1 Aixe hema'etymaw pupe ihe,

heremireko ràm heremiamutar katu.

Amono'og mir iteko ihe. Amono'og amo ka'a hyàkwegatu ma'e iteko ihe no.

A'u hàir hàtàgwer iteko ihe.

A'u hewin iteko. A'u hereimaw kamykwer iteko no.

— Pezeamutamutar katu nehe.

Pemai'u nehe. Pei'u nehe.

Te pezeamutar katu haw pemuka'u putar nehe.

2 Aker tupà. Nezewe rehe we ame'e tupà.

Na'e ainu heremiamutar katu ukenaw rehe ikwaikwar mehe ihe.

Hemuixe kar pe nehe, heremiamutar, heremiamutar katu.

Ereiko pyku'i ikatu 'ymaw hereko 'ymar zàwe.

Zuwiri umuàkym heàkàg.

Àmàn pixika'i ma'e utyky'yr he'aw imuàkym pà.

3 Anuhem heropoz kwez ihe.

Aipo amunehew wi putar nehe.

Azepyez kwez.

Màràzàwe tuwe amuaiw wi putar nehe.

4 Heremiamutar katu omono opo ukenaw rehe.

Hepy'a umàno etea'i.

5 Ikatu ihewe. Amuixe kar tària'i heremiamutar katu.

Mir upyk hepo.

Upyk hekwà no.

Apyhyk ukenaw iwàpytymaw.

6 Na'e awàpytymawok zepe uken heremiamutar katu pe.

Oho a'e 'ym mehe we.

Hepurenu wer hehe ize'eg mehe. Aekar. Naexak kwaw.

Aenoz. Nuwazar kwaw heze'eg kwer ihewe.

7 Zauxiapekwer tawhu rupi wata ma'e heruwàxi a'e wà.

Ukwaukwar herehe hemuahy kar pà wà.

Zauxiapekwer pàrirogawtàtà rehe uzekaiw ma'e wenuhem hepykaw ihewi wà.

8 Pemume'u ko penemiapo ràm ihewe nehe, kuzà Zeruzarez pe har wà.

Aze pexak heremiamutar katu nehe,

— Neamutar katu har uzuka etea'i neremiamutar katu a'e, peze izupe nehe.

9 Ne, amo kuzà wanuwi ipuràg eteahy wera'u ma'e.

Ewazar ko urepuranu haw urewe nehe.

Aipo neremiamutar katu ikatu wera'u amogwer wanuwi a'e.

— Ikatuahy a'e, ere iko izupe. Màràzàwe tuwe ereze'eg nezewe.

Màràzàwe tuwe urumume'u putar a'e ma'e ureremiapo ràm newe nehe.

10-11 Aze eremono heremiamutar katu 10.000 awa wainuromo nehe,

ipuràg eteahy wera'u wanàwanàn a'e. Ikàg wera'u wanàwanàn no.

Huwa ipuràg ma'e imuma'e haw a'e. I'aw puku a'u a'e. I'aw penopenog no. Ipihun zàpuun hawer ài.

12 Heha nuzawy kwaw pykahu

yrykaw izywyr har heha.

A'e pykahu xigatu ma'ekamy kwer ài.

Uzahak waiko 'y yrykaw izywyr wà.

13 Neruwa ipuràg ma'etymaw

ka'a hyàkwegatu ma'e hereko har ài.

Nereme nuzawy kwaw ma'eputyr iri.

Mir hekuzar katu ma'e itykwer upiripirik izuwi.

14 Nepo iapo pyrer ikatuahy a'e.

Eremupuràg nepo kwàku'aw har or iapo pyrer pupe. Ita hekuzar katu ma'e ipuràg ma'e pupe no.

Neku'aw nuzawy kwaw marupi her ma'e imuhygatu pyrer.

Ita xapir her ma'e upyk neku'aw har wà.

15 Neretymà nuzawy kwaw izyta ita maramore her ma'e iapo pyrer wà.

Upu'àm uwy pe har or ikatu ma'e iapo pyrer rehe wà.

Heremiamutar katu nuzawy kwaw ywytyr Irimano ywy rehe har.

Ipuràg ywyràkàxigyw ài.

16 Nezuru hezurupyter mehe nuzawy kwaw hàir i'u haw ihewe.

Hehe har paw ikatu ihewe.

Nezewe heremiamutar katu hekon.

Hemen ràm wiko nezewe, kuzà Zeruzarez pe har wà.