1 Yo, bawa'mirrina yana yolŋuwu ŋunhi ŋayi ŋuli ŋurr'yundja bitjan märr-winya'yundja manapan nhanŋuway ŋayi, yurru ŋarranydja märr-winya'yun yurru ga ŋurr'yun ḻakaranhamirri, märr ŋuli ya', bitjan walala ŋunha wiripu-guḻku'. Nhuma buku-djulŋimirri, mäkiri'-witjurra ŋarrakunydja walala. 2 Yuwalk wal'ŋu yana ŋarra märr-ŋamathirrinydja yukurra nhumalaŋgu, bitjan yana liŋgu bitjan God yana ŋayipi nhumalaŋgu märr-ŋamathirri yukurra. Nhumanydja miṯtji dhuwala balanyara bitjan yolŋu dhäyka, dhawu'mirriyanhara ŋayi ŋula yolku ḏarramuwu, yurru Christku warray ŋarra nhumalanhanydja dhawu'mirriyaŋala ŋunhi, märr yurru nhuma waŋganydhirrina manapanmirri nhanukalaynha Djesuwalana, waŋganygalana yana. 3 Yurru warwuyundja ŋarra yukurra dhuwala nhumalaŋgu wirrkina. Wiripunydja mak gonha nhumalanha yurru ŋula yolthu mayali'-wilkthun, bitjan bitjarra ŋuriŋi bäpiyu mayali'-wilkthurruna miyalknha Yepnha ŋuriŋina nhanukalay ŋayi djambatjthuna dhikana dhärukthu. Wiripunydja nhumalanha mak ŋayi yurru bilyunmarama gatjpaḻ'marama, märr yurru nhuma yaka biyapulnydja nhanŋuway waŋganygu Christkunydja.

4-5 Yo, warwuyunna ŋarranydja yukurra nhumalaŋgu. Ŋayi ŋuli ḻakarama dhäwu' wiripuyamanydja ŋanya Djesunha ŋula yolthu, bala dhunupana yana nhuma ŋuli dhäruktja ŋanya märrama; dhunupana yana nhuma ŋuli ḏupthunna dhäwuny'tja ŋunhi ŋanapurruŋguŋunydja ḻakaranhara, bala märramana ŋuli ŋunha wiripuŋunhana birrimbirrnha. Yo, nhuma ŋuli gurrum'thunna dhika mäkiri'-witjundja ŋuruku wiripu-guḻku'wunydja ŋunhi walala ŋuli be ḻakaranharamirri walalanhawuy walala ŋurruŋu wal'ŋu be buŋgawa bo'puyŋu. Yurru ŋarranydja dhuwala yaka ŋunha dhuḏiŋura walalaŋgala. Nhämirri ŋuli nhuma mäkiri'-witjurru ŋarrakuwaynydja. 6 Mak ŋarra ŋuli yaka waŋa djambatj dhäruk bitjan walala ŋuli waŋa, yurru wirrkinydja ŋarra marŋgi yuwalkku ŋuriki wal'ŋu, ga warraŋulnha wal'ŋu ŋanapurru ḻakaraŋalanydja bukmak nhänydja yana malanha nhumalaŋgu.

7 Ŋäthilinydja ŋunhi ŋarra dhiyaliyi nhumalaŋgala, ŋarranydja ŋuli ḻakaranha warray nhumalaŋgala Godku dhäwu', yurru yaka ŋarra gombuŋala nhumalanha rrupiyawunydja ŋurikiyi djämawuywunydja. Nyilŋ'maranhamina warray ŋarranydja ŋunhi, ga djämanydja ŋarra ŋarrakalay goŋdhu yana, märr yurru ŋarra nhumalanha gaŋgathinyamarama muka. Nhä dhuwalayinydja?... yätj? 8 Ŋunhiyinydja bitjarra ŋarra djaw'yurruna rrupiya ŋulaŋuru ŋurikala wiripu-guḻku'wala Garraywalaŋumirriwala miṯtjiwala, walalana ŋarranhanydja yukurrana wekaŋala, märr yurru ŋarranydja guŋga'yun nhumalanha yänana. 9-10 Ŋunhi ŋarra dhiyaliyinydja nhumalaŋgalanydja, wiripunydja ŋarra ŋuli nhinanha nhämiriwnha, yurru walala Matjataniyapuyŋuyu yukurrana ŋarrakunydja gäŋala lili; yaka ŋarra yukurrana ŋäŋ'thurruna nhumalanha ŋula nhäkunydja. Yaka ŋarra ŋäŋ'thurruna ŋula nhä nhumalanha ŋarrakuwaynydja ŋarra ŋäthilinydja, ga yakana yana yurru ŋarra nhumalanha ŋäŋ'thun ŋunhalanydja bala. Garraynydja dhuwala yuwalk yana, ga dhuwala ŋayi nhinanydja yukurra ŋarrakalana. Yuwalk ŋarra nhumalaŋgu ḻakaramanydja yukurra. Yakana ŋarra yurru ŋula nhä rrupiyanydja märrama nhumalaŋguŋu Gorinbuyŋuwuŋunydja, yakana. Yakana nhuma yurru rrupiyayunydja bäyim ŋunhi dhäwuny'tja.

