40
1 Jó pe Senhor aipoe'ive tema:
2 — Ha'e gui ijayvu poyi va'e nda'u nhombovake ta Ipo'akapa va'e reve?
Nguuete rovai ijayvu va'ekue tombovai aỹ — he'i.
Jó onhemo'yvyĩ'ia rupi ombovaiague
3 Ha'e ramo Jó ombovai Senhor. Ha'e vy aipoe'i:
4 — Xevy pe ma nda'evei. Mba'exa tu rombovai ta?
Ajoko 'rã xejuru xepo py.
5 Peteĩgue xeayvu rire teĩ nambovai kuaavei ma.
Mokoĩgue katu va'eri ndaxeayvu reguavei ma — he'i.
Nhanderuete po'akaa hembiapo oexa uka va'e re ijayvuague
6 Ha'e ramo yvytu jere mbyte gui Senhor ombovai ju. Ha'e vy aipoe'ive Jó pe:
7 — Eiko katu ha'vy ava rami.
Xee aporandu 'rã ndevy, ha'e rã ndee xembovai 'rã.
8 Ndee ta'vy remboyke rive 'rã xereko porãa?
Xemboeko vai 'rã teve renhemboeko porãvexe vy?
9 Tyrã ndee teve Nderuete rami ndejyva mbaraete va'e?
Ndee voi ndeayvu ryapu rei 'rã teve xee xeayvua rami?
10 — Ndejee emoĩ ha'vy ndeyvatea ha'e ndetuvixaa.
Enhemonde ndepo'akaa ha'e nerexakãa py.
11 Xevy pe exa uka ndepoxya.
Exa pota onhemboyvate rei va'e kuery re, ha'e eitypa.
12 Exa pota onhemboyvate rei va'e ha'e javi re, ha'e emo'yvyĩ'imba.
Epyrõmba vyvoi heko vai va'e kuery ikuaia re.
13 Ejatypa imbokuapy yvy ku'i py.
Ejao'ipa hova ituia py.
14 Ha'e rami rã mae 'rã xeayvu
reiporu kuaa regua py ae ndepo'akaa rami.
15 — Eikuaa pota aỹ hipopótamo ndereve amoingo avi va'ekue re.
Ha'e va'e ma vaka rami nhuũ ho'u oikovy va'e.
16 Imbaraetea ma hye re oĩ,
ipo'akaa ma hyepy ro'o re ae.
17 Huguai ma yary rakã rami hatã va'e.
Hi'u rajy ma oipopẽ mbyre rami oĩ.
18 Ikãgue ma overa va'e aygue rami imbaraete va'e.
Hetyma ma ferro aygue ramigua.
19 Ha'e va'e ma Nhanderuete remimoingo regua omboetevepy.
Imoingoare ae ome'ẽ kyxe hembiporurã.
20 Anhetẽ, yvy'ã ikuai va'e áry rupi oĩ nhuũ ho'u va'erã,
vixo nhuũndy regua ikuaiaty rupi.
21 Onheno 'rã yvoty ikuai va'e guy rupi,
takua'i ha'e yapo oĩ va'e rupi.
22 Ha'e ramo yvoty ae omo'ã 'rã inony.
Yy rembe rupi yvyra ikuai va'e mbyte py itui.
23 Yakã tyguaxu teĩ ndojapurai 'rã.
Ijuru peve ete Jordão yakã typy teĩ oiko porã rei 'rã.
24 Ha'e rã oma'ẽ ho'amy ramo amongue nda'u ojopy kuaa 'rã?
Ha'eve 'rã nda'u ixĩ rupi omoxãa aguã?