16
Mba'emo ome'ẽ okuapyague
1 Ha'e rire ma Nhanderuete pegua hyru ogueroike vy omoĩ oo'i Davi ojapo va'ekue mbyte py. Nhanderuete renonde py ogueru avi okuapy mba'emo oapy reve ome'ẽ va'erã, hexeve peteĩ rami ju ikuaia regua guive.
2 Ha'e gui opa ma oapy va'erã ha'e hexeve peteĩ rami aguã regua Davi ome'ẽmba ma vy Senhor rery rupi ogueroayvu porã heta va'e kuery ha'e javi.
3 Ha'e gui ma Israel kuery avakue ha'e kunhague ikuai va'e peteĩ-teĩ pe omboja'o peteĩ mbojape, xo'o ra'ykue ja'ea-'ea ha'e uva'a pirukue.
4 Omoĩ avi levita kuery va'e regua Senhor ayvu ryru renonde rupi ikuai va'erã, Senhor Israel kuery ruete oguerovy'a, ogueroporaei ha'e omboete aguã. Ha'e va'e kuery ma pova'e:
5 huvixa Asafe, ha'e gui mokoĩa ma Zacarias, ha'e va'e rire ma Jeiel, Semiramote, Jeiel mboae, Matitias, Eliabe, Benaia, Obede-Edom ha'e Jeiel mboapya mbaraka ha'e ixã reta va'e reve guarã. Ha'e gui Asafe ma omonhendu ratãve 'rã hy'a pu.
6 Ha'e gui sacerdote kuery Benaia ha'e Jaaziel ma mimby guaxu omonhe'ẽa rupi riae 'rã ikuai Nhanderuete guexeve guarã ojapo va'ekue ryru oĩa renonde rupi.
Salmos 105, 96, 106
7 Ha'e va'e ára ma Davi omoĩ ypy'i Asafe ha'e tyvy kuery Senhor pe oporaeia rupi oguerovy'a aguã. Aipoe'i:
8 — Perovy'a Senhor, hery rupi pejapukai.
Yvy regua kuery pe peikuaa uka ojapo va'ekue.
9 Peporaei ke ixupe, peporaei salmos.
Pemombe'upa ke nhomondyipaarã ojapo va'ekue.
10 Perovy'a hery iky'a e'ỹ va'e.
Senhor oeka va'e kuery tovy'a opy'a py.
11 Peka Senhor, ipo'akaa guive.
Peka ke henonde peĩ riae aguã.
12 Penema'endu'a ke mba'emo porã ojapo va'ekue re,
nhomondyipaa ha'e oipota va'e re ijayvuague re,
13 peẽ hembiguai Israel ramymino kuery,
peẽ Jacó ra'y kuery hembiporavo pendekuai va'e.
14 Ha'e ma Senhor Nhanderuete.
Oipotaa ma yvy jave re ojekuaa.
15 Ima'endu'a riae 'rã guexeve guarã ojapo va'ekue re,
mbovy rei e'ỹ ikuai va'erã peve guarã ayvu ome'ẽ va'ekue re,
16 Abraão reve ngupive guarã ojapo va'ekue re,
Isaque pe ouraa rupi ijayvuague re guive.
17 Ha'e nungakue re ma Jacó reve ju ijayvu,
raka'e rã peve guarã re ijayvu Israel reve.
18 Ha'e vy aipoe'i:
“Ndevy ame'ẽ 'rã Canaã yvy penemba'erã”, he'i.
19 Ha'e jave py ha'e kuery mbovy'i teri ikuai,
yvy mboae guigua mbovy'i ete ikuai raka'e,
20 oguata va'ekue yvy mboae-ae ikuai va'e rupi,
joyvy-yvy re.
21 Ha'e rami teĩ avave rei pe ha'e ndoguereko axy ukai.
Ha'e kuery re oma'ẽ vy ijayvu ete huvixave ikuai va'e pe.
22 Ha'e vy aipoe'i: “Emoĩ eme ndepo xerembiporavo kuery re,
pereko axy eme xevygua profeta kuery”, he'i.
23 Peporaei ke Senhor pe yvy jave regua kuery!
Ko'ẽ nhavõ peikuaa uka nhandereraa jepea.