11 Ŋunhi ŋarra yukurra dhuwala waŋanydja bitjandhiyi, nhä dhuwalayinydja mayali?... yaka ŋarra nhumalaŋgu ŋuli märr-ŋamathirri? Godtja Gunhuny'tja ŋarraku marŋgi, ŋunhi ŋarranydja yukurra märr-ŋamathirri nhumalaŋgunydja wirrki yana wal'ŋu. 12 Yurru yakana yana ŋarra yurru rrupiyanydja märrama nhumalaŋguŋu, märr yurru ŋuruŋu wiripu-guḻku'yunydja, ŋuriŋinydja ŋunhi walala ŋuli be ḻakaranhamirri Garraywu bo'puyŋu, yakana walala yurru ḻakarama yanapi walalaŋgunydja djäma ŋupanayŋu ŋanapurruŋguŋu. Yakana ŋanapurru ŋuli djäma waŋganygurrunydja rrambaŋinydja walalaŋgala. 13 Ŋunha wiripu-guḻkuny'tja, yaka yuwalk walala Garraywu bo'puyŋu, yaka ŋunhiyinydja Christkuŋu walala djuy'yunara. Djawukinyaramirrina walala ŋunhiyinydja, ga djäma walala ŋuli dhuḏakthunmirrina yanana, yana mayali'-wama nhumalanha. 14 Walalanydja ŋunhi balanyarana yana bitjan buŋgawa ŋunhi walalaŋgu ŋurruŋu Satan, ŋunhi mayali'-wilkthunaramirri. Liŋgu ŋayinydja ŋunhiyi Satandja ŋuli wiripukunharamirri ŋanyapinyay ŋayi, märr yurru yolŋu'-yulŋuyunydja guyaŋirri yanapi ŋayi ŋulaŋuruna djiwarr'wuynha yolŋu, liŋgu maḻŋ'maranharamirrinydja ŋayi ŋuli ŋanyapinyay ŋayi djarraṯawun'mirri be ŋayi. 15 Yaka walala ṉirryurranydja ŋurikinydjayi, ŋunhi yurru Satangala djämamirriyu yolŋuyu wiripukunharamirri ŋanyapinyay ŋayi, ga waŋanydja ŋayi ŋuli mayali'-wilkthunaramirrinydja dhäruk bitjanna, “Ŋarra yurru nhumalanha marŋgikuma yukurra yuwalkkunydja wal'ŋu dhunupawunydja romgu,” bitjan. Ŋunha dhä-yaw'yunarayunydja Godthunydja yurru ŋunhiyi dhä-ḏir'yun yuwalkkumana yana gupaḏalkumana, liŋgu märramanydja walala yurru ŋupanayŋu yana ŋunhi, balanyara liŋgu nhaltjan walala ŋuli yukurra djäma.

