1 Liŋgu muka nhuma ŋäthilinydja ŋäkula, ŋunhi ŋanapurru yukurra waŋgany-mana'-manapan rrupiya miṯtjiŋuru ga miṯtjiŋuru ŋuruku Godkalaŋumirriwu yolŋu'-yulŋuwu ŋunha Djudiyalili. Yakana ŋarra yurru biyapulnydja ḻakarama nhumalaŋgu. 2 Ŋarra marŋgi nhumalaŋgunydja, ŋunhi nhuma ḏukṯuk nhuma yurru guŋga'yun ŋunhayi ŋurruwuykmirrinha yolŋu'-yulŋunha, ga liŋguna ŋarra ḻakaraŋala yolŋu'-yulŋuwu dhiyala Matjataniyanydja nhumalanha ŋäthilinydja. Ŋarranydja nhumalaŋgala ŋurr'yurrunana bitjarrana gam', “Ŋunha Gorinbuy yolŋu'-yulŋu, ralpa-ralpa walala ŋunha yulŋunydja. Wirrki yana walala yukurra rrupiyanydja waŋgany-mana'-manapan wekanharawunydja,” bitjarra. Ga ŋunhi walala ŋäkula nhumalanha, ga walalanydja ŋurru-yirr'yurruna djäma wekanharawuna. 3 Dhuwalanydja ŋarra yurru djuy'yunna ŋunhinhanydja walalanha, ŋilimurruŋgu wäwa'mirriŋunhanydja walalanha, märr yurru nhuma djämana yana-wala. Buku-djulŋimirri, marrtjinyamaraŋana yana ŋunhiyi rrupiyanydja, ḻuŋ'maraŋana marrtjiya waŋgany-mana'-manaparrana, märr yurru ŋunhiyi rrupiyanydja girri'-ŋamathirrina ŋorra yukurra nhumalaŋguŋu. Yaka ŋarra ḏukṯuk ŋuruku Matjataniyapuyŋuwunydja, walala yurru birrka'yun yanapi ŋarra yukurrana waŋana djawukina, dhäruk waŋgany. 4 Liŋgu wiripunydja mak yurru dhipuŋuru Matjataniyaŋuru marrtji malthun ŋarraku, ga ŋuli walala yurru maḻŋ'marama ŋunhi nhuma yukurra bäyŋu ŋayathama rrupiya goŋdhu, ga ŋuriŋiyinydja ŋarra yurru gorana, ga nhuma yurru gorayi yana, liŋgu ŋarra ŋäthilinydja ḻakaraŋala walalaŋgala nhumalanha, ŋunhi nhuma yurru wekama be märryu-dhapinyayu yana. 5 Dhiyakuyina ŋarra yurru djuy'yun ŋunhayi wiripu-guḻku'nhanydja ŋathil'yundja ŋarrakalanydja, märr yurru nhumanydja ḻuŋ'maramana marrtji ŋunhi mundhurrnydja, ŋunhi nhuma dhawu'-nherrara. Nhumana yurru ŋäthilina ŋunhiyi ḏälkuŋanydja yukirriya, girri'-ŋamathiyana, yurruna ŋarra yurru buna. Ŋunhi walala yurru nhämanydja ŋunhiyi mundhurr, ŋunhi nhuma wekaŋala yäna ŋurikiyi ŋurruwuykkunydja guŋga'yunarawu, bala walalanydja yurru dharaŋanna ŋunhi nhumanydja wekaŋala nhumalaŋgalay warray yana ḏukṯukthu, yaka ŋarra nhumalanha gur'-guryurruna.

