10
Nhanderuete rovai Jó ijayvuague
1 — Xenhe'ẽ py ndarovy'avei ma xerekove.
Xeayvu 'rã ndavy'aia ha'e javi re,
xenhe'ẽ py ajexavaia aendu reve 'rã xeayvu.
2 Aipoa'e 'rã Nhanderuete pe: “Xembopagave eme.
Eikuaa uka porã ke mba'emo vai xere rejou va'e.
3 Ndee nda'u xembojexavaixe vai ri?
Mba'eta reja merami neremimoingo ndepo py ae rejapo va'ekue.
Tyrã pa heko vai va'e kuery onhembopy'aa rive rejou porãve?
4 Ndee voi teve to'o guigua nderexa va'e?
Avakue oexaa rami ae avi teve ndee voi rejoexa?
5 Imarã va'e kuery oikoa ára rami teve nde'ára voi oĩ?
Ha'e ndee reikoa ma'etỹ teve avakue oikoa ma'etỹ rami,
6 xereko vaia re reikuaa pota aguã,
ha'e ajejavya re rexa pota aguã?
7 Ndee ma reikuaa porã ojejavy va'ety e'ỹ aikoa.
Ha'e rami teĩ ndoikoi ndepo gui xereraa jepearã.
8 Ndepo py ae xemboypy ha'e xeapopa va'ekue.
Aỹ ma xemombaxe ju.
9 Nema'endu'a ke yapo gui rive xeapoague re.
Ha'e rã aỹ ta'vy yvy ku'i ju xemoingoxe?
10 Kamby rami e'ỹ teve renhoẽ xerekove,
ha'e kamby kekue rami rive teve xeapo?
11 Xepire ha'e xero'orã py xemonhemonde,
ha'e gui xekãgue ha'e xerajyrã reipopẽ va'ekue.
12 Xerekoverã reme'ẽ va'ekue ndeporayvua rupi,
ha'e xere repenaa rupi xerarõ va'ekue.
13 Ha'e nunga renhomi nekuraxõ py.
Va'eri aikuaa porã po rami renhembopy'aa.
14 Xapy'a rei ajejavy ramo ndee reikuaa pota 'rã.
Ha'e rami vy neremboguei 'rã xereko vaiague.
15 Xapy'a rei xereko vai ramo nda'evei ete 'rã xevy!
Ha'e rami avi xereko porã vy ma nda'evei avi xeakã amopu'ã aguã,
mba'eta axĩmba reve anho aexa xeporiaukuea.
16 Mba'eta xeakã amopu'ã ramo ndee xembo'a 'rã guary inharõ va'e rami.
Ha'e vy xerovai rexa uka ju 'rã ndepo'akapaa.
17 Rembou ju 'rã xerovai ijayvu va'erã,
ha'e remboeta 'rã xerovai ndevaia.
Mba'emo vai anho rembou 'rã xere opu'ã va'erã.
18 Mba'erã tu ha'vy xerenoẽ raka'e ha'i rye gui?
Ai! Avave xerexa e'ỹ re amano ma voi va'e rire
19 xee ndaikoi ma voiague rami 'rãgue aĩ,
ha'e xeryru'i py aĩa guive xereraa 'rãgue xenhono porãa aguã katy.
20 Mbovy'i e'ỹ teve oĩ xe'ára?
Epytu'u ke ha'vy, xereja,
xapy'a'i ri jepe xekane'õgua aguã,
21 ha'e xee aa e'ỹ mbove peteĩ henda ha'e gui ajevy ju e'ỹa katy,
yvy pytũa ha'e manoa'ã oĩa py,
22 yvy huũ reia, pytũ etea,
yvy manoa'ã ha'eve'ỹa ramigua anho oĩa,
hendy va'e eteve voi pytũa py”, he'i.