37
1 — Ha'e nunga re xema'endu'a vy xekuraxõ oryryi rei,
opo-opo guive, oĩaty gui oẽ ta merami.
2 Pendu pota ke Nhanderuete guigua yapu re,
ijuru gui hevovo va'e onhendu va'e re.
3 Yva guy ha'e javi rupi gui omondouka 'rã
ojea gui overa va'e reve yvy apy peve.
4 Ha'e va'e rire ijayvu atã nhendu 'rã,
yvatevea py onhemboxi 'rã hyapu reve.
Ha'e ndopoi e'ỹi 'rã overa va'e ijayvua onhendua rupi.
5 Nhanderuete ijayvu reve hyapu 'rã nhomondyipaa rupi.
Ojapo 'rã mba'emo tuvixa va'e, jaikuaa e'ỹ va'e.
6 Mba'eta yro'y apĩ pe aipoe'i 'rã: “He'a ke yvy áry”,
ha'e gui oky ha'e oky xapy'a-py'a va'e pe ma “Penembaraeteve ke”, he'i 'rã.
7 Ha'e rami vy ojapo 'rã avakue ha'e javi po oĩ rive aguã rami,
hembiapo re ju ha'e kuery oikuaa pota aguã.
8 Vixo ikuai va'e voi oike 'rã onhemiaty py,
ha'e vy okua py 'rã ikuai.
9 Yvytu jere oẽ 'rã ouvy opy ja'o oĩaty gui,
ha'e rã yvytu ro'y ma kuaray yke katy gui 'rã oipeju.
10 Nhanderuete oipejua py rive ho'a 'rã yro'y,
ha'e ramo yupa itui va'e hatãmba 'rã oupy.
11 Arai ana overa va'e oua ma
omonyẽ 'rã okyrã.
12 Ha'e ramo arai ikuai va'e omondouka rã
oaĩmba 'rã oje'oivy opa rupi,
yvy jave áry rupi, ijayvuague ojapo aguã.
13 Ha'e nunga ha'e javi ombou 'rã yvy regua kuery re oma'ẽ vy,
omo'arandu e'ỹ vy omboaxy aguã.
14 — Jó, ejapyxaka pota na pova'e re,
Nhanderuete rembiapo iporã va'e re reikuaa pota aguã.
15 Ndee reikuaa teve marã rami pa Nhanderuete ojapo
overa va'e arai gui ojekuaa aguã rami?
16 Omombe'ua teve ndevy arai ikuai va'e marã rami pa yvate rupi ova-ova,
e'ỹ vy Oikuaapa va'e rembiapo porãgue ha'e javi?
17 — Mava'e tu ojapo ndeao raku-a rendu aguã rami
kuaray puku-a katy gui yvytu ou rã yvy jave rupi okyrirĩmba rei oiny jave?
18 Hexeve voi teve ndee yva reipyo kuaa avi yvate rupi,
jajexaa mba'emo ryku guigua rami overa rei va'e?
19 Orembo'e ha'vy ore voi ixupe oreayvu kuaa avi aguã.
Mba'eta ore ma pytũ rupi orekuai va'e vy mba'eve noromombe'u kuaai ixupe.
20 Amongue nda'u ixupe omombe'u 'rã xeayvuague?
Ha'e rami avakue ikuai va'e onhemomba ukaxe vy ma 'rã.
21 — Ma'ẽ, avakue ma yva re kuaray rexakãa re noma'ẽ mbaraetei 'rã,
yvytu oipejua rupi yva oiky'a'opa ma jave.
22 Kuaray apu'a'ia katy gui hexakã 'rã ouvy iju va'e,
Nhanderuete yvýry rupi ojekuaa 'rã hexakãa nhomondyipaarã.
23 Ipo'akapa va'e ma ndajaeko upityi 'rã.
Ha'e ma opo'akaa py yvate ete va'e,
ha'evea rami meme joguereko va'e guive, opa mba'e py heko porã va'e vy.
24 Ha'e rami rã henonde avakue ojererokyje 'rã.
Ha'e ma onhemo'arandu rei va'e kuery re noma'ẽi 'rã — he'i.