1 Amumaw pytun tetea'u heker haw rehe heremiamutar hekar pà ihe.

Aekar zepe ihe.

Nezewe rehe we naexak kwaw.

2 A'e rupi apu'àm tawhu nànàn heata pà.

Ata nahu rupi, ata katu pe tàpuz wamyteromo no.

Aekar heremiamutar katu aha.

Aekar zepe. Naexak kwaw.

3 Zauxiapekwer tawhu rehe uzekaiw ma'e heruwàxi wà.

Apuranu wanehe. — Aipo pexak heremiamutar katu, a'e wanupe.

4 Wanuwi hehem romo mehe

aexak ihe.

Àzuwàn heremiamutar katu. Namono kar kwaw.

— Eho herupi hehy hàpuz me nehe, a'e izupe. Araha hehy iker haw pe,

hemuzexak kar arer iker haw pe.

5 Kuzà Zeruzarez pe har wà,

pemume'u ko ma'e ihewe nehe. Pemume'uahy ko ma'e ihewe nehe.

Pemume'u arapuha hehaite ma'e kor her rehe nehe. Pemume'u arapuha kazer her rehe nehe no.

— Nuruzapo kwaw ma'e pemupytu'u kar pà pezeamutar katu re nehe, peze nehe.

6 Amo ma'e uzeupir wà ywyxiguhu wi. Ma'e romo hekon a'e.

Nuzawy kwaw ywàkun. Nuzawy kwaw tàtàxin kàpuhàg zàwenugar mir ukaz ma'e wi uhem ma'e. Nuzawy kwaw tàtàxin yhyk zàwenugar ukaz ma'e wi uhem ma'e.

Nuzawy kwaw tàtàxin kàpuhàg zàwenugar tetea'u ma'eme'egar hemime'eg ukaz ma'e wi uhem ma'e.

7 Zauxiapekwer werur Xàrumàw heruzepyriko haw hereko wà.

60 Zauxiapekwer Izaew izuapyapyr ikatu wera'u ma'e wà,

wiko Xàrumàw rehe uzekaiw katu ma'e romo wà. Xo hehe zo uzekaiw wà.

8 Paw rupi ukwaw takihepuku pupe upuruzuka haw wà.

Wiko zeàmàtyry'ymawhu rehe uzemuàgy'ygatu ma'e romo wà.

Wereko takihepuku pitàitàigatu wà.

Ta'e na'ikatuahy kwaw pyhaw xe.

9 Tuwihawete Xàrumàw uzapo kar uzeruzepyriko haw ywyra kixi har wanupe a'e.

Ukixikixi ywyra ikatu wera'u ma'e iapo pà wà.

10 Uwàuwàn izyta parat huwer zàwenugar romo iapo pyrer pupe wà.

Upyk pàn or inuromo imuwywyk pyrer pupe wà.

Kuzàgwer Zeruzarez pe har uzapo apykaw iapiru katu ma'e izupe wà.

Upyk pàn ipiràg ma'e ikatuahy ma'e pupe wà.

11 Kuzà Xiàw pe har wà, pezur tuwihawete hexak pà nehe.

Tuwihawete Xàrumàw umunehew àkàg rehe har iko.

Ihy omono izupe

izereko haw 'ar mehe a'e.

Hurywete tuwe a'e 'ar mehe wà.