6 Guyaŋiya dhuwala gam': Ŋunhi ŋuli yolŋuyu ḻämu-nherraṉ ḻurrkun' märr maŋutji ŋatha, ŋuliŋuruyi ŋayi yurru märramanydja ḻurrkun' yana, ga ŋunhi ŋayi yurru ŋula yolthu ḻämu-nherraṉ guḻkuny'tja wal'ŋu, ŋayinydja yurru ŋuriŋiyinydja yolŋuyu märrama ŋuliŋuruyi dhirrimuk warray dhika wal'ŋu, biyapul warray. 7 Ga waŋga'-waŋganydhu nhuma yurru wekamanydja nhokalay nhe yana ŋayaŋuyu ŋunhiyinydja. Yaka yana wekaŋa djälthinyaramiriwnydja, ga yaka wekaŋa ŋula yolkala gur'-guryunarayu, yana wekaŋanydja nhokalay nhe djälyu, märryu-dhapinyayu ŋuriŋi wal'ŋu, liŋgu wirrki ŋayi yukurra Godtja märr-ŋamathirri ŋurikiyinydja yolŋuwu ŋunhi ŋayi ŋuli wekama märr-yiŋgathinyarayu yana. 8 Ŋunhi nhe yurru wekama märryu-dhapinyayunydja, nhepinydja yurru ŋunhi yakana nhina yukurra dhäpark, liŋgu Godthunydja yukurra ganydjarr ŋayathama wekanharawu biyapulŋuwu warray wal'ŋu, buku-yattjatkunharawu warray nhuŋu, märr yurru nhenydja bitjanna liŋguna ŋayathama yukurra gana'na, ga balanyara liŋgu nhe yurru ŋayathama nhä malanha gana'na yana guŋga'yunarawu ŋuruku wiripu-guḻku'wunydja yolŋu'-yulŋuwu. 9 Liŋgu ŋunha dhäruktja yukurra dhärra, ḻakarama yukurra bitjan gam',

10 Yo, Godthunydja ŋuli wekama ŋatha maŋutji malanha yolŋuwu ḻämu-nherraṉarawu, bala ŋuliŋuruyinydja yurru ŋuthan marrtji ŋathanydja yolŋu'-yulŋuwunydja ḻukanharawuna. Ga ŋunhi nhe yurru wekama ŋula nhä wiripuŋuwunydja yolŋuwu, ŋunhiyinydja bitjan nhe yurru ḻämu-nherraṉ maŋutji; yuwalk yana ŋayi yurru Godthu ŋunhiyi yindikumanydja, bala nhenydja yurru märrama biyapul'nha wal'ŋu nhä malanha ŋamakurru' nhuŋuway nhe, ga wiripu-guḻku'wu wekanharawu. 11 Yo, ŋayinydja yurru Godthunydja bitjan warray liŋgu märryu-dhapinyayu wekamana-wala yana nhuŋu, märr yurru nhenydja bitjanna liŋguna wekamana-wala yukurra wiripu-guḻku'wuna. Yo, ŋunhi ŋanapurru yurru wekamanydja nhumalaŋguŋu mundhurrnydja ŋuruku ŋurruwuykmirriwunydja Djudiyalilinydja, bala guḻku'yuna yolŋuyu walalay yurru buku-wurrpan Godnhanydja. 12 Liŋgu ŋunhi nhuma ŋuli wekamanydja yukurra ŋunhiyinydja, guŋga'yun yukurra Godkuna yolŋu'-yulŋunha, yakana biyapulnydja walala yurru nhina dhäpark, goŋmiriwŋura, bala walala yurru wokthunna dhika wal'ŋu Godkunydja, buku-wurrpanarayuna manapanarayu.

13 Yo, nhumanydja ŋuli ḻakaranhamirri bitjanmirri, “Ŋanapurrunydja yukurra nhina Garraywala warray Romŋura,” bitjan. Ga ŋunhi nhuma yurru bitjandhiyi dhäruktja märrama Garraynha, bala wekama märryu-dhapinyayunydja wal'ŋu, bala walalanydja yurru ŋuruŋu wiripu-guḻku'yunydja dharaŋanna nhumalanha, ŋunhi nhumanydja yuwalk yana Godku yolŋu walala, bala guḻku'yuna yolŋuyu walalay yurru Godnhanydja ḻatju'-ḻakarama. 14 Bala walala yurru märr-ŋamathirrina nhumalaŋgu, bala bukumirriyamana nhumalaŋgu yurru yulŋunydja, liŋgu nhumalaŋgu Godthunydja yukurra rarryunna nhanŋuway nhä malanha ŋamakurruny'tja. Go ŋilimurru buku-wurrpanna Godnhanydja mirithirrina wal'ŋu yana, 15 liŋgu ŋunhiyinydja ŋunhi ŋayi Godthu wekaŋala mundhurr ŋilimurruŋgu biyapul'nha dhikana wakinnha wal'ŋu, ŋunhi yukurra yakana dhäruk ŋorra ḻakaranharawunydja.