24 Yvy regua kuery pe peikuaa uka hexakãa,
ha'e javi regua pe pemombe'u mba'emo porã ojapoa.
25 Mba'eta Senhor ma yvate ete va'e.
Ha'evea rami ixupe japoraeia,
tuuete ikuai va'e gui okyjevepy oiko.
26 Mba'eta yvy regua kuery ruete ha'e javi ma mba'emo ra'angaa rive.
Ha'e rã Senhor ma yva apoare.
27 Henonde ma guexakãa ha'e ijyvatea oexa uka.
Ipo'akaa ha'e iporãa ojekuaa ixupegua henda iky'a e'ỹ va'e py.
28 Yvy regua ha'e javi, peroporaei ke Senhor!
Peroporaei Senhor rexakãa ha'e ipo'akaa.
29 Peroporaei Senhor rery iporã ete ramo.
Peme'ẽ va'erã peru vy peroike ixupegua roka py.
Pembojerovia Senhor iky'a e'ỹa rexakãa py.
30 Yvy jave regua kuery, peryryipa henonde.
Mba'eta yvy omoĩ atã raka'e omyĩ e'ỹ aguã rami.
31 Ha'e nunga rupi tovy'a yva ha'e yvy.
Yvy regua kuery ikuaia rupi “ Senhor ma huvixave oĩ”, peje.
32 Taevovo ye'ẽ ha'e hexe ikuai va'e ha'e javi!
Tovy'a nhuũndy ha'e hexe ikuai va'e ha'e javi!
33 Tovy'apa yvyra ka'aguy re ikuai va'e Senhor renonde,
mba'eta ou 'rã yvy regua kuery re oikuaa pota aguã.
34 Perovy'a ke Senhor, porayvu va'e ramo,
mba'eta nhomboaxya opa va'erã e'ỹ.
35 Ha'e gui aipopeje: “Oreruete orereraa jepea, orereraa jepe ke!
Oremboatypa ju, orereraa jepe ke yvy regua kuery gui,
nderery iky'a e'ỹ va'e rupi roguerovy'a aguã,
ha'e rovy'aa rupi rogueroporaei aguã.”
36 Ima'endu'a porãmby toiko Senhor Israel kuery Ruete
aỹ, ha'e raka'e rã peve! — he'i.
Ha'e ramo heta va'e kuery “Amém!” he'i vy ogueroporaei okuapy Senhor.
Senhor pe mba'emo ojapo va'erã Davi omoĩve juague
37 Ha'e ramo Senhor guexeve guarã ojapo va'ekue ryru oĩa renonde py ae Davi omoĩ Asafe tyvy kuery reve, ha'e kuery opena riae aguã henonde py, ko'ẽ nhavõ opena ukaague rami vy.
38 Omoĩ avi Obede-Edom tyvy kuery ha'e javi reve, sessenta e oito ha'e javi vy. Jedutum ra'y Obede-Edom ha'e Hosa ma omoĩ okẽ re opena va'erã.
39 Ha'e rã sacerdote Zadoque ha'e tyvy sacerdote ikuai va'e ma omoĩ oo'i Senhor pegua Gibeão yvy'ã re oĩ va'e renonde rupi ikuai va'erã,
40 altar oĩ va'e áry Senhor pe mba'emo oapy reve ome'ẽ riae aguã, aje'ivekue ha'e ka'arukue. Ha'e rami ikuai Israel kuery pe Senhor lei oeja va'ekue re ipara oĩa ha'e javi rami.
41 Ha'e kuery reve omoĩ avi Hemã ha'e Jedutum, ikuaive ju hery rupi oiporavo pyre Senhor pe oporaei va'erã, mba'eta nhanemboaxya rupi oiko riae 'rã raka'e rã peve.
42 Ha'e kuery reve ikuai avi Hemã ha'e Jedutum mimby guaxu omonhe'ẽ aguã, ha'e hy'a pu ha'e mba'epu Nhanderuete pe ombopu aguã. Ha'e rã Jedutum ra'y kuery ma okẽ rarõa ikuai.
43 Ha'e va'e rire mae ma onhemboaty va'ekue peteĩ-teĩ ngoo katy oje'oi. Davi voi oo ju ngoo pygua kuery ogueroayvu porã aguã.