5
Jó Nhanderuete oeka aguã re Elifaz ijayvuague
1 — Ejapukai aỹ! Ha'e rami teĩ oiko ri nda'u nerenduarã?
Mava'e anjo iky'a e'ỹ va'e pe tu renhepytyvõ uka ta?
2 Mba'eta hi'arandu e'ỹ va'e ipoxya ae ombovaipa 'rã.
Inhakã porã e'ỹ va'e ivaia rive 'rã ojuka.
3 Xee ma aexa porã hi'arandu e'ỹ va'e onhemoingo porã merami ramo.
Ha'e rami teĩ are'ỹ'i re aikuaa hoo oĩa ayvu vaipy oikoa.
4 Ta'y kuery voi mombyry ikuai ipytyvoarã gui.
Tetã kora rokẽ py ha'e kuery ojexa uka rã ombopagaa,
heraa jepearã ndoikoi ramo.
5 Ha'e kuery onhotỹ va'ekue ma ijajupa rã ikaruai va'e kuery ho'upa rive 'rã,
juu mbyte rupi henhoĩ va'ekue voi oipe'apa 'rã.
Ha'e mba'emo oguereko va'ekue ma oikuaa pota rei va'e kuery omokanhymba 'rã.
6 Mba'eta teko axy ma yvyku'i gui rive ndoikoi,
yvy gui e'ỹ henhoĩ jajexavai aguã.
7 Ha'e rami 'rãgue py avakue ojexavai aguã rami ae 'rã itui'i,
tapyĩ gui tata raviju yvate katy ae 'rã ovevea rami.
8 — Ha'e gui xee va'e rire ma aeka 'rãgue Nhanderuete,
ixupe anho amboaxa 'rãgue xereko.
9 Mba'eta ha'e ma ojapo 'rã mba'emo tuvixa va'e oikuaa pyrã e'ỹ,
ha'e nhomondyipaarã omombe'u kuaa pyrã e'ỹ.
10 Ombo'oky 'rã yvy áry rupi,
omoakỹ 'rã mba'ety ikuai va'e.
11 Ha'e rami vy ogueraa jepe 'rã yvyĩgue'i peteĩ henda yvatea py,
ojae'o va'ekue oiko porãa rupi ovy'a nho aguã.
12 Ha'e rã jokorea kuery onhembopy'aa ma ha'e ombovaipa 'rã,
opo py ojapoxe va'ekue ndojapo kuaai aguã.
13 Ombo'a 'rã oikuaapave va'e nhombotavya py ae.
Ha'e ramo oikuaapa va'e onhembopy'aague opa rive 'rã.* 1 Coríntios 3.19
14 Ha'e kuery ma ara py teĩ ojou 'rã pytũa anho,
kuaray mbyte jave teĩ pytũ rupi merami ikuai, opovyvy 'rã oje'oivy.
15 Nhanderuete ma jogueraa jepe 'rã ha'e kuery juru gui kyxe oẽ va'e gui,
ipo'akave va'e po gui ogueraa jepe 'rã ojexavai va'e.
16 Ha'e rami rã oĩ 'rã iporiaukue'i oarõ okuapy aguã,
ha'e rã joapo vaia kuery ma okyrirĩmba 'rã.
17 — Ovy'a ete 'rã avakue Nhanderuete omo'arandu va'e.
Ha'e nunga rupi endu rive eme Ipo'akapave va'e nemo'arandu rã.
18 Mba'eta ha'e ma nhomboai 'rã, ha'e gui ha'e ae ju oipoano 'rã.
Nhomomba'eaxy 'rã, ha'e gui opo py ae ju 'rã omonguera.
19 Seis-kue rejexavaia gui ha'e ndereraa jepe 'rã,
ha'e sete-a py voi mba'emo vai nanderupityi 'rã.
20 Karuai py teĩ ndereraa jepe 'rã remano aguã gui,
joe opu'ãa py guive ndereraa jepe 'rã kyxe po'akaa gui.
21 Nderepy 'rã ayvu vai gui,
ha'e ramo mba'emo mbovaipaarã ovaẽ rã rexa teĩ nderekyjei 'rã.
22 Mba'emo mbovaipaa ha'e karuai oiko rã repuka 'rã,
vixo ka'aguy regua gui guive nderekyjei 'rã.
23 Mba'eta yvy rupi ita ikuai va'e reve voi rejapo 'rã peteĩ rami ikuai porã aguã,
mymba yvy regua voi ndereve ikuai 'rã peteĩ rami.
24 Reikuaa 'rã ndero py mby'a porã oĩa,
ha'e mba'emo rereko va'e ikuaia rupi reikuaa pota reovy rã ndoatai 'rã mba'eve.
25 Reikuaa avi 'rã neramymino kuery heta 'rãa,
ndeguigua kuery yvy re jai rogue ikuai va'e rami 'rã heta.
26 Ndetuja'i jave teĩ nembaraete reve 'rã reo yvyra rupa py,
trigo ojokua pyre hi'ára py porã omono'õa rami.
27 — Ma'ẽ, ha'e nunga re roikuaa pota rã ha'e rami ae.
Ejapyxaka ndee voi, ha'e nunga re eikuaa pota avi reiko porã aguã — he'i.