9
Arandua ngaru ojapo va'e re ijayvua
1 'Arandua ojapo ngoorã,
ha'e vy omoatyrõ sete ijytarã.* Apy ma Arandua re ijayvu, hoo va'e ngaru pavẽ pe ojapo va'e re rami.
2 Ojuka uka mymba ngaru ojapo aguã,
oguereko katu ma vinho, ha'e gui mesa áry omoĩmba.
3 Ha'e rami vy guembiguai kuery omondouka
tetã yvateve va'e áry rupi nhoenoĩ aguã. Aipoe'i uka:
4 “Ndapeikuaai rei va'e, peikepa ke apy!” he'i uka.
Hi'arandu e'ỹ va'e kuery pe aipoe'i uka:
5 “Peju ke pe'u mbojape xea py,
ha'e pey'u vinho areko katupa va'ekue.
6 Pendekuaive eme 'arandu e'ỹa rupi, ha'e vy 'rã peiko areve.
Tape 'arandu oĩa rupi anho peiko”, he'i uka.
7 Ha'e gui porojojai rei va'e kuery pe pendeayvu vy
peẽ ae pejejojai uka rei,
heko vai va'e kuery pe pendeayvu vy pejeavyky uka rei 'rã.
8 Nda'evei ae porojojaia pe nhandeayvu aguã, nhandevy ipoxy e'ỹ aguã.
Ha'e rã hi'arandu va'e pe nhandeayvu ramo ma nhanderayvu 'rã.
9 Hi'arandu va'e nhambo'e ramo ma hi'aranduve 'rã,
heko porã va'e nhambo'e ramo oiko kuaave 'rã ovy.
10 Senhor renonde jajererokyjea rupi jaiko vy 'rãe jaupity 'arandua,
Iky'a e'ỹ va'e jaikuaa vy 'rãe jaiko kuaa.
11 Mba'eta xereve vy anho peiko pukuve 'rã,
penerenonderã ma'etỹa amoĩ retave ramo.
12 Pene'arandu ri vy pendejeupe guarã ae 'rã pejou,
ha'e rã pejojojai reia py ma peẽ ae 'rã penhemoĩ vai.
Kunha hi'arandu e'ỹ va'e nhoenoĩ oinya
13 'Arandu e'ỹa ma kunha ojejoko kuaa e'ỹ ha'e opa marã rei onhendu va'e.
Ha'e nunga ma mba'eve ndoikuaai 'rã.
14 Oguapy 'rã oiny ngokẽ py,
tetã yvatevea py tenda áry oĩ 'rã,
15 oaxa va'e-va'e ha'e omba'eapo vy
oje'oi va'e pe aipoe'i aguã:
16 “Ndapeikuaai rei va'e, pejupa ke apy!”
Hi'arandu e'ỹ va'e kuery pe aipoe'i 'rã:
17 “Yy mondakue ma yro'yxã porãve,
ha'e mbojape nhemi rupi ja'u va'e ma heeve”, he'i.† Apy ma ijayvu nhemi rupi jajejavya re.
18 Ha'e rã ha'e pyguarã oenoĩ va'ekue ma ndoikuaai oĩa py manogue anho ikuaia,
ha'e py oike va'ekue ma yvykua manoa py meme ikuai.
Heko porã ha'e heko vai va'e reko re ijayvua
Arandu regua ayvu Salomão omombe'u va'ekue