5
Débora oporaeiague
1 Ha'e va'e ára Débora ha'e Abinoão ra'y Baraque reve oporaei vy aipoe'i:
2 — Israel kuery renonde huvixa kuery onhemoĩmba,
ha'e heta va'e kuery onhenhandua rupi ojeko me'ẽmba ramo
penema'endu'a porã Senhor re.
3 Pendu ke, huvixa kuery. Pejapyxaka, yvatekueve:
Xee, xee ae ma aporaei ta Senhor pe.
Aporaei ta Senhor Israel kuery Ruete pe.
4 Ndee Senhor, Seir gui reẽ vy,
Edom regua nhuũndy guive rejerojy reovy ramo
yvy oryryi, yva gui hayvi avi.
Tá, arai voi ombo'oky rayvi.
5 Senhor renonde rupi yvyty ikuai va'e omy-omyĩ,
yvyty Sinai voi, Senhor Israel kuery Ruete renonde.
6 Anate ra'y Sangar oiko jave,
Jael avi oiko jave ma ndoaxavei mba'emo vendea kuery.
Oguata va'e kuery voi opia oje'oivy tape vaikue rupi.* Ha'e kuery okyjepa rei Canaã pygua huvixa Jabim ha'e ixupegua xondaro ruvixa Sísera gui. Ha'e nunga rupi ndoguatavei tape rupi, ha'e guekoa voi oeja reipa.
7 Israel yvy re tekoa ikuai va'ekue tekoa e'ỹa opyta, okyrirĩmba rei,
xee Débora apu'ã peve,
Israel kuery va'e regua xy aiko va'e apu'ã.
8 Nguuete pyaurã Israel kuery ojou ramo
hetã kora rokẽ py oiko joe opu'ã va'e.
Israel kuery quarenta mil ikuai va'eri
ha'e kuery mbyte py ndojoui hu'y jokoa neĩ hu'y guaxu.
9 Xekuraxõ oo Israel regua xondaro kuery ruvixa re,
heta va'e kuery rerekoarã onhenhandua rupi onhemoĩ ramo.
Penema'endu'a porã Senhor re!
10 Peẽ kuery mburika xiĩ va'e áry peĩ va'e,
peikuaa potaa py peguapy va'e,
ha'e tape rupi peguata va'e voi pendeayvu avi ha'e nunga re.
11 Yy rerua kuery oporaei va'e,
mymba kuery oy'uaty yakã ikuai va'e mbyte rupi
pendeayvu Senhor gueko porãa rupi ojapo va'e re,
mba'eta gueko porãa rupi oipytyvõ Israel re hekoa va'e.
Ha'e rami rire Senhor pegua kuery
ha'eve ju ngoo katy ojevy aguã.
12 Emyĩ ke Débora, emyĩ ke.
Evy ke, ekeve eme, emonhendu mboraei.
Epu'ã ke Baraque, ndee Abinoão ra'y,
eraapa ke ndejopyare kuery rejokua reve.
13 Ha'e ramo oguejy avi yvatekueve rembyre,
Senhor pegua kuery xereve guarã oje'oi ipo'akakueve rovai.
14 Efraim kuery va'e regua Amaleque yvy yma guare re ikuai va'e
ma joe opu'ãa katy oguejy jogueravy.
Ha'e gui ndee Débora nderakykue
oje'oi avi Benjamim regua guetarã kuery reve.
Maquir gui oguejy xondaro ruvixa kuery,
Zebulom gui voi ou po pygua ojopy reve jogueraa va'e kuery.
15 Issacar regua yvatekueve voi Débora rupive oje'oi.
Issacar kuery ma Baraque rupive oje'oi,
hakykue oguejy jogueravy yvy'ã guy katy.
Ha'e rã Rúben kuery va'e regua mbyte ma
joo rami e'ỹ-e'ỹ ijayvu okuapy.
16 Mba'e re tu vaka kora rupi ri pepyta pekuapy
mimby pu pendua py rive?
Rúben regua joo rami e'ỹ-e'ỹ ijayvu okuapy.
17 Gileade pygua kuery voi Jordão yakã rovai re opyta.
Ha'e Dã kuery, mba'e re tu kanoã guaxu yvýry opyta okuapy?