16-17 Yo buku-djulŋimirri, yaka walala bawa'mirri ḻakaraŋa ŋarranha, ŋunhi ŋarra yurru ḻakaranharamirri ŋarranhawuy ŋarra. Yaka ḏaḏawyurranydja ŋarrakala ga mäkiriny'tja-dharyunmiya. Yaka ŋarranydja ḏukṯuk ŋarra yurru märr-winya'yun ga ŋurr'yun ŋarrakuwaynydja ŋarra, liŋgu bawa'mirrina dhuwalayinydja rom yanana. Bäyŋu ŋayi yukurrana Garraynydja märr-winya'yurruna ga ŋurr'yurruna nhanŋuwaynydja ŋayi. Yurru yuwalk dhuwala ŋarra yurru ḻakaranhamirrinydja nhumalaŋgu; ŋarra yurru waŋanydja dhuwala bitjan ŋuli ḻawaḻawa ŋunhi ḏalwur yolŋu waŋa, märr nhuma yurru dharaŋan ŋunhi ŋarranydja yaka ŋunha dhuḏiŋura ŋurikalanydja be bo'puyŋuwala walalaŋgala. 18 Guḻku' yolŋu walala ŋuli ŋurr'yun ga märr-winya'yun warraŋulwuy yana nhäwuy malaŋuwuy, ga ŋarranydja yurru märr-winya'yundhi bitjandhi liŋgu ŋurr'yun. 19 Yo, nhumanydja be ḻiya-djambatjmirri wal'ŋu, ŋayaŋu-djulŋithirri yana nhuma ŋuli mäkiri'-witjundja ŋurikiyi ḏalwurmirriwunydja yolŋu'-yulŋuwu, bala mäkiri'-witjurra muka ŋarrakunydja. 20 Yo, ŋayaŋu-djulŋithirrina nhuma ŋuli gumurr-ŋamathirrinydja ŋuriki yolŋuwu, ŋunhi ŋayi ŋuli buŋgawayirri nhumalaŋgu. Ŋayi ŋuli gombumanydja rrupiyanydja nhumalanha, ŋunhiyinydja bitjan ŋayi nhuna yurru gaṯmaramana, bala ŋayi yurru ritjan'thunna nhumalanha bitjanna nhumalanha yutjuwaḻa'kumana, yurru nhumanydja ŋuli yana märramana. 21 Yaka ŋanapurrunydja nhumalaŋgu bitjarrayi. Ŋarra gorana ŋarrakuwaynydja ŋarra yukurra. Ŋarranydja dhuwala yalŋgi, yaka balanyara bitjan wiripu-guḻku' ŋunhi walala wakinmirri be bathalimirri nhumalaŋgu buŋgawa.

Yurru ŋarranydja yurru waŋa ḏalwurthirri bitjan, bitjan walala. Ŋarra yurru märr-winya'yun ga ŋurr'yun ŋarrakuway ŋarra. 22 Walalanydja yukurra ŋurr'yunmirri liŋgu walala Djuws, Yitjural bäpurru, yarraṯaŋuru ŋulaŋuru Yipurayimgala, ga ŋarranydja dhuwala balanyarayi bili Djuwyi yana, Yitjural bäparru, ŋulaŋuru Yipurayimgala yarraṯaŋuru. 23 Walalanydja ŋuli waŋa bitjanmirri, “Ŋanapurrunydja dhuwala djämamirri walala Christku warray,” bitjan, ga ŋarranydja dhuwala Christkuyi yana djämamirri, biyapul wal'ŋu ŋunha bala ŋarranydja walalaŋgalanydja. Dhuwalayinydja dhäruk yuwalk yana, yurru waŋanydja ŋarra yukurra dhuwala bitjanna bitjan ŋuli ḏalwur ŋunhi bawa'mirri yolŋu waŋa. Djämanydja ŋarra wirrki yana dhika wal'ŋu ŋurikala wiripu-guḻku'walanydja, ga guḻku'mirrina mirithirrina ŋarranha yukurrana galkara ḻoḻulili. Ŋula nhämunha'mirrina ŋarranha ŋunhi bumaranydja bartjunmaraŋalanydja biyapulnha dhika wal'ŋu ŋurikala walalaŋgala bukmakkalanydja, ga galkina ŋarra bini ŋunhi rakunydhinyana guḻku'mirrina. 24 Yo, ḏämbumirriyu ŋuruŋu waluyunydja ŋarrakalaynydja miṯtjiyu yolŋu'-yulŋuyu ŋarranha bartjunmaraŋalanydja yukurrana raki'yunydja, guḻku'mirrina mirithirrina, 25 ga buku-ḻurrkun'mirri ŋarranha walala Rawumbuyŋuyunydja miriŋuyu bartjunmaraŋala yukurrana dharpayunydja. Waŋganymirrinydja ŋarra rakunydhinyana bini ŋunhi walala ŋarranha bumara yukurrana guṉḏayu wirriw'-wirriwyurruna, ga ḻurrkun'mirri ŋarra bini ŋurru-ḻupthunanydja gapulilinydja, liŋgu mitjiya ŋunhi ḏaw'yurruna ṉapuŋga' gapuŋura, ga waŋganymirrinydja ŋarra marrtjina waythurruna gapukurru walu-ŋupara ga munha-ŋupara. 26 Bitjanna liŋgu ŋarra ŋuli yukurra marrtjinydja wäŋalili ga wäŋalili. Wiripunydja ŋarra ŋuli buḏapthuna marrtjinya mayaŋ'ku bawitjthu gapuyu, ga wiripunydja ŋarranha ŋuli manaŋganmirriyu yolŋu'-yulŋuyu ŋayathanha, bala bunhana bartjunmaranhana. Guḻku' yolŋu'-yulŋu ŋuyulkthirri yukurra ŋarrakunydja, ŋarrakuway ŋunhi gurruṯu'mirri walala ga bitjandhi liŋgu mulku'-mulkurunydja yolŋu'-yulŋu, wirrki walala ḏukṯukthirrinydja yana yukurra ŋarraku murrkay'kunharawunydja bunharawu, rumbal-winya'yunmaranharawunydja. Ŋunhi ŋarra ŋuli ṉapuŋgany'tja wäŋaŋuranydja, walalanydja ŋuli ŋayan'mirrina walala dhärra'-dharra bunharawuna ŋarraku, ga ŋunhi ŋarra ŋunhala ŋanhdharkŋuranydja wäŋaŋura ŋarra bini rakunydhinyana yana marrya'yinyarayuna, ŋula nhäyuna. Ga guḻku'mirri ŋarra bini ŋurru-ḻupthunanydja ga guḻwuḻyunanydja ritjimirriŋuranydja gapuŋura. Wiripu-guḻkuny'tja ŋuli ŋarraku ḻunduyinya yäna, märr yurru walala baḏuwaḏuyun djäma ŋarraku. 27 Ga guḻku'mirrina ŋarra ŋuli djawaryunanydja, bili weyinŋumirrina ŋarra yukurrana nhinana djämanydja ŋarrakiyingala ŋarra goŋdhunydja. Wiripunydja munhayu ŋarra bäyŋuna ŋorrana, bitjarrana ŋarra yukurrana bira'yurrunana munha-ŋupara, ga bitjanna liŋgu ŋarra ŋuli ŋanhdharkthinyanydja marrya'yinyanydja, ga wiripunydja ŋarra galki rakunydhinyana bini guyiŋarryuna. Guḻku'mirri ŋarra yukurrana marrtjina marimirrikurrunydja ga ŋoy-wutthunaramirrikurrunydja, 28 ga bitjanna liŋgu ŋarra ŋuli yukurra gäma ŋonuŋdja, liŋgu ŋarra warwuyunna ŋuli yukurra bukmakkuna yana Godkalaŋumirriwuna yolŋu'-yulŋuwu, miṯtjiwu ga miṯtjiwu. 29 Yo, ŋunhi ŋuli ŋula yol yolŋu ŋayaŋu-yalŋginy'tja, ga ŋarranydja ŋuli dhäkay-ŋänharamirri ŋayaŋu-yalŋgi' yana walalaŋgala dhambay, ga ŋunhi ŋuli ŋula yolnha gatjpaḻ'maramanydja yätjlili ŋula yolthu yolŋuyu, ŋarranydja ŋuli ŋuriŋiyinydja ŋoy-dhärrana manapan.

