15
1 Nhambovai porã'i ramo ipoxy va'e opytu'u 'rã ipoxya gui,
va'eri nhandeayvu poyi rei vy ma nhambopoxyve 'rã.
2 Hi'arandu va'e ijayvu rã jajou porã 'rã hi'arandua,
ha'e rã hi'arandu e'ỹ va'e ijayvu rã jaikuaa 'rã nda'ijarakuaaia.
3 Senhor oexa 'rã opa rupi,
heko vai va'e ha'e heko porã va'e kuery ha'e javi re onhangareko oiny vy.
4 Ayvu porã ma yvyra tekove me'ẽa,
ha'e rã ayvu vaikue rei ma nhanemonguerai rive 'rã.
5 Hi'arandu e'ỹ va'e ma tuu ombo'e ta teĩ noenduxei 'rã,
ha'e rã omongetaa rã oendu va'e ma oupity 'rã 'arandu.
6 Heko porã va'e ro py heta 'rã oĩ iporã va'e anho,
ha'e rã heko vai va'e ma ojou 'rã ojexavai aguã rive.
7 Hi'arandu va'e ijayvua py oexa uka 'rã hi'arandua,
ha'e rã heko vai va'e ma ha'e ramigua re'ỹ ae ipy'a.
8 Heko vai va'e Senhor pe mba'emo ome'ẽ teĩ ojeguaru 'rã,
ha'e rã heko porã va'e onhembo'ea oendu vy oguerovy'a 'rã.
9 Heko vai va'e reko gui Senhor ojeguaru,
ha'e rã teko porã rupi ikuai va'e ma oayvu.
10 Tape porã gui ojepe'a va'e ma ombopagaa raxa 'rã,
omongetaa rã noenduxei va'e omano 'rãe.
11 Yvy manoa ha'e ikua vaikue Senhor oikuaapa va'e vy
avakue ra'y kuery py'a re oĩ va'e katuve ma oikuaapa!
12 Jojojai rei va'e ma imongetaa re nda'ija'ei 'rã,
neĩ nonhembojai 'rã hi'arandu va'e re.
13 Nhandepy'a re vy'a oĩ va'e ojapo 'rã nhanderova porã rei aguã rami,
ha'e rã nhandeporiau reia ma nhanemonguerai reive 'rã.
14 Hi'arandu va'e py'a re oĩ oiko kuaaxea,
ha'e rã hi'arandu e'ỹ va'e ijayvua py voi nda'ijarakuaaive tema.
15 Ojexavai rei va'e ára ma nda'evei va'e meme,
ha'e rã nhandepy'a py mby'a oĩ vy ojapo 'rã nhanhenhandu porã riae aguã rami.
16 Jarekopa reve nhandereko eta rei 'rãgue py
ha'eveve nhandeporiaukue'i teĩ Senhor renonde jajererokyjea rupi jaiko.
17 Jajoayvua rupi e'ỹ vaka ikyrave va'e ro'o mbixy ja'u 'rãgue py
ha'eveve tembi'u jaexa'i va'e tema ja'u jajoayvua rupi.
18 Ivai ja rei va'e jogueropoxy rive 'rã,
ha'e rã ivai rive e'ỹ va'e ma nhomombytu'u 'rã joguero'aa gui.
19 Inhate'ỹ va'e oikoa ma tape juu anho ikuaia rami,
ha'e rã heko porã va'e oikoa ma tape ijoja porã va'e rami.
20 Ta'y hi'arandu va'e ombovy'a 'rã nguu,
ha'e rã hi'arandu e'ỹ va'e ma neĩ oxy voi ndoayvui.
21 Hi'arandu e'ỹ va'e oguerovy'a rei 'rã ijarakuaa e'ỹa,
ha'e rã avakue hi'arandu va'e ma ha'evea rami 'rã ikuai.
22 Nhanemongetaarã ndoikoi ramo jaipota va'e voi ndoikoi avi 'rã,
ha'e rã nhanemongetaa heta ikuai rã ha'eve 'rã.
23 Avakue ha'evea rami ombovai vy ovy'a 'rã,
ayvu oĩ porã aguã rami ijayvua py.
24 Hi'arandu va'e tape ooa va'e ma yvate 'rã oo tekove katy,
manoa katy oguejy ovy 'rãgue py.
25 Senhor oitypa 'rã ojejou porã rei va'e ro,
ha'e rã imeve'ỹ va'e kuery pegua ma omoĩ atã 'rã.
26 Senhor ojeguaru heko vai va'e kuery onhembopy'aa gui,
ha'e rã ayvu porã ma oendu vy oguerovy'a 'rã.
27 Jokorea rupi ojou-joupavexe va'e ombojexavai 'rã ngoo pygua kuery,
ha'e rã teko vai rekoviarã ndojopyi va'e ma oikove riae 'rã.
28 Heko porã va'e onhembopy'a porã ranhe 'rã ombovai kuaa aguã,
ha'e rã heko vai va'e ma opa marã rei 'rã ijayvu.
29 Heko vai va'e ikuaia gui Senhor mombyry oĩ,
ha'e rã heko porã va'e onhembo'ea ma oendu 'rã.
30 Nhandererovy'aa rupi oma'ẽa ramo javy'a 'rã,
ayvu porã omombe'ua rã nhaendu vy nhanekãgue rupi voi nhanembaraeteve avi 'rã.
31 Ha'evea rupi nhanemongetaa rã jajapyxaka vy
hi'arandu va'e kuery reve 'rã nhanhemoirũ.
32 Nonhemo'arandu ukai va'e ha'e ae guekove nombovarei,
ha'e rã omongetaa rã oendu pota va'e ma ojou 'rã 'arandu.
33 Senhor renonde jajererokyjea rupi jaiko ramo nhanembo'e 'rã 'arandu re,
ha'e nhanhemo'yvyĩ'i ramo nhanemboetea 'rã.