28
3 Yo, Djamiyulnydja liŋguna rakunydhinana, ga dhurrwaraŋuru ŋuliŋuruyinydja walalanydja nyä'yunminana yukurrana nhanŋu, bala ŋanya dholkuŋalanydja rumbalnydja * RamahRämalilina wäŋalili yäkulili. Yo, ŋayinydja Djolnydja mukthurrunaŋga yana ŋurruŋu ŋayi wal'ŋu, ga ŋayinydja ŋuli yukurranha gukunhana ŋunhinydja marrŋgitjnha yolŋu'‐yulŋunha ŋunhi walala ŋuli yukurranha waŋanhaminya mokuywala ŋurikala rakunymirriwala yolŋu'‐yulŋuwala. Yo, djuy'yurrunana yana gukuŋalana ŋayi walalanha yanana yolŋunydja † IsraelYitjuralŋurunydja wäŋaŋuru. 4 Ga dhäŋuru ŋuliŋuru Bilitjiyapuyŋunydja biyapul yurrum'maranhamina, mala‐märranhamina bunharawu ŋuruku Yitjuralpuyŋuwuna, ga Djolnydja bitjarrayi liŋgu ḻuŋ'maraŋalana nhanŋuwaynydja miriŋunha. Ŋayi Djolnydja ga nhanŋu miṯtji wäŋaraŋala ŋunhala galki ‡ GilboaGilpuwa wäŋaŋura yäkuŋura bukuŋura. 5-6 Djolyu nhäŋalanydja bitjarra ya' miriŋunha ŋunhi Bilitjiyapuyŋunhanydja, yurru biyapul warray wal'ŋu, djuḻkmarama warray yukurra miṯtji, bala ŋayi gay' beyaṉiyinana wirrkina. Ŋayi ŋäŋ'thurruna Garraynha, “Nhaltjan yurru dhuwala ŋanapurru yolŋunydja?” bitjarra. Yurru Garraynydja yaka ŋula nhanŋu buku‐ruŋiyinmaraŋala dhäruk, yakana waŋganydhu ŋula yolŋuyu dhäruk nhanŋu wekaŋala Garraywuŋu.
7 Bala Djol bitjarrana waŋana nhanukalaŋuwala ŋurukala malawalanydja, “Yol balaŋu yolŋu marŋginydja ŋunhi ŋayi yurru waŋa mokuywala yolŋu'‐yulŋuwala? Ŋarra yurru waŋanydja ŋanya ŋäŋ'thun ŋunhiyi, ga ŋayina yurru ŋarraku ḻakarama nhaltjanarawu ŋula.”
Ga walalanydja waŋana ḻakaraŋala nhanŋu, “Ŋunha nhäyika § EndorYandu wäŋaŋura, dhäyka yukurra nhina ŋunhi ŋayi ŋuli waŋa'‐waŋa mokuywala; ŋayi ŋuli yukurra dhäwu' märrama rakunymirriwala yolŋu'‐yulŋuwala.”
8-10 Bala ŋayi Djol dhaṯthunminana girri'yuna, wiripukunhaminana rumbalnha ŋanyapinyay, ga munhakuna ŋayi marrtjinanydja ŋurikalayi, ŋunhiyi withiyara miyalknhanydja. Ŋayi waŋananydja bitjarra, “Ŋarra ḏukṯuk nhuŋu, nhe yurru wäthun ŋula yolŋuwu rakunygu, ŋarra ḏukṯuk ŋarra yurru waŋa nhanukala. Ŋarra yurru dhä‐wirrka'yun ŋanya nhaltjan yurru ŋanapurruŋgu.”
11 Ga ŋunhi dhäykanydja waŋana bitjarra, “Yolku nhe ḏukṯuktja? Yolku ŋarra wäthundja yurru dhika?”
Ga ŋayi Djolyu ḻakaraŋalana bitjarrana, “Ŋarranydja ḏukṯuk * SamuelDjamiyulwu; ŋarra ḏukṯuk ŋarra yurru waŋa nhanukala Djamiyulwala.”
12 Bala ŋuriŋi dhäykayunydja marrtjina dharaŋara warray ŋanya Djolnha, bala waŋana bitjarrana, “Dhuwalanydja nhenydja giŋ warray bay', buŋgawa warray. Nhäku nhe ŋarranha mayali'‐wilkthurrunanydja?” bitjarra warray.
13-14 Ga Djolyunydja waŋana bitjarra, “Yaka barrariya,” bitjarra. “Yolnha nhe yukurra nhämanydja?”
Ga ŋayinydja ŋunhi miyalkthunydja ḻakaraŋala bitjarra, “Ŋarra yukurra nhämanydja dhuwala worruŋunha ḏarramunhanydja, yurru ŋayi ŋunha marrtji lili yulŋunydja, dhawaṯthun marrtji ŋulaŋuru munatha'ŋuru lili walma. Ŋunhinydja Djamiyulnha!”
15 Ga Djamiyulnydja waŋana nhanukala Djolwala bitjarra, “Nhäku nhe ŋarranha dhuwala roŋiyinmaraŋala liliyinydja dhipala munatha'lilinydja?”
Ga Djolnydja waŋana, “Ŋarranydja dhuwala mariŋura yindiŋura. Bilitjiyapuyŋunydja dhuwala nyäṉ'thurrunana, marrtjina yukurra bunharawu ŋanapurruŋguna, ga Godthunydja ŋanapurrunha gonha'yurrunana; yakana ŋayi ŋarraku buku‐ruŋiyinmaraŋala ŋunhi ŋarra märrliliyaŋalanydja nhanukala. Bala ŋarra wäthurruna nhuŋuna. Nhaltjan yurru ŋarra dhika yulŋunydja?” Bitjarra ŋayi yukurrana Djolyu dhä‐wirrka'yurruna ŋanya Djamiyulnha.
16 Ga Djamiyulyunydja ḻakaraŋala bitjarra, “Garrayyu nhuna liŋguna gonha'yurrunana. Nhenydja dhuwala balanyara bitjan miriŋuna nhanŋu Garraywu. 17 Ŋäthili Garrayyu nhuŋu yukurrana ḻakaraŋalanydja, marŋgikuŋalanydja bitjarranydja raypirri'yurrunanydja, ga dhiyaŋunydja‐wala ŋayi nhuna gonha'yurrunana, bitjarra yana liŋgu ŋunhi ŋayi nhuŋu ŋäthili yukurrana ḻakaraŋala. Garrayyu djaw'yurrunana nhanŋuway malanydja nhokalanydja, yakana nhenydja yurru buŋgawayirri walalaŋgu biyapul. Daypitnha yurru dhärra yukurra djäkamirrinydja nhokalanydja dharapulŋura, liŋgu nhe ŋuyulkthina Garraywu. 18 Ŋayi nhuna waŋana, nhe bini bunha warrpam'thuna yana † AmalekYamalikpuyŋunha ŋunhi, warrpam' yana dhawar'maranha, yurru nhenydja yaka warray malthurruna nhanŋuwaynydja dhärukku. 19 Goḏarrny'tja nhepi ga nhuŋu gäthu'mirriŋu malanha boŋguŋu murrmurryurruna, ga Bilitjiyapuyŋuyuna boŋguŋu djuḻkmaraŋu Yitjuralpuyŋunhanydja miṯtjinha.”
20 Djolyu ŋäkulanydja ŋunhiyi, bala ŋayi wirrkina dhika gorana ga beyaṉiyinana manapara; yakana ŋayi ḻukana ŋula nhä ŋatha.