30 Wiripu-guḻkuny'tja ŋuli be ḻakaranharamirri walalanhawuy walala ḏälmirrina be walala, yurru ŋarranydja yurru märr-winya'yun ga ŋurr'yun ŋuriŋi warray liŋgu ŋunhi ŋarra yalŋgi, yaka ḏäl ŋarra yolŋu. 31 Godnha ŋayipina marŋgi ŋarrakunydja, ŋunhi ŋarranydja yukurra ḻakarama yuwalknha yana, yakana bothirri. Go, ŋilimurru wokthunna Godkunydja, ŋunhi ŋayi Bäpa'mirriŋu ŋilimurruŋgalayŋuwu Garraywu Djesuwu, ŋilimurru wokthunna nhanŋu yäkuwunydja bitjanna liŋguna.

32-33 Yo, ŋunhi ŋarra ŋäthilinydja wal'ŋu ŋunhalanydja Damatjkanydja wäŋaŋura, ga ŋayinydja buŋgawanydja ŋunhinydja wal'ŋu Giŋ Yaritanydja yukurranha ŋuli djäka ŋuriki wäŋawu, bala ŋayi nherraranydja ŋunhi miriŋunhanydja yolŋunha walalanha ŋunha dhälili ḻiw'maraŋala ŋunhiyi wäŋanha, märr walala bini mulkanha be ŋarranha. Walala bini bunha muka ŋarranha yulŋunydja, yurru ŋayi Godthunydja ŋarranha gungunhamirriyaŋala walŋakuŋala, ga walalanydja wiripu-guḻku'yu ŋunhi Garraywalaŋumirriyunydja walalay yupmaraŋala ŋarranha bathimirrina, bala ŋoylilina ŋunha warraŋullilina, bala ŋarra winya'yurrunana walalaŋgalanydja goŋŋuru.