2 Tuwe nereme hepyk zurupyter haw pupe nehe.

Heamutar katu pe ne. Heamutar katu haw ikatu wera'u win wi a'e.

3 Nekàpuhàg zàwenugar hyàkwegatu.

Nerer nuzawy kwaw kàpuhàg zàwenugar izakook pyrer ihewe.

Ni amo kuzà nupuner kwaw neamutar katu 'ymaw rehe wà.

4 Hereraha pe nezeupi nehe 'y. Zaha na'arewahy nehe 'y.

Eiko heruwihawete romo nehe. Hereraha pe neker haw pe nehe.

O tuwihawete, urerurywete nerehe ure nehe.

Uruzegar putar neamutar katu haw rehe nehe, neremiamutar haw rehe nehe.

Ikatu wera'u win wi a'e.

Neamutar katu teko a'e wà, o tuwihawete.

5 Kuzà Zeruzarez pe har wà, ipir pihun wewer ma'e romo aiko ihe.

Nezewe rehe we hepuràg eteahy.

Herexakaw nuzawy kwaw tàpuzràn ywyxiguhu rehe har hexakaw.

Nuzawy kwaw pànuhu Xàrumàw hàpuzuhu pupe har.

6 Peme'e zo herehe nezewe nehe.

Peme'e zo pihun wewer ma'e romo hereko haw rehe nezewe nehe.

Kwarahy hemuigo kar pihun wewer ma'e romo a'e.

Hekywyr wikwahy ihewe wà. A'e rupi hemuma'ereko kar ma'ywa uwà tyw pe wà.

A'e rupi napuner kwaw hezehe hezekaiw paw rehe.

7 Emume'u ma'e ihewe nehe, heremiamutar.

Ma'e pe ereraha nereimaw àràpuhàràn hawitu ma'e wamumai'u kar pà ne wà.

Ma'e pe upytu'u kwarahy wapyter pe hin mehe wà.

Emume'u ihewe nehe. Nezewe mehe nata e kwaw amo àràpuhàràn hawitu ma'e wamono'ogar waneimaw

wainuromo nerekar pà ihe nehe.

8 Ereiko amogwer kuzà wanuwi ipuràg eteahy wera'u ma'e romo ne. Aze nerekwaw kwaw wapoz haw nehe,

eho amogwer waneimaw wanaikweromo nehe.

Nezewe mehe erexak putar mai'u haw nereimaw àràpuhàràna'yr hawitu ma'e wanupe nehe,

wamono'ogaw wanàpuz huwake nehe.

9 Nepuràg eteahy, heremiamutar.

Ereiko Tuihawete Parao heimaw ywyramawa heruata har wazàwe ne.

10 Neruwa ipuràg eteahy mokoz ne'aw ipupepupe pyrer wamyter pe.

Nepu'yr neazuromo har imupuràg eteahy kar pyrer ikatuahy ihewe no.

11 Ximupyràn itazu or amo neazuromo har iapo pà newe nehe.

Ximomog kar ita xig parat hehe imupuràg eteahy kar haw romo nehe no.

12 Heruwihawete apykawpuku rehe wapyk mehe,

wetun hekàpuhàg zàwenugar hyàkwegatu ma'e a'e.

13 Heremiamutar hekàm rehe ipytu'u mehe,

aetun kàpuhàg zàwenugar hyàkwegatu ma'e mir her ma'e hehe ihe.

14 Heta amo ma'ywa tyw ytyzuzàmaw Zeni her ma'e huwake a'e.

Heremiamutar nuzawy kwaw ma'eputyr

kaiwer pe har a'e ma'ywa tyw rehe hezuz ma'e kwer a'e.

15 Nepuràg eteahy tuwe, heremiamutar. Nepuràg azeharomoete.

Heamutar haw heny katu nereha rehe.

16 Nepuràg eteahy tuwe, heremiamutar.

Hemurywete kar pe azeharomoete.

Xiapo ka'api'i ikyr katu ma'e zaneker haw romo nehe.

17 Ximono putar ywyràkàxigyw zaneràpuz izyta romo zane nehe.

Ywyra pin her ma'e ximono putar i'aromo har romo nehe.