4
Ime ijayvuague
1 Ma'ẽ xerembiayvu, ndee neporã vaipa!
Neporã ete!
Nderexa ma apykaxu rexa rami iporã,
nderova mo'ãa rovai teĩ nderexa pyxo porã.
Nde'a ma kavara kuery Gileade regua yvyty áry gui oguejy jogueruvy va'e rami huũ.
2 Neraĩ ma vexa'i kuery hague ojayapaa ramo'i va'ekue
ombojauague gui oẽ jogueravy va'e rami xiĩ.
Ha'e kuery peteĩ-teĩ oguereko mokoĩ'i ma voi va'e,
ha'e neĩ peteĩve ma voi ndata'y e'ỹi va'e rami.
3 Nerembe ma nhimbo pytã iporã va'e rami.
Ndejuru ma iporã ete.
Nderova ma romã'a omboja'o pyre rami xiĩ porã rei,
nderova mo'ãa rovai teĩ iporã jekuaa.
4 Ndeaju'y ma Davi torre tembiporu moĩ porã atyrã ojapo va'ekue rami.
Ha'e va'e re mil hu'y jokoa ikuai xondaro ipy'a guaxukueve oupi imoiny va'ekue rami.
5 Nekã mokoĩve ma guaxu ta'y'iague meme
yvoty ikuai va'e rupi okaru okuapy va'e rami.
Ta'yxy ijayvuague
6 Ára yro'y rei'i ha'e pytũ e'ỹ teria ja
aa 'rã yvy'ã mirra ha'e heakuã porã va'e oĩa py.
Ime ijayvuague
7 Xerembiayvu, ndee ma neporã.
Ndere jipoi ndevaikuea.
8 Xerembireko, eju xereve Líbano gui,
eguejy xereve yvyty Líbano regua gui.
Ema'ẽ Amana yvyty apyte gui,
Senir ha'e Hermom yvyty gui,
guary kua ha'e yvyty xivi ikuaia gui.
9 Xereindy xerembireko, reipe'a ma xekuraxõ.
Reipe'a ma xekuraxõ rema'ẽa py rive'i,
ha'e peteĩ'i apu'a'i ndepo'y re oĩ va'e py.
10 Ndee xerayvua ha'eve vaipa, xereindy xerembireko.
Vinho gui xeayvua ha'eveve,
ha'e nereakuãa ma pavẽ heakuã va'e gui iporãve va'e.
11 Xerembireko, ndejuru gui ei rami he'ẽ va'e otyky,
neapekũ guy py ma ei ha'e kamby oĩ.
Ndetupyja ma Líbano yvy regua rami heakuã porã.
12 Xereindy xerembireko, ndee ma yvotyty ikorapa va'e rami reiko,
peteĩ yvu ojao'i pyre rami.
13 Nderegua ma romã'y ty ikuaia va'e rami,
hi'a porã va'e meme.
Ha'e py ikuai hena ha'e nardo'y,
14 nardo ha'e açafrão'y, cálamo ha'e canela'y.
Opa marãgua yvyra ikuai avi heakuã porã va'e:
mirra ha'e aloés, ha'e heakuã porãgueve ha'e javi ikuai.
15 Ndee ma yvu yvotyty moakỹa rami,
ygua yy oxyry va'e oĩa,
yakã Líbano regua yvyty gui oxyry atã va'e rami!
Ta'yxy ijayvuague
16 Yvytu kuaray apu'a'ia katygua, eju na.
Eju, ndee yvytu kuaray puku-a katygua.
Eipeju xe yvotyty rupi,
eraa heakuã porã va'e oetũa aguã katy.
Ha'e gui ma xerembiayvu tou omba'e yvotyty py,
to'u yvyra'a iporãve va'e!