mehe we napytu'u kwaw nehe.

Tupàn Zako izar ikàg ma'e hàpuz ràm hexak 'ym mehe we naker kwaw nehe.

6 Merez taw pe urereko mehe uruenu Tupàn Ze'eg Hyru rehe ze'egaw ure.

Uruexak hyru oroho ywy katu Zar her ma'e rehe.

7 Na'e uruze'eg nezewe. — Zaha Tupàn Tuweharupi Wiko Ma'e hàpuz me nehe.

Ximuwete katu henaw henataromo nehe, uru'e ure.

8 O Tupàn Tuweharupi Wiko Ma'e, ezur neràpuzuhu pe nehe, neze'eg hyru herur pà nehe.

Neze'eg hyru wexak kar nekàgaw purupe a'e.

Upyta a'e pe tuweharupi a'e.

9 Tuwe xaxeto nerenataromo har uzapo ikatu ma'e tuweharupi wà nehe.

Tuwe neremiruze'eg newi upuir pixik 'ym ma'e heiheihem urywete haw rupi wà nehe.

10 O Tupàn Tuweharupi Wiko Ma'e, eremume'u neremiapo ràm neremiruze'eg Tawi pe.

A'e rupi, eityk zo tuwihawete neremixak kwer nehe kury.

11 Eremume'uahy neremiapo ràm Tawi pe. Nerezewyr kwaw neze'eg awer wi nehe.

Nezewe ereze'eg izupe.

— Amuigo kar putar amo nera'yr tuwihawete romo nehe.

Wiko putar tuwihawete neraikweromo a'e nehe.

12 Aze nera'yr umuwete heze'eg wà nehe,

Aze weruzar heremiapo karer wà nehe,

Wana'yr wiko putar tuwihawete romo tuweharupi wà nehe no, ere ihewe.

13 Tupàn Tuweharupi Wiko Ma'e wexak Xiàw ywytyr a'e.

Uputar a'e ywytyr wàpuz ràm hen àwàm romo.

14 — Aiko putar xe tuweharupi nehe.

Hepureruze'eg wer teko wanehe xe ihe nehe.

15 Amono putar ma'e tetea'u Zeruzarez pe har wanupe nehe. Uhyk putar tuwe a'e pe har wanupe nehe.

Amono putar temi'u tetea'u hemetarer 'ym ma'e wanupe nehe.

16 Amono putar heze'egatu xaxeto wanemiapo nànàn nehe.

A'e pe har uzegar putar uhapukaz pà urywete haw rupi wà nehe.

17 Amuigo kar putar amo Tawi izuapyr tuwihawete ikàg ma'e romo xe ihe nehe.

Tuweharupi amuigo kar putar a'e tuwihawete heremixak kwer izuapyapyr ihe wà nehe, tuwihawete romo ihe wà nehe.

18 Amumaranugar kar putar iàmàtyry'ymar ihe wà nehe. Tuwihawete ikàg rehe har heny katu a'e.

Nezewegatete a'e Tawi izuapyr ipureruze'egaw ipuràg eteahy putar nehe, ikàg wera'u putar nehe, i'i Tupàn.