1 Nø maig taig købigwan trumay martrab Jehovábe Saran ashchab arrua, nune tru maig trannrrab kørømisrigwan treeg marig købig køn. 2 Inchen Sarabe kwanrriig kørrømisra, Abraham kølli misagwei kan nusrkai tøgaguig køn. Tius tru mana tøgagønrrun taig tru uraske. 3 Inchen tru Sara tøgaguig unø tru møg-unø kal-labigwane Abrahambe Isaac munchi pasrig køn. 4 Incha Abrahambe tru nui nusrkai Isaacwan trattrø y pøn kwalømyu circuncidaig køn, Tius maig karuig køben, treekke. 5 Nui nusrkai Isaac kal-laben, Abrahambe pilamera cien tøgaig købig køn. 6 Incha Sarabe trenchibig køn: “Tiusbe nane ka intsøg kønrrai marig køn cha. Møikkøben na unø tøgaguin kui wammørøbeløbe naba ketøtø intsønrrun cha. 7 ¿Abrahamwane mugui trenchinrrautah cha, Sara ureg mutsøsrønrrun? chabe. Inchen køben, Abraham ya køllig køben nabe kan nusrkai tranar” chibig køn.

8 Inchen Isaacbe nurab iben, yandø pitsø kuchen, tru pitsø kuchib kwalømbe Abrahambe larrø tab mamiimera tamarøbig køn. 9 Inchen Sara ashene, møimbe tru Egiptosrø Agarwei nusrkai tru Abrahamba tøgaguig unø Ismaelbe, nui nusrkai Isaacwane ke ka intsatø ashen, 10 Sarabe Abrahamwane trenchibig køn:

—Ñui tru karuindiig megab ishuwane nui nusrkawanba yugurri weguchi cha, kaguende tru ka karuindiig megab ishuwei nusrkaimbe nai nusrkai Isaacbabe chi tøgaguigwan keta tranamigube tøgatø ashchabig kømøn— cha.

11 Inchen øyeeg wammerabe Abrahamwane purø murig pubig køn, kaguen nui trag unan øyeeg nebuben. 12 Treeg kuindøgucha Tiusbe Abrahamwane trenchibig køn:

—Ñui karuindiig megab ishuweimburab lata unaimburab lata chi isumøta cha. Sara nø maig taigwan kerriguba ka møra, trunun treeg ka mar cha, kaguende ñuinukkurri amrrunrrab misaamerabe Isaackurri kønrrun cha. 13 Inchen tru ñui karuindiig megabigwei nusrkaweinukkurringucha truba truba nørrø søtø misaamera kønrrai nabe treeg maramønrrun cha, kaguende ñuinukkurri arrubig kuimba.—

14 Indig katø kwalømbe Abrahambe løtsøzhig kurra, Agarwane pirrin køben, pi niguin kalusyu pi køben trana, kildunyu mutøsra, Ismaelwane yandø ñi ashchig cha nun tranabe, ka amrrigay chibig køn. Inchen nøbe webya ya, Beerseba tru mu misag warab waraimøsrø chu pumikkaig llirab uñibig køn. 15 Inchen tru kalusyu niguin pibe patsaptinchen, unane kan lamø tusr umbusrø wanna, 16 usrimbe truyugurri kan maya yabgøsrøn ashib wanrrab tarømisrøbig køn. Kaguende nøbe treeg isubig køn: “Nai unan kwai ashig kømøtan” cha. Inchen usri wamisren, unøbe trashib kishibig køn.

17 Inchen Tiusbe unø trashib kisigwan møren, Tiuswei ángelbe Agarwan srømbalasrøngurri wama trenchibig køn:

—¿Agar, chinnda? cha. Chi kørig isumøta cha. Kaguende unø nø wainukkurri kisigwan Tiusbe mørin køn cha. 18 Kurra ya, unan tasku kemøra, srua pasramisr cha, kaguende nabe nuinukkurri misaamera purø nørrø søtø kønrrai maramønrrun— cha.

19 Inchen tru uras Tiusbe Agarwan kammeran kurøptinchen, nøbe kan pisu waig ashiptinchibig køn. Inchen Agarbe tru pi niguin kalusyu pi netsøgana, unan pizhig srørrøbig køn.

20 Inchen Tiusbe unan lincha pasrøben, unøbe nurab ya, mu misag warab waraimøsrø tsua, nøbe arcotøga søl øramibe kan piaig lataig købig køn. 21 Incha nøbe Paran tru mu misag warab waraimø pirausrø tsubig kuig køn. Inchen usrimbe nune kan Egipto pirausrø ishuuba kasharanig køn.

22 Tru kwalømmerawandøwei Abimelecba katø tru nui suldaumeran nø asha karubig Ficolba Abrahamwan trenchibelø køn:

—Ñi chi marøb arrigutøgucha Tiusbe ñiba pasran cha. 23 Incha møi yutøwei ñibe Tiusken ashen ¡katø! nabe treeg marmø kømø, maramønrrun taitøga kalø marmørrumøn chirra chibelø køn, tru nan lata, nai nusrkawan lata, nainukkurri amrrub misaameran lata. Incha ¡katø! treeg maramønrrun chirra chibig køn nanba, møi ñi yu tsuim pirau misaameranba tru purainrrab arruatiigwan utabelan tab inchib tøgagørrunrrig cha, tru ñun mandø tab indig køben tru tab indiitøga treetøwei tab inchib.—

24 Inchen Abrahambe trenchibig køn:

—¡Katø! nabe treeg marmø kømø, maramønrrun— cha.

25 Inchendø Abrahambe Abimelecwane ‘ñibe nane øyeeg kalø marig køn’ cha trunun wesrabig køn, tru Abimelecwei karuig mendig melabelø Abraham tru pirø umbugurri pi wesraizhig købigwan nun kerraigwan. 26 Inchen Abimelecbe trenchibig køn:

—Nabe øyeegwane murreendi mørmur cha. Katø ñigucha nan wammørøsrømøwei inchene, nabe møinguen wammørøb pasrar— cha.

27 Inchen Abrahambe ubishamera køben waaramera køben srua arrua, Abimelecwan tranøbig køn. Incha ambugurri, igurri øyamay kønrrab cha wamincha kørrømisrøbelø køn. 28 Inchen Abrahambe nui ubisha søtømerayugurri ishug ubisha-ureezheelø trattrø y par, nuingui tarømarøbig køn. 29 Inchene Abimelecbe trencha payibig køn:

—Iig tru ishug ubisha-ureezheelø trattrø y par tru ñi nuingui tarømariiløbe ¿maig punrrabigwan eshkabig køh?— cha.

30 Inchen Abrahambe trenchibig køn:

—Tru iig ishug ubisha-ureezheelø trattrø y par iilan na ñun tranen, ñi utiibe tru pirø umbugurri pizhigwane na lalla wesraig købigwan trunun eshkab pasrønrrabig køn— cha.

31 Incha treekkurri trusrømbe Beerseba cha wamig køn, kaguende tru pa møguelø truyu ambugurri, igurri øyamay kønrrab cha wamincha kørrømisrig kua.

32 Incha øyamay kønrrab cha kørrømisrøbelø køn tru Beersebasrø. Incha Abimelecba katø tru suldaumeran nø asha karubig Ficolba katø filisteosmerai pirøsrømay katø ambubelø køn. 33 Incha Abrahambe tru Beersebasrø kan tamarisco tusr ellguawa pasrabe, Jehová, tru Managurri Managatig Wabigwei munchiwan isub wamabig køn. 34 Incha Abrahambe filisteosmeraim pirausrø purø yana tsuig køn.