28
Arandu regua ayvu joo ramigua e'ỹ-e'ỹ oĩa
1 Heko vai va'e ojava 'rã ovy oakykue monhaa e'ỹ teĩ,
ha'e rã heko porã va'e ma guary rami 'rã ipy'a guaxu.
2 Yvy re ikuai va'e heko vai rei ramo huvixa kuery nhomboekovia jepi 'rã,
va'eri peteĩ hi'arandu ha'e oiko kuaa va'e oĩ vy
ojapo 'rã ikuai porã ha'e oĩ atã aguã rami.
3 Ava iporiaukue oirũ kuery iporiaukue'i avyky reia omomba 'rã,
oky mba'emo aju ogueroxyrypa ha'e neĩ mba'eve ndoejai va'e rami.
4 Lei rupi e'ỹ ikuai va'e oguerovy'a rei 'rã heko vai va'e reko,
ha'e rã lei rupi ete ikuai va'e ma ndojou porãi 'rã.
5 Avakue heko vai va'e ndoikuaai 'rã mba'e pa teko porã,
ha'e rã Senhor oeka va'e ma oikuaapa 'rã.
6 Iporiau e'ỹ va'e teko vai rupi ikuai va'e gui
ha'eveve iporiaukue'i iky'a e'ỹa rupi ikuai va'e.
7 Lei rupi ta'y oiko va'e ma hi'arandu va'e,
ha'e rã opa marã rei ikuai va'e reve onhemoirũ va'e ma omoxĩmba rei 'rã nguu.
8 Jokorea ha'e ojou retavexea rupi mba'emo ojouve heravy va'e ma
iporiaukue'i mboaxya peguarã ae omono'õ.
9 Lei py oĩ va'e re ndojapyxakaxei vy oapyxa omboty va'ekue ma
mba'emo re ojerure ára teĩ ixugui ojeguarua 'rã.
10 Tape vai rupi heko porã va'e reropiaare kuery ma
ha'e kuery ae ho'a 'rã yvykua ojo'oague py,
ha'e rã anhetẽ rupi ikuai va'e ma iporã va'e anho 'rã ojou.
11 Avakue oguerekopa va'e ha'e kuery ae oikuaa rami ojeupe “Hi'arandupa va'e”, he'i 'rã,
ha'e rã iporiaukue'i hi'arandu va'e ma oikuaa pota kuaa 'rã.
12 Heko porã va'e ipo'aka ramo ovy'a pavẽ 'rã,
ha'e rã heko vai va'e ipo'akave ramo ma avakue onhemimba 'rã.
13 Ojejavyague onhomi va'e ndoiko porãi 'rã,
ha'e rã ojejavyague omombe'u ha'e oejapa va'e ma oupity 'rã omboaxya aguã.
14 Ovy'a ete 'rã Nhanderuete renonde ojererokyjea rupi oĩ atã va'e,
ha'e rã inhakã ratã va'e ma ho'a 'rã teko vai py.
15 Heko vai va'e guetarã kuery iporiaukue'i va'e re ipo'aka va'e ma
guary okororõ, e'ỹ vy urso joguero'a va'e rami avi.
16 Huvixa hi'arandu e'ỹ va'e nhombojexavaive rive 'rã,
ha'e rã akate'ỹ reia ojou vai va'e ma oikove riae 'rã.
17 Avakue tuguy moẽa rupi ikuai va'e okanhy 'rã yvykua katy oo vy.
Mava'eve rei tojokoa eme.
18 Anhetẽ rupi ikuai va'e oo jepe 'rã,
ha'e rã teko vai rupi ikuai va'e ma ho'apa vyvoi 'rã.
19 Oyvy karaĩ riae va'e ojou reta 'rã mbojape,
ha'e rã ovare e'ỹ va'e kuery reve onhemoirũ va'e ma iporiaukue riae 'rã.
20 Avakue ojeroviapy va'e omoingo porãa 'rã,
ha'e rã oguerekopa aguã re rive nda'eveive va'e ma ndopaga e'ỹi 'rã.
21 Peteĩ rive jayvuve ramo nda'evei,
mba'eta avakue onhemboapu 'rã peteĩ juru'i mbojape re rive.
22 Guexa py oipotapa rei va'e ma omba'e rei-reirã rakykue rupi rive 'rã onha-onha oikovy,
va'eri ndoikuaai guive imomboriauarã ou oinya.
23 Oapekũ py ijayvu porã rei rive va'e 'rãgue py
nhomongeta porã va'e omboeteave 'rã.
24 Nguu e'ỹ vy oxy gui imonda vy “Ajejavya e'ỹ” he'i va'e ma
nhomombaaty irũ oiko.
25 Oipotapa rei va'e ojapo 'rã joguero'apa rei aguã rami,
ha'e rã Senhor re ojerovia va'e ma oiko porã 'rã.
26 Opy'a py ojee ae ojerovia va'e ma hi'arandu e'ỹ va'e,
ha'e rã 'arandu rupi ikuai va'e ma oo jepe 'rã.
27 Iporiaukue'i pe mba'emo ome'ẽ va'e pe ma mba'eve ndoatai 'rã,
ha'e rã iporiaukue'i gui ojeova mo'ã va'e re ma ijayvu vaia 'rã.
28 Heko vai va'e ipo'akave ovy ramo avakue onhemimba 'rã,
ha'e gui heko vai va'e okanhymba ma rire heko porã va'e hetave 'rã.