Aser kuery voi oguapypa okuapy ye'ẽ rembe re,
opytu'u porã okuapy ye'ẽ rakã pa'ũ py.
18 Ha'e rã Zebulom kuery va'e regua ma ndojeayvuveikue py oo,
Naftali kuery voi nhuũndy yvy'ã re oje'oi.
19 Ha'e gui huvixave kuery ono'õ vy joe opu'ã okuapy.
Canaã pygua huvixa kuery opu'ã okuapy Taanaque py,
Megido yy yvýry.
Ha'e rami teĩ prata guigua mba'eve ndogueraai omba'erã.
20 Mba'eta yva guive ma voi jaxy-tata opu'ã okuapy Sísera rovai,
oaxa ovya rupi ae opu'ã.
21 Quisom yakã voi ogueroxyrypa,
Quisom yakã opu'ã jepiaty ae.
Xenhe'ẽ, ejerojyve tema, nembaraete ke.
22 Ha'e ramo kavaju kuery ipyambu onhaa rupi,
hi'árygua kuery joe opu'ã aguã katy ogueronha ramo.
23 Senhor-a guigua anjo aipoe'i: “Pendeayvu vai ke Meroz tetã re.
Pendeayvu vai ha'e py ikuai va'e re,
mba'eta ha'e kuery ma Senhor jogueraa jepe aguã katy ndooi rire,
Senhor jogueraa jepe aguã katy ndooi ixupegua ipy'a guaxukueve reve”, he'i.
24 Ha'e rã Jael ma kunhague mboae gui ayvu porãvepy toiko,
queneu regua Héber ra'yxy va'e.
Ayvu porãvepy toiko kunhague oguy py ikuai va'e ha'e javi gui.
25 Mba'eta ava va'e ovaẽ vy yy re ojerure ramo ixupe ome'ẽ kamby.
Karo yvatekueve pegua va'e py ae ome'ẽ kamby nhandykue.
26 Ha'e gui okuave'ẽ yvyra rakua ituia katy,
oiporu kuaa regua re okuave'ẽ omba'eapo va'e kuery karavo ombotaaty re.
Ha'e vy Sísera re ombota vy
ombovo inhakã,
ombokua vy omboaxa inhakã rupi.
27 Ha'e rã kunha va'e py yvy'iry ojero'a,
ho'a vy ipukupa oupy.
Ipy yvýry ojero'a vy ho'a.
Ojero'aa pyve ho'a vy omano.
28 Ha'e gui ma Sísera xykue'i ma janela jokoa pa'ũ rupi oma'ẽ ho'amy.
Ha'e vy janela gui haxẽ reve aipoe'i:
“Mba'e re tu ikaróxa ndou voi ri?
Mba'e re tu hymba kavaju kuery ndoguata pojavai ri?” he'i.
29 Ha'e rã kunhague hi'arandukueve ombovai okuapy,
ha'e rã ha'e voi ombovai ojeupe ae:
30 “Ndojoui 'rã ri nda'u, nomboja'oi 'rã ri nda'u mba'emo oipe'apa va'ekue?
Peteĩ-teĩ ava pe peteĩ e'ỹ vy mokoĩ kunhataĩ nome'ẽi 'rã ri ty'y?
Ha'e gui Sísera peguarã ae ma opyta 'rã ajukue joegua e'ỹ-e'ỹ pytã va'e,
ha'e ramo peteĩ e'ỹ vy mokoĩ ajukue ombojeguapa pyre e'ỹ nda'u
gua'yxy aju'y re omoĩ 'rã?” he'i.
31 Ha'e rami ae Senhor, tomanomba nderovaigua kuery ha'e javi.
Ha'e rã nderayvua kuery ma
kuaray hexakã ouvya rami taexakã — he'i.
Ha'e rami rire yvy re opytu'upa quarenta ma'etỹ re.
*5:6 Ha'e kuery okyjepa rei Canaã pygua huvixa Jabim ha'e ixupegua xondaro ruvixa Sísera gui. Ha'e nunga rupi ndoguatavei tape rupi, ha'e guekoa voi oeja reipa.