1 Pemume'u Tupàn Tuweharupi Wiko Ma'e ikatu haw nehe.

Tuwe hepy'a umume'u tuwe nekatu haw nehe, o Tuweharupi Wiko Ma'e.

2 Amumaw putar hekwarahy paw hezar ikatu haw imume'u pà ihe nehe.

Amuzàg putar zegar haw ikatu haw rehe herekuwe mehe we ihe nehe.

3 Pezeruzar zo teko ikàg ma'e hemetarer katu ma'e wanehe nehe.

Pezeruzar zo teko wanehe nehe.

Ta'e umàno ma'e ràm romo wanekon a'e wà xe.

Nupuner kwaw upurupyro haw rehe wà.

4 Umàno mehe uzewyr putar ywy rehe wà.

A'e 'ar mehe we wanemiapo putar haw upaw tuwe.

5 Hurywete teko Zako izar wi upytywà haw ipyhykar wà.

Hurywete uzar Tuweharupi Wiko Ma'e rehe uzeruzar ma'e wà.

6 Ywak iapo arer romo hekon a'e. Ywy iapo arer romo no.

Yryhu iapo arer romo hekon, wanehe har paw iapo arer romo no.

Tuweharupi Wiko Ma'e uzapo tuwe ma'e wemimume'u kwer rupi katete tuweharupi a'e.

7 Aze ikàg ma'e imunar ikàg 'ym ma'e wama'e rehe nehe, Tupàn uzekaiw a'e ikàg 'ym ma'e wanehe a'e.

Omono temi'u ima'uhez ma'e wanupe no.

Tupàn Tuweharupi Wiko Ma'e umuhem kar imunehew pyrer zemunehew paw wi a'e wà xe.

8 Umupyhàgatu kar hehàpyhà 'ym ma'e wà.

Tupàn Tuweharupi Wiko Ma'e upir u'ar ma'e kwer wà no.

Aze teko weruzar Tupàn wà, Tupàn uzamutar katu a'e teko a'e wà.

9 Tupàn Tuweharupi Wiko Ma'e uzekaiw amo ae ywy rehe arer zaneywy rehe wiko ma'e wanehe.

Upytywà kuzà imen umàno ma'e kwer wà. Upytywà kwarer a'e wà, kuzàtài a'e wà no, aze wanu umàno wanuwi wà, aze wahy umàno wanuwi wà.

Aze ikatu 'ym ma'e umume'u wemiapo ràm wà, Tupàn nuzapo kar kwaw wanupe a'e.

10 Tupàn Tuweharupi Wiko Ma'e wiko putar tuwihawete romo tuweharupi nehe.

O Zeruzarez, nezar wiko putar tuwihawete romo tuweharupi nehe.

Pemume'u Tupàn Tuweharupi Wiko Ma'e ikatu haw